ءبىر اپتادا كەزەكشى سىنىپتاعى 129 وقۋشى كوروناۆيرۋس جۇقتىرعان

نۇر- سۇلتان. قازاقپارات - دەنساۋلىق ساقتاۋ ءمينيسترى الەكسەي سوي قازاقستاندا قانشا وقۋشى كوروناۆيرۋس جۇقتىرعانى تۋرالى مالىمەتتى ءبولىستى، دەپ حابارلايدى قازاقپارات ءتىلشىسى.

«وقۋ جىلىنىڭ باسىنان باستاپ مەكتەپ وقۋشىلارى اراسىندا كوروناۆيرۋس جۇقتىرۋدىڭ 1741 جاعدايى تىركەلدى. ونىڭ ىشىندە كەزەكشى سىنىپتارعا تىركەلگەن بالالار اراسىندا 482 بالا جۇقتىرعان. بۇل وفلاين رەجيمدەگى وقۋشىلاردىڭ جالپى سانىنىڭ % 0,05 قۇرايدى. ودان بولەك قاشىقتان وقيتىن 1259 بالا كوروناۆيرۋس ينفەكتسياسىن جۇقتىرىپ العان»،-دەدى الەكسەي سوي ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ونىڭ ايتۋىنشا وتكەن اپتادا عانا 12 وبلىستا كەزەكشى سىنىپتاردا وقيتىن وقۋشىلار اراسىندا 129 جاعداي تىركەلگەن.

«وكىنىشكە قاراي، حالىق قايتادان بەيقامدىققا بوي الدىرىپ بارادى. ءبىز الەۋمەتتىك اراقاشىقتىقتى ساقتاماي، ماسكا كيۋدى قويدىق»،-دەدى الەكسەي سوي. ەسكە سالا كەتسەك الەكسەي سوي بۇعان دەيىن «قازاقستاندا جەلتوقسان نەمەسە قاڭتار ايلارىندا قاتاڭ كارانتين شارالارى ەنگىزىلۋى مۇمكىن بە» دەگەن سۇراققا جاۋاپ بەرگەن بولاتىن.

«اپتا سايىن مالىمەتتەردى زەرتتەپ، الداعى كەزەڭدەرگە دە بولجام جاساپ جاتىرمىز. قازىر كورىپ وتىرعانىمىزداي، قازاقستاندا كارانتين شارالارىن جەلتوقسان نەمەسە قاڭتار ايلارىندا ەنگىزۋ ماسەلەسى جاعدايدى قانشالىقتى باقىلاۋدا ۇستاي الاتىنىمىزعا بايلانىستى بولادى. قازىر كوروناۆيرۋس ورشىگەن كەيبىر وڭىردە جۇقتىرۋ دەڭگەيى تومەندەپ كەلە جاتقانىن بايقاپ وتىرمىز. شىعىس قازاقستاندا ماسەلەن جاعداي رەتتەلىپ، جۇقتىرۋ دەڭگەيىنىڭ تومەندەۋ تەندەنتسياسىن باقىلاۋدامىز»،-دەدى الەكسەي سوي.