انكارا 125 مەتر بيىكتىكتەن قازاقستاندى تاۋەلسىزدىك كۇنىمەن قۇتتىقتادى

انكارا. قازاقپارات - تۇركيا استاناسى - انكارا قالاسىنىڭ سيمۆولىنا اينالعان اتاكۇلە عيماراتىندا قازاقستان تاۋەلسىزدىگى كۇنىنە ارنالعان قۇتتىقتاۋ سوزدەر جازىلدى، دەپ حابارلايدى قازاقپارات.

«عيمارات باسشىلىعى انكارانىڭ كەز كەلگەن جەرىنەن كورىنەتىن، قىردا ورنالاسقان مۇنارا شىڭىندا قازاقستان رەسپۋبليكاسىن تاۋەلسىزدىك كۇنىمەن قۇتتىقتادى. عيمارات باسشىلىعىنا شىن جۇرەكتەن العىسىمىزدى بىلدىرەمىز!»، - دەپ جازدى Facebook-تەگى پاراقشاسىندا قازاقستاننىڭ تۇركياداعى ەلشىسى ابزال ساپاربەك ۇلى.

پاراقشادا ورنالاستىرىلعان ۆيدەودا اتاكۇلە نىسانى ەلىمىز تۋىنىڭ تۇسىنە بويالىپ، جوعارعى جاعىندا تۇرىك جانە اعىلشىن تىلدەرىندە «قازاقستان رەسپۋبليكاسىنىڭ تاۋەلسىزدىك كۇنىمەن قۇتتىقتايمىز!» سوزدەرى جۇگىرتپە جولدا جازىلعان. سونداي-اق جازۋلاردىڭ اراسىنان بىرگە ورنالاستىرىلعان قازاقستان مەن تۇركيا رەسپۋبليكالارىنىڭ تۋلارىن كورۋگە بولادى.

اتاكۇلە مۇناراسى تۇركيا استاناسىندا ورنالاسقان بيىكتىگى 125 مەترلىك تەلە-جانە شولۋ عيماراتى. مۇنارا قالانىڭ كەز كەلگەن دەرلىك جەرىنەن كورىنەدى جانە ونىڭ شولۋ الاڭىنان انكارانى الاقانداعىداي تاماشالاۋعا بولادى. سونداي-اق نىساندا اينالمالى مەيرامحانا ورنالاسقان. ول 360 گرادۋستىق ءبىر اينالىمدى 1,5 ساعاتتا جاسايدى. تۇركيانىڭ ەڭ ءبىرىنشى ساۋدا ۇيلەرىنىڭ ءبىرى دە مۇنارانىڭ تومەنگى جاعىندا ورنالاسقان.

بۇعان دەيىن حابارلاعانىمىزداي، قازاقستان تاۋەلسىزدىگىنىڭ 28 جىلدىعى تۇركيانىڭ بىرنەشە قالاسىندا تويلاندى. مەرەكەلىك شارالار 11- جەلتوقساندا قازاقستاننىڭ تۇركياداعى ەلشىلىگىنىڭ رەسمي قابىلداۋىمەن باستالدى. وعان نۇر-سۇلتان قالاسى اكىمدىگى مەملەكەتتىك اكادەميالىق فيلارمونياسىنىڭ قازاق وركەسترى مەن «قورقىت اتا» كونە اسپاپتار ساز توبى ارنايى كەلدى. 50 دەن استام قازاقستاندىق ونەرپاز انكارا، نيدە، بۋرسا، نيدە، ساكاريا جانە تۇركيانىڭ ەڭ تانىمال تۋريستىك ايماعى - كاپپادوكيادا ونەر كورسەتتى جانە سوڭعى كونسەرت بۇگىن ىستانبۇل قالاسىندا ءوتتى.