بيىل جۇمىس كۇشى جەتىسپەيتىن ايماقتارعا 1259 ورالماندار وتباسىن كوشىرۋ جوسپارلانىپ وتىر
بۇل تۋرالى ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ باسپا ءسوز قىزمەتىنەن حابارلادى.
تاريحي وتانىنا ورالعان ەتنيكالىق قازاقتاردى ورنالاستىرۋ ايماقتىق كۆوتالارى كەلەسى كەزەكتە بولىنگەن: پاۆلودار وبلىسىندا - 690 وتباسى، شىعىس قازاقستان وبلىسىندا - 260 وتباسى، اقمولا وبلىسىندا - 123 وتباسى، سولتۇستىك قازاقستان وبلىسىندا - 108 وتباسى، باتىس قازاقستان وبلىسىندا - 29 وتباسى، اتىراۋ وبلىسىندا - 28، قوستاناي وبلىسىندا - 21 وتباسى.
جوعارىدا اتالعان قاۋلىدا جۇمىس كۇشىنە سۇرانىس مول ايماقتارعا قونىس اۋدارعىسى كەلەتىن ق ر ازاماتتارىن كوشىرۋ دە قاراستىرىلعان. بۇل باعىتقا 463 قونىس اۋدارۋشى وتباسىن قابىلداۋ كۆوتالارى بولىنگەن: پاۆلودار وبلىسىندا - 300 وتباسى، سولتۇستىك قازاقستان وبلىسىندا - 101 وتباسى، شىعىس قازاقستان وبلىسىندا - 40 وتباسى، قوستاناي وبلىسىندا - 22 وتباسى.
ايماقتىق كۆوتالار تىزىمىنە كىرەتىن ورالماندار مەن قونىس اۋدارۋشىلارعا، سونداي- اق ولاردىڭ وتباسىلارىنا كوشۋ كەزىندە كومەك كورسەتىلىپ، جۇمىسقا ورنالاسۋ، ونىڭ ىشىندە «جۇمىسپەن قامتۋ 2020 جول كارتاسى» باعدارلاماسىنىڭ اياسىندا مەملەكەتتىك قولداۋ كورسەتىلەتىن بولادى.
ايماقتىق كۆوتاعا ءوتىنىم بەرۋ كەزىندە ورالمان كۋالىگى بار تاريحي وتانىنا كەلگەن ەتنيكالىق قازاقتار قاتىسا الادى. ورالمان مارتەبەسىن الۋ جانە كۆوتا تىزىمىنە ەنگىزۋ ماسەلەلەرى بويىنشا تۇرعىلىقتى مەكەن- جايىنا قاراي وبلىستىق، استانا، الماتى قالالارى جۇمىسپەن قامتۋدى ۇيلەستىرۋ، الەۋمەتتىك باعدارلامالار بولىمدەرىنە ءوتىنىم بىلدىرۋگە بولادى.
اعىمداعى جىلعى مامىر ايىنان باستاپ ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ قولداۋىمەن ورالماندار مەن قونىس اۋدارۋشىلارعا قاجەتتى تولىق اقپاراتتى قامتيتىن «ۇلى كوش» اقپاراتتىق پورتالى ءوز جۇمىسىن باستايدى.
ەستەرىڭىزگە سالا كەتەيىك، 1991-2015 - جىلدار ارالىعىندا 261 مىڭ 104 وتباسى نەمەسە 957 مىڭ 772 ەتنيكالىق قازاقتار تاريحي وتانىنا ورالىپ، ورالمان مارتەبەسىنە يە بولدى. بۇل جالپى حالىق سانىنىڭ 5,5 پايىزىن قۇرايدى.