ەلدىڭ دەنساۋلىق ساقتاۋ مينيسترلىگىنىڭ مالىمەتىنشە، بىشكەكتىڭ تراۆماتولوگيا جانە ورتوپەديا عىلىمي- زەرتتەۋ ورتالىعىنا بارلىعى 65 ادام ءتۇستى. ولاردىڭ ىشىندە 40 ادام - كۇش قۇرىلىمدارىنىڭ قىزمەتكەرلەرى. 2 زارداپ شەگۋشى سىنىق جاراقاتتارمەن جانساقتاۋ بولىمىنە جاتقىزىلدى. دارىگەرلەر جاعدايلارىن اۋىر دەپ باعالاۋدا.
ۇلتتىق گوسپيتالعا 40 ادام جەتكىزىلدى، ونىڭ ەكەۋى - جانساقتاۋ بولىمىندە. №1 قالالىق كلينيكالىق اۋرۋحاناعا 2 ادام جاتقىزىلعان. شۋ وبلىستىق اۋرۋحاناسىنا 7 زارداپ شەگۋشى جۇگىنگەن. العاشقى مەديتسينالىق كومەكتەن كەيىن ولار امبۋلاتورلىق ەم قابىلداۋ ءۇشىن ۇيلەرىنە جىبەرىلدى. ۇلتتىق حيرۋرگيا ورتالىعىنا 7 ادام تۇسكەن. ونىڭ ىشىندە بىرەۋى ەمىن امبۋلاتورلىق جاعدايدا قابىلدايتىن بولادى. قازا بولعاندار جوق.
سونداي- اق دەنساۋلىق ساقتاۋ مينيسترلىگىنىڭ اقپاراتىنا سايكەس، بىشكەك قالالىق شۇعىل كومەك ورتالىعىنىڭ فەلدشەرىنە شابۋىل جاسالعان. ول اۋرۋحاناعا جاتقىزىلدى. جەدەل جاردەم بريگاداسىنىڭ ەكى كولىگى زاقىمدالعان.
ەسكە سالايىق، جەكسەنبى، 4 - قازان كۇنى قىرعىزستاندا جوگوركۋ كەنەشكە دەپۋتاتتاردى سايلاۋ ءوتتى. دەپۋتاتتىق مانداتقا 16 پارتيا ۇمىتكەرلىك ەتتى. داۋىس بەرۋدىڭ الدىن الا مالىمەتى بويىنشى، %7 مەجەنى 4 پارتيا ەڭسەردى. ال، كەشە، 5 - قازان كۇنى سايلاۋ ناتيجەسىنە كوڭىلى تولماعان ءبىر توپ ادام ورتالىق الاڭدا ميتينگ ۇيىمداستىرىپ، ودان كەيىن اق ۇيگە بەتتەدى. ولاردى تارقاتۋ ءۇشىن ميليتسيا كوز جاساۋراتاتىن گاز، سۋاتقىش جانە گاز- شۋىلدى قۇرىلعىلار قولدانعان.
بىشكەك ۋاقىتىمەن ساعات 22.00-دەگى ءمالىم بويىنشا، اۋرۋحاناعا زارداپ شەككەن 16 ادام جەتكىزىلگەن. ەلدىڭ ىشكى ىستەر مينيسترلىگى ميتينگتى ۇيىمداستىرۋشىلار مەن پارتيا باسشىلارىن ءوز جاقتاستارىن ۇيلەرىنە قايتارۋعا شاقىردى. كەيىن قىرعىزستان پرەزيدەنتى سوورونباي جەەنبەكوۆ ەرتەڭ، 6 - قازان كۇنى پارلامەنتتىك سايلاۋعا قاتىسقان بارلىق 16 پارتيا باسشىسىمەن كەزدەسەتىنى ءمالىم ەتىلدى.
ايتا كەتەيىك، ەلدىڭ ورتالىق سايلاۋ كوميسسياسى داۋىس بەرۋدىڭ سوڭعى ناتيجەسىن سايلاۋدان كەيىن 20 - كۇننەن كەشىكتىرمەي جاريالاۋى ءتيىس.
اۆتور: ميرا تولەندى قىزى