ولار بىرنەشە جىلدان بەرى تۇرعىن ءۇي كەزەگىندە تۇرعان. قولجەتىمدى شارشى مەترلەرگە تۇرعىندار وتباسى بانكىنىڭ («بايتەرەك» حولدينگىنىڭ ەنشىلەس ۇيىمى) نەسيەلەندىرۋى ارقىلى يە بولىپ وتىر.
باعدارلاما اياسىندا قارجى قۇرىلىمى جىلدىق 2 پايىزدىق مولشەرلەمەمەن زاەم بەردى. ال العاشقى جارنا باسپانا قۇنىنىڭ نەبارى 10 پايىزىنا عانا تەڭ.
شىمكەنت تۇرعىندارى تازا ارلەۋدەگى پاتەرلەردى 1 شارشى مەترىنە 180000 تەڭگەدەن ساتىپ الدى.
جاڭا جىل قارساڭىندا شىمكەنت قالاسىنىڭ اكىمىنىڭ ورىنباسارى ماقسۇت يساحوۆ پەن وتباسى بانك فيليالىنىڭ ديرەكتورى داۋرەن ساۋدابايەۆ «باقىتتى وتباسى» باعدارلاماسىنا قاتىسۋشىلاردى قونىس تويلارىمەن قۇتتىقتادى.
- بۇگىندە كوپبالالى وتباسىلار مەن مۇمكىندىگى شەكتەۋلى بالالاردى تاربيەلەپ وتىرعان وتباسىلار پاتەر كىلتتەرىن الىپ وتىر. ەلىمىزدە وسى ساناتتاعى ازاماتتارعا ەرەكشە كوڭىل بولىنەدى. اسىرەسە، ولاردىڭ قولداۋى ءۇشىن «باقىتتى وتباسى» مەملەكەتتىك باعدارلاماسى قولعا الىندى. ونى جۇزەگە اسىرۋعا بيىل ەل بيۋدجەتىنەن 51 ميلليارد تەڭگە ءبولىندى. بۇل قازاقستان بويىنشا 5 مىڭعا جۋىق وتباسى قونىس تويىن تويلايدى دەگەن ءسوز. ولاردىڭ اراسىندا شىمكەنتتىكتەر دە بار. ۇيلەرى ءارقاشان جىلى، جايلى بولىپ، بالالاردىڭ شات- شادىمان كۇلكىسىنە تولسىن، - دەيدى «وتباسى بانك» ا ق شىمكەنت قالالىق فيليالىنىڭ ديرەكتورى داۋرەن ساۋدابايەۆ.
ەكى بولمەلى پاتەردە قونىس تويىن گۇلميرا ماحايەۆا دا تويلاماق. ول ەكى بالانىڭ اناسى، بۇلدىرشىندەرىنىڭ بىرەۋىنە ەرەكشە كۇتىم قاجەت.
- ءۇيىمىزدىڭ ورنالاسقان جەرىنە ريزامىن، قالا ورتالىعىندا. بۇل جەردەن مەكتەپكە دە، اۋرۋحاناعا دا، جۇمىسقا دا وڭاي جەتەمىن. پاتەر ءبىرىنشى قاباتتا ورنالاسقان، بۇل ءبىزدىڭ وتباسىمىزعا دا ىڭعايلى، سەبەبى ءبىر ۇلىمنىڭ مۇگەدەكتىگى بار. نەسيە بويىنشا 83 مىڭ تەڭگە تولەيمىن. بۇل شىمكەنتتە پاتەر جالداۋدان ەكى ەسە ارزان، - دەپ قۋانىشىمەن ءبولىستى گۇلميرا ماحايەۆا.
جالپى بيىلعى جىلى وتباسى بانك مەملەكەتتىك باعدارلامالار اياسىندا كەزەكتە تۇرعان 10518 ادامنىڭ تۇرعىن ءۇي جاعدايىن جاقسارتۋعا كومەكتەستى. «باقىتتى وتباسى» باعدارلاماسى بويىنشا 1247 قازاقستاندىقتىڭ باسپانا ماسەلەسى شەشىلدى، «شاڭىراق» باعدارلاماسى اياسىندا 5989 ادام قونىس تويىن تويلادى، سونداي- اق «نۇرلى جەر» باعدارلاماسى بويىنشا 3282 وتباسى ءوز ۇيلەرىنە كوشتى.