120 جىلدىق تاريحى بار كارى تەرەكتىڭ تاعدىرىن قازاقپاراتقا ساياباق اكىمشىلىگى ايتىپ بەردى.
اكىمشىلىكتىڭ دەرەگىنشە، بۇل جايت ەسىل وزەنىنىڭ جاعالاۋىنا 15 مينۋتتىق لازەرلىك مۋزىكالىق شوۋدىڭ دەمەۋىمەن اتقىلايتىن سۋبۇرقاقتى ورناتۋمەن بايلانىستى ورىن العان.
«اتالعان سۋبۇرقاقتى باسقارۋ ءۇشىن بەلگىلى ءبىر قۇرىلىس سالىندى. ولاردا ەلەكتر قالقان اسپاپتارى، سورعىش جانە باسقا دا قۇرىلعىلار ورنالاسقان. ولاردىڭ ءبارىن قورعاۋ ءۇشىن ارنايى قورشاۋ جاسالدى. وكىنىشكە وراي، اتالعان ايماق تولىقتاي قورشاۋعا الىنۋى قاجەت بولعاندىقتان تەرەك تە سول قورشاۋدىڭ ىشىندە قالىپ قويدى. ەندىگى ۋاقىتتا ءبىز وسى سىرتىنان عانا باقىلاي الامىز»، - دەدى ەلوردالىق ساياباقتىڭ ءبولىم جەتەكشىسى يرينا ماسلەنكو.
ايتا كەتەرلىگى، 120 جىلدىق تەرەك كوپەس كۋبرين وسى قالا تۇرعان كەزىندە وتىرعىزىلعانى بەلگىلى. سوندىقتان دا ەلوردانىڭ ساياباعى ۇزاق ۋاقىت بويى كۋبرين ساياباعى دەپ اتالىپ كەلگەن بولاتىن. ساياباق قۇرىلعاننان باستاپ وسى كۇنگە دەيىن وسى جالعىز تەرەك قانا امان قالعان. ول ايتا قويارلىقتاي كۇتىپ-باپتاۋدى قاجەت ەتپەيدى. تەك قۋراپ قالعان بۇتاقتارىن كەسىپ تاستاپ وتىرسا بولعانى.
يرينا ماسلەنكونىڭ ايتۋىنشا، كەلەشەكتە سۋبۇرقاقتى باسقارۋ جۇيەسى قايتا جاڭعىرتىلىپ، باسقا جەرگە كوشىرىلەتىن بولادى. سول كەزدە تەرەك قورشاۋدان بوسايدى جانە ونىڭ جانىنا تەرەكتىڭ تاريحي جازىلعان ارنايى تاقتايشا ورناتىلادى.
«ساياباقتا 1995 -جىلدان بەرى جۇمىس ىستەيمىن. وسى جەردە ءدال وسىنداي تاعى ەكى تەرەك بار ەدى. ءبىراق ولار سۋعا جاقىن بولعاندىقتان ءشىرىپ قۇلاۋعا جاقىن قالعان بولاتىن. جاعالاۋدى قايتا جاڭعىرتۋ، جاعاجايدى جابدىقتاۋ بارىسىندا ولاردى كەسۋگە تۋرا كەلدى»، - دەدى ول.