قازاقستاندا 1200 كاسىپورىن 1 ميلليوننان استام جۇمىسشىنىڭ ايلىعىن كوتەردى
بۇل تۋرالى ق ر باس مەملەكەتتىك ەڭبەك ينسپەكتورى تولەگەن وسپانقۇلوۆ ورتالىق كوممۋنيكاتسيالار قىزمەتىندە وتكەن بريفينگىدە ايتتى.
«ەڭبەك داۋلارىنىڭ باسىم بولىگى نەگىزىنەن ماڭعىستاۋ وبلىسىندا تىركەلىپ وتىرعانىن ايتتىق. وسىعان بايلانىستى ۇكىمەت، ونىڭ ىشىندە ءبىزدىڭ مينيسترلىك بۇل ماسەلەگە ەرەكشە ءمان بەرىپ وتىر. پرەمەر-ءمينيستردىڭ ورىنباسارى ەرالى توعجانوۆ باسشىلىق جاسايتىن ارنايى جۇمىس توبى بار. جاڭاوزەن قالاسىنىڭ پروبلەمالىق ماسەلەلەرىن شەشۋگە ارنالعان ۆەدومستۆوارالىق شتاب بار. ونى وبلىس اكىمى باسقارادى. نارازىلىق اكسيالارى مەن ەڭبەك داۋلارى نەگىزىنەن مۇناي سەرۆيس كاسىپورىندارىندا بولىپ جاتادى. بۇل جەردە مەن مۇناي سەرۆيسى دەپ قوسالقى مەردىگەرلەر تۋرالى ايتىپ وتىرمىن. ولاردىڭ ءبارى ءوز جۇمىسكەرلەرىنىڭ ايلىعىن كوتەرۋدى تالاپ ەتىپ وتىر. ويتكەنى قوسالقى مەردىگەرلەردىڭ ايلىعى باس مەردىگەرلەر جۇمىسشىلارىنىڭ ايلىعىنان الدەقايدا از»، - دەدى كوميتەت وكىلى.
كوميتەت ماماندارى وسىنىڭ ءبارىن ەسكەرىپ، تالداي كەلە، «سامۇرىق-قازىنا» كومپانياسىنىڭ تەندەر وتكىزۋ تارتىبىنە وزگەرىس ەنگىزۋ تۋرالى شەشىم قابىلداعان.
«تەندەرگە قاتىسۋ كەزىندە باعانى تومەندەتۋ شەگى بەلگىلەندى. بۇرىن باعانى تومەندەتۋ شەگى 30 پايىزعا دەيىن بولسا، قازىر 15 پايىزعا دەيىن عانا تۇسىرۋگە بولادى. كاسىپورىندار قانشالىقتى كوپ دەمپينگ جاساسا، بولىنەتىن سوما سونشالىق تومەن بولادى. ەگەر تەندەر سوماسى تومەن بولسا، قوسالقى مەردىگەر تەندەر قۇجاتتاماسى بويىنشا قىزمەتشىلەرىنىڭ ايلىعىن كوتەرە المايدى. سوندىقتان 15 پايىز شەكتەۋ قويىپ وتىرمىز. تەندەر قۇجاتتاماسىنا قوسالقى مەردىگەر ۇيىمنىڭ ەڭبەكاقىسى باس مەردىگەر ۇيمداعى ەڭبەكاقىسىنىڭ 70 پايىزىنان كەم بولماۋى كەرەك دەگەن وزگەرىس ەنگىزدىك»، - دەديدى تولەگەن وسپانقۇلوۆ.
ونىڭ ايتۋىنشا، قوسالقى مەردىگەرلەردىڭ اراسىنداعى «الىپساتارلىققا» دا توسقاۋىل قويىلماق.
«ءبىر كومپانيا تەندەردى ۇتىپ الىپ، تاعى ءبىر قوسالقى مەردىگەرگە بەرۋى مۇمكىن. ءبىز بۇعان دا شەكتەۋ ەنگىزدىك. بۇدان بىلاي تەندەر ۇتىپ العان مەدىگەر قوسالقى مەردىگەرگە تاپسىرىستىڭ 25 پايىزىن عانا وتكىزە الادى. قازىر وسىنىڭ ءبارى جەمىسىن بەرە باستادى. ويتكەنى بۇل جۇمىس باسقا دا كومپانيالارعا ەنگىزىلىپ جاتىر. قازاقستان قۇرىلىسشىلار قاۋىمداستىعى دا وسى ءتاسىلدى دۇرىس كوردى. ەنەرگەتيكا مينيسترلىگى جەر قويناۋىن يگەرىپ وتىرعان ءىرى كاسىپورىنداردىڭ بارىمەن ءوز جۇمىسشىلارىنىڭ ەڭبەكاقىسىن كوبەيتۋ بويىنشا جۇمىس ىستەپ جاتىر. بۇگىندە 1200 كاسىپورىن 1 ميلليوننان استام جۇمىسشىنىڭ ايلىعىن 5 تەن 50 پايىزعا دەيىن كوتەردى»، - دەدى كوميتەت باسشىسىنىڭ ورىنباسارى.
بۇعان دەيىن ق ر پرەمەر-ءمينيسترىنىڭ ورىنباسارى ەرالى توعجانوۆ ەڭبەك داۋلارىن شەشۋ ماسەلەسىندە ماڭعىستاۋ وبلىسىنىڭ تاجىريبەسىن ەنگىزۋدى ۇسىنعان ەدى.