داعىستانداعى جارىلىستان 12 ادام قازا بولدى، 70 كە جۋىعى اۋرۋحانادا
10:23, 15 - تامىز 2023
ماحاچكالا. قازاقپارات - تامىزدىڭ 14 ىنەن 15 ىنە قاراعان ءتۇنى داعىستان استاناسى ماحاچكالا قالاسىندا جانار-جاعار ماي قۇيۋ ستانسياسىندا جارىلىس بولىپ، ۇلكەن ءورت بولدى، دەپ حابارلايدى قازاقپارات تاسس-قا سىلتەمە جاساپ.
سوڭعى مالىمەتتەرگە سايكەس، جالىن 600 شارشى مەتر اۋماقتى شارپىدى.
داعىستان باسشىسى سەرگەي مەليكوۆ تىلشىلەرگە ءمالىم ەتكەندەي، جارىلىس جاعار ماي قۇيۋ ستانتسياسىنا قارسى بەتتە بولعان. سەبەبى مەن سالدارى انىقتالىپ جاتىر.
وتىن قۇيىلعان سەگىز سيستەرنانىڭ ەكەۋى جارىلعان.
رەسمي دەرەك بويىنشا، وقيعا سالدارىنان 12 ادام قازا بولدى، ونىڭ ىشىندە 2 بالا بار. تاعى 66 ادام زارداپ شەكتى، ونىڭ 13 ى - بالالار، 10 ادامنىڭ جاعدايى اۋىر.
ماحاچكالانىڭ مەديتسينا مەكەمەلەرى كۇشەيتىلگەن رەجيمگە اۋىستىرىلدى. دەنساۋلىق مينيسترلىگى ماحاچكالا اۋرۋحانالارىندا توسەك ورىن جەتكىلىكتى ەكەنىن ايتتى.
داعىستاننىڭ كوپتەگەن تۇرعىنى زارداپ شەككەندەر ءۇشىن قان تاپسىرۋعا رەسپۋبليكالىق قان قۇيۋ ستانسياسىنا باردى.
قازىرگى ۋاقىتتا ءورت تولىعىمەن ءسوندىرىلدى.