ماركوس 19 جاسقا كەلگەندە ونى يسپانيانىڭ ازاماتتىق گۆاردياسى تاۋىپ الىپ، ونى وركەنيەتتى زامانعا اكەلگەن. ءبىراق قازىر 72 جاسقا كەلگەن ماركوس، ادامداردىڭ اراسىندا ءومىر سۇرۋگە ءالى بەيىمدەلمەگەن.
ماركوس رودريگەس پانتوحا 1946 -جىلى انور قالاسىندا دۇنيەگە كەلگەن. ول ءۇش جاسقا تولعاندا ونىڭ اناسى قايتىس بولىپ كەتكەن. ال اكەسى بالاسىن تاستاپ، كورشى قالاداعى باسقا ايەلمەن كوڭىل قوسقان. اكەسى ماركوستى قارت شوپانعا كومەكتەسسىن دەپ تاۋعا اپارىپ تاستاعان. ءبىراز ۋاقىتتان كەيىن قارت شوپان قايتىس بولعان، ال بالا جاپان دالادا جالعىز ءوزى قالعان. كەيىن ول ۇڭگىرلەردىڭ بىرىنەن كۇشىكتەرىمەن تۇراتىن قاسقىردى كەزدەستىرگەن. سودان بەرى ماسكوس قاسقىرلاردىڭ اراسىندا ءومىر سۇرگەن. بۇل تۋرالى bigpicture.ru حابارلادى، دەپ جازادى Stan.kz اقپاراتتىق اگەنتتىگى.
جابايى جىرتقىشتارمەن ءومىر سۇرگەن ەر ادامنىڭ وسى ۋاقىتقا دەيىن قالاي امان قالعانى بەلگىسىز. ءبىراق ونى ازاماتتىق كۇزەتشىلەر تاۋىپ العان كەزدە، ول جانۋار سەكىلدى ۇلىعان ەكەن. ماركوس حالىق اراسىنا ورالعانىمەن، ءالى كۇنگە دەيىن ادامدارمەن ءومىر سۇرۋگە بەيىمدەلە المادى. ول ءتىپتى قاسقىرلارعا قايتا ورالعىسى كەلگەن. ءبىراق ەندى قاسقىرلار وعان وزدەرىنىڭ وتباسى مۇشەسى رەتىندە قارامايدى.
«قاسقىرلار ءالى سوندا. مەن ولاردى شاقىرسام، ماعان جاۋاپ رەتىندە بەلگى بەرەدى. ءبىراق ولار ماعان جاقىنداعىسى كەلمەيدى. سەبەبى مەن ءاتىر قولدانعاندىقتان، مەنەن ادامنىڭ ءيىسى شىعادى»، - دەيدى ماركوس.
ماركوس ومىرىندەگى باقىتتى ساتتەردىڭ قاسقىرلارمەن بولعانىن ەسىنە الدى. ول وزىنە انا رەتىندە مەيىرىمىن توككەن قاسقىر مەن ونىڭ كۇشىكتەرىمەن وتكەن ۋاقىت ومىرىندەگى ەڭ ىستىق ەستەلىكتەر ەكەنىن ايتتى.
ولار ماركوسقا جابايى تابيعاتتا امان قالۋدى ۇيرەتكەن. ونى اسىراعان قاسقىرلار وعان ساڭىراۋقۇلاقتار مەن جيدەكتەردىڭ قاۋىپسىز جانە ۋلى تۇرلەرىن كورسەتكەن. ماركوس ۇڭگىردە جارقاناتتارمەن، جىلاندارمەن جانە بۇعىلارمەن بىرگە تۇنەگەن كەزدەرىن ەسىنە الدى.
ءبىراق بۇل باقىتتى ساتتەر 53 جىل بۇرىن ونى تاۋىپ العان كەزدە اياقتالدى. سودان بەرى ماركوستىڭ ومىرىندە ەشقانداي قىزىق قالمادى. ول فۋتبول مەن ساياسات تۋرالى از بىلەتىندىكتەن، ەلگە الدانىپ قالادى ەكەن.
قازىر ماركوس ورەنس پروۆينسياسىنداعى شاعىن اۋىلدا تۇرادى. ادامدارمەن بىرگە ءومىر سۇرۋگە ۇيرەنبەگەن ماركوس ءوزىن جاقىن تارتقان كەيبىر كورشىلەرىنە قۋانىشتى ەكەنىن ايتتى. ول بالالارمەن جانۋارلارعا دەگەن سۇيىسپەنشىلىك پەن قورشاعان ورتانى قورعاۋ قاجەتتىلىگى تۋرالى اڭگىمە ەتكەندى ۇناتادى. كەيدە ءتىپتى ماركوستى مەكتەپتەرگە ءدارىس بەرۋگە شاقىرادى. ەلۋ جىل بويى ادامدارعا باۋىر باسا الماعان ماركوس تەك بالالاردىڭ ورتاسىندا عانا ءوزىن جايلى سەزىنەتىن سەكىلدى.