تۇركيادا جەتكىنشەك 11 تاۋلىكتەن كەيىن ءۇيىندى استىنان امان شىقتى
10:40, 17 - اقپان 2023
استانا. قازاقپارات - جويقىن ءزىلزالادان كەيىن تۇركيانىڭ انتاكيا قالاسىندا 11 تاۋلىككە جۋىق ءۇيىندى استىندا جاتقان 14 جاستاعى بالا قۇتقارىلدى، دەپ حابارلايدى «حابار 24».
جاسوسپىرىم ءتۇرلى دەنە جاراقاتىن العان. قازىر ول اۋرۋحاناعا جەتكىزىلدى. بۇدان بولەك، كاحرامانماراش وڭىرىندە قيراعان عيمارات استىنان ءبىر ايەل امان شىعارىلدى. 42 جاستاعى نەسليحان كيليچ 10 كۇن بويى ۇيىندىگە كومىلىپ جاتقان. تۋىستارى ونىڭ امان قالاتىنا سەنبەگەن. كەلىنشەكتىڭ جولداسى مەن 2 بالاسى ازىرگە تابىلعان جوق.
ايتا كەتەيىك، جاقىندا وسى قۇلاعان عيماراتتىڭ استىندا 248 ساعات جاتقان 7 جاستاعى قىز قۇتقارىلعان بولاتىن.