«ايماقتا 2020-2021 -جىلدار ارالىعىندا قارجى جىمقىرۋ دەرەگى بويىنشا اكىمدىكتىڭ 11 قىزمەتكەرىنە قىلمىستىق ءىس قوزعالعان. ولاردىڭ ىشىندە قىزىلوردا وبلىسىنىڭ مادەنيەت، ارحيۆ جانە قۇجاتتاما باسقارماسىنىڭ باسشىسى، دەنە شىنىقتىرۋ جانە سپورت باسقارماسىنىڭ باسشىسى جانە 5 سپورت مەكتەبىنىڭ ديرەكتورى، جەر قاتىناستارى باسقارماسى باسشىسىنىڭ ورىنباسارى، وبلىستىق قۇرىلىس، ساۋلەت جانە قالا قۇرىلىسى باسقارماسى باسشىسىنىڭ ورىنباسارى، اۋىل شارۋاشىلىعى باسقارماسىنىڭ ءبولىم باسشىسى مەن باس مامانى بار. اتالعان تۇلعالاردىڭ قىلمىستىق ىستەرى 2021 -جىلى تىركەلىپ، سوت ۇكىمدەرى بيىل عانا جاريالاندى. سونىڭ سالدارىنان قىزىلوردا ءوڭىرى رەسپۋبليكاداعى ايماقتار اراسىندا سىبايلاس جەمقورلىق سيپاتىنداعى قىلمىستىق كورسەتكىشتەرمەن الدىڭعى قاتارعا ىلىكتى»، - دەپ ءمالىم ەتتى اكىمدىكتىڭ باسپا ءسوز قىزمەتىنەن.
جەرگىلىكتى قۇزىرلى ورگان دەرەگىنشە، بۇگىندە جاڭاقورعان اۋدانىنداعى بىرنەشە مەكتەپتىڭ ەسەپشىلەرىنە قاتىستى جەمقورلىق باعىتىندا قىلمىستىق ىستەر قوزعالعان.