ەۋروپانىڭ 11 ەلى اتىراۋ ەكونوميكاسىنا ينۆەستيتسيا سالۋعا قىزىعۋشىلىق تانىتتى
اتىراۋ وبلىسىنا ەۋروپالىق وداقتىڭ قازاقستانداعى ەلشىسى كەستۋتيس يانكاۋسكاس پەن 11 ەلدىڭ ەلشىسى كەلدى. ونىڭ ىشىندە حورۆاتيا، بولگاريا، پورتۋگاليا، نيدەرلاندى كورولدىگى، ەستونيا، بەلگيا، گەرمانيا، سلوۆاكيا، فرانسيا، يسپانيا، اۆستريا ەلدەرىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىلەرى، فرانسيا ەلشىلىگىنىڭ ەكونوميكا ماسەلەلەرى جونىندەگى اتتاشەسى بار.
وبلىس اكىمى سەرىك شاپكەنوۆتىڭ مالىمەتىنشە، بيىلعى قاڭتار-قىركۇيەك ارالىعىندا اتىراۋ وبلىسىنىڭ ەۋرووداق ەلدەرىمەن سىرتقى ساۋدا اينالىمى 14,4 ميلليارد ا ق ش دوللارىن قۇراعان. ونىڭ ىشىندە ەكسپورت - 14,1 ميلليارد ا ق ش دوللارى، ال، يمپورتتىڭ ۇلەسى - 269,02 ميلليون ا ق ش دوللارى.
«ەۋروپالىق وداق - ەلىمىزدىڭ باستى ەكونوميكالىق ءارى ساۋدا سەرىكتەستەرىنىڭ ءبىرى. مەملەكەت باسشىسى قاسىم-جومارت توقايەۆتىڭ اتىراۋ وبلىسىندا اۋىل شارۋاشىلىعى، بالىق شارۋاشىلىعى، دەنساۋلىق ساقتاۋ جانە ءبىلىم بەرۋ سالاسىن دامىتۋ جونىندە بەرگەن تاپسىرماسىنا سايكەس ەۋروداق ەلدەرىمەن تىعىز بايلانىس ورناتۋعا، بىرلەسە جۇمىس ىستەۋگە دايىنبىز. وڭىردەگى ارنايى ەكونوميكالىق ايماقتا ينۆەستورلارعا قولايلى جاعداي جاسالدى. بولاشاقتا پوليەتيلەن جانە بۋتاديەن ءوندىرىسىن وركەندەتۋ جوسپارى بار»، - دەدى سەرىك شاپكەنوۆ.
ەۋروپالىق وداق پەن 11 ەلدىڭ ەلشىلەرى اتىراۋ وبلىسىنداعى كولىك-لوگيستيكا سالاسىن جاڭعىرتۋعا، ونەركاسىپتىك ينفراقۇرىلىم مەن جاسىل ەكونوميكانى دامىتۋعا ينۆەستيتسيا سالۋعا قىزىعۋشىلىق تانىتتى.
«اتىراۋ وبلىسىنا العاشقى ساپارىمدا ازيا مەن ەۋروپانى جالعايتىن كوپىردى كورۋگە اسىقپىن. بۇل وڭىردەگى ساۋدا اينالىمىنىڭ ارتۋى، كوپتەگەن كومپانيالاردىڭ قازاقستان نارىعىندا كەلىسىمشارت جاساسىپ، سونىڭ اياسىندا بەلسەندى جۇمىس ىستەۋى - ەكىجاقتى
قارىم-قاتىناستىڭ جاقسى دامىعانىنىڭ جەمىسى. ەۋروپالىق وداققا مۇشە ەلدەردىڭ ءبارى قازاقستاننىڭ ەڭ ءىرى ينۆەستيتسيالىق سەرىكتەسىنە اينالىپ وتىر. وداق ەلدەرى وسى وڭىرگە دە وزىق تەحنولوگيالاردى اكەلىپ، ينۆەستيتسيا سالۋعا دايىن»، - دەدى ەۋروپالىق وداقتىڭ قازاقستانداعى ەلشىسى كەستۋتيس يانكاۋسكاس.
ەسكە سالا كەتەلىك، بۇدان بۇرىن ماجار ينۆەستورى اتىراۋدا كۇننەن ەنەرگيا الۋ جوباسىن ۇسىنعانىن جازعان ەدىك.