الماتى وبلىسىندا تاۋدان اققان سۋ 11 ءۇيدىڭ اۋلاسىن باسىپ قالدى
10:56, 24 - ماۋسىم 2022
كەگەن. قازاقپارات- قاتتى جاۋىن سالدارىنان الماتى وبلىسىنىڭ كەگەن اۋدانىنداعى تۇمەنباي اۋىلىندا بىرنەشە ءۇيدىڭ اۋلاسىن سۋ باستى، دەپ حابارلايدى قازاقپارات ءتىلشىسى.
«23-ماۋسىم كۇنى ساعات 17:40-دا شاماسىندا كەگەن اۋدانى، تۇمەنباي اۋىلىندا نوسەر جاڭبىر سالدارىنان اۋىل ءىشى كوشەلەرىن تاۋدان اققان سۋ باستى. تاۋ سۋى 1 تۇرعىن ءۇي كىرگەن جانە 11 ءۇيدىڭ اۋلاسىن باسقان. وقيعا ورنىنا اۋدان اكىمى، كەگەن اۋىلدىق وكرۋگىنىڭ اكىمى، توتەنشە جاعدايلاردىڭ الدىن الۋ ءبولىمىنىڭ قىزمەتكەرلەرى باردى. توتەنشە جاعدايدى بىرنەشە تەحنيكا جۇمىلدىرىلدى. ادامدار زارداپ شەكپەگەن»، - دەلىنگەن كەگەن اۋدانى اكىمىنىڭ باسپا ءسوز قىزمەتى تاراتقان حابارلامادا.
ۆەدومستۆونىڭ اقپاراتىنا سايكەس، تۇرعىن ۇيلەر مەن اۋلالارعا كوميسسيا ۇيىمداستىرىلىپ، شىعىندار ەسەپتەلۋدە.
ەسكە سالساق، الماتى وبلىسىنىڭ كەگەن اۋدانىندا رەسپۋبليكالىق جول جيەگىن سۋ شايىپ كەتتى.
اۆتور: سامال قابىشەۆا