قاڭتار وقيعاسى: جالعان اقپارات تاراتۋ فاكتىسى بويىنشا 11 قىلمىستىق ءىس تەرگەلىپ جاتىر
ق ر باس پروكۋراتۋراسى 1-قىزمەت باستىعىنىڭ ورىنباسارى ەلدوس قيلىمجانوۆ ورتالىق كوممۋنيكاتسيالار قىزمەتىندە وتكەن بريفينگىدە وسىنداي دەرەك كەلتىردى، دەپ حابارلايدى قازاقپارات ءتىلشىسى.
«بۇگىنگى كۇنى بارلىق قىلمىستىق ىستەر بويىنشا 733 ادام قاماۋدا وتىر. سانيتارلىق نورما، تاماقتانۋ، ءدارى- دارمەكپەن قامتاماسىز ەتۋ جانە باسقالاردى قوسا العاندا ولارعا ءتيىستى جاعداي جاسالعان. قىلمىستىق پروتسەستە ازاماتتاردىڭ كونستيتۋتسيالىق قۇقىقتارىن ساقتاۋ - پروكۋراتۋرا ورگاندارى قىزمەتىندەگى باسىم باعىتتاردىڭ ءبىرى. كۇدىكتىلەرگە قانداي دا ءبىر قىسىم قولدانۋ فاكتىلەرىنە جول بەرمەس ءۇشىن پروكۋرورلار كۇندەلىكتى تەرگەۋ يزولياتورى مەن باسقا دا قىزمەتتىك عيماراتتاردى تەكسەرىپ ءجۇر»، - دەگەن باس پروكۋراتۋرا وكىلى الەۋمەتتىك جەلىدە جالعان اقپارات تاراتقانى ءۇشىن قىلمىستىق جاۋاپكەرشىلىك بار ەكەنىن ەسكەرتتى.
«قازىرگى ۋاقىتتا وسىنداي فاكتىلەر بويىنشا 11 قىلمىستىق ءىس تەرگەلۋدە»، - دەدى ەلدوس قيلىمجانوۆ.
اۆتور: ەسىمجان ناقتىباي