نيۋ- يورك قالاسىنىڭ 11 تۇرعىنىنان كوروناۆيرۋستىڭ جاڭا ءتۇرى انىقتالعان. شتات ۇكىمەتى ىندەتكە شالدىققاندارمەن بايلانىستا بولعان 1000 عا جۋىق ادامعا ۇيدەگى كارانتيندە وتىرۋعا كەڭەس بەردى.
سونداي- اق، نيۋ- يورك ماڭىندا ورنالاسقان ماۋنت- ۆەرنونداعى بارلىق مەكتەپتەر 9 - ناۋرىزعا دەيىن جابىلاتىنى تۋرالى حابارلاندى. قىزمەتكەرلەرىنىڭ بىرىنەن جاڭا كوروناۆيرۋس انىقتالعان Facebook كومپانياسى سيەتلدەگى كەڭسەسىن جاپتى.
بۇدان باسقا، بۇگىن تەحاس جانە نيۋ- دجەرسي شتاتتارىنىڭ بيلىگى كوروناۆيرۋسقا شالدىعۋدىڭ ءبىرىنشى وقيعالارىنىڭ تىركەلگەنىن راستادى. تەحاستا ىندەتكە شالدىققان ادام حيۋستون ماڭىنداعى فورت وكرۋگىندە انىقتالدى. 70 جاستاعى ەر ادام بۇعان دەيىن شەتەلگە بارىپ كەلگەن. قازىرگى كەزدە ول اۋرۋحانادا جاتىر.
نيۋ- دجەرسيدە كوروناۆيرۋس 30 جاستاعى ەر ادامنان انىقتالعان. 3 - ناۋرىز كۇنى ول بەرگەن وكرۋگىندە اۋرۋحاناعا جاتقىزىلدى.
قۇراما شتاتتار جاڭا كوروناۆيرۋستى جۇقتىرۋدىڭ 158 وقيعاسى تۋرالى حابارلادى. سونىڭ ىشىندە 48 ادام شەتەلگە بارىپ كەلگەن سوڭ اۋىردى: ءۇش ادام قىتايلىق ۋحانعا بارسا، 45 ادام جاپونيانىڭ Diamond Princess كرۋيزدىك لاينەرىنەن تۇسكەن. اۋرۋعا شالدىعۋدىڭ تاعى 110 وقيعاسى ەل اسپاعان ازاماتتاردان انىقتالدى.