الەمنىڭ 11 ەلىندەگى قانداستارعا قازاق ءتىلى كۋرستارىن ۇيىمداستىرۋ جوسپارلانۋدا
«ءتىل- قازىنا» ۇلتتىق عىلىمي- پراكتيكالىق ورتالىعىنىڭ باس ديرەكتورى الىبەك اسقاروۆ وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«حالقىمىزدىڭ ۇلى اقىنى اباي شىعارماشىلىعى ادامگەرشىلىك جانە ىزگىلىك تۋرالى يدەيالارعا تولى ەكەنى بەلگىلى. گۋمانيست اقىننىڭ ويلارى ءوز حالقىنىڭ رۋحانياتىن بايىتىپ قانا قويماي، بۇكىلالەمدىك اقىل-وي قازىناسىنا دا ۇلەس قوستى»، - دەدى الىبەك اسقاروۆ قازاقپارات تىلشىسىنە.
ول ءوز سوزىندە «ءتىل- قازىنا» ۇلتتىق ورتالىعى - بۇل ەلىمىزدەگى قازاق ءتىلىن وقىتۋ، ۇيرەتۋ مەن لاتىن گرافيكاسىنا كەزەڭ- كەزەڭىمەن كوشىرۋدىڭ عىلىمي- ۇيىمداستىرۋشىلىق مىندەتتەرىن ىسكە اسىراتىن رەسپۋبليكالىق ورتالىق مەكەمە ەكەنىن ەسكە سالىپ ءوتتى.
«وزدەرىڭىزگە بەلگىلى، قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ 2017 -جىلعى 26-قازانداعى «قازاق ءالىپبيىن كيريلليتسادان لاتىن گرافيكاسىنا كوشىرۋ تۋرالى» №569 -جارلىعىنا سايكەس، قازاق ءالىپبيىن لاتىن گرافيكاسىنا كوشىرۋ جۇمىستارى باستالىپ كەتتى. سونىمەن قاتار، قازاق ءتىلىنىڭ جاھاندانۋ ۇدەرىسىندەگى ومىرشەڭدىگىن قامتاماسىز ەتۋ ءۇشىن ءتىلدىڭ الەۋەتىن ۇزبەي، جەتىلدىرىپ وتىرۋ دا ماڭىزدى. بۇل رەتتە، قازاق ءتىلىن وقىتۋ ادىستەمەلەرىن جۇيەلەۋ، ستاندارتتاۋ، وقۋ-ادىستەمەلىك قۇرالدارىن ازىرلەۋ جۇمىستارى نەگىزگى ورىنعا يە. 2020 -جىلى مەملەكەتتىك تاپسىرما اياسىندا «ءتىل-قازىنا» ۇلتتىق ورتالىعى «اباي ينستيتۋتى» اتتى قازاقستاندا جانە شەتەلدە قازاق ءتىلىن ۇيرەتۋ جانە ىلگەرىلەتۋ باعدارلاماسىن ىسكە اسىرۋدى جوسپارلاپ وتىر. باعدارلاما اياسىندا الەمنىڭ 11 ەلىندەگى قانداستارىمىزعا قازاق ءتىلىن مەڭگەرۋ، ۇيرەنۋ كۋرستارىن ۇيىمداستىرساق دەگەن ويدامىز. ەرەكشە ادىستەمەمەن وتەتىن قازاق ءتىلىنىڭ كۋرستارى رەسەيدەگى، قىتاي مەن موڭعولياداعى، تۇركيا مەن تاجىكستان، تۇرىكمەنستان، يران، ۋكراينا، ا ق ش ەلدەرىندەگى قانداستارىمىز قازاقتىڭ ايتۋلى اقىندارى مەن جازۋشىلارىنىڭ ەڭبەكتەرى ارقىلى انا تىلدەرىن تەرەڭىرەك بىلۋلەرىنە، مەڭگەرۋلەرىنە ىقپال ەتەدى. ۇلى اقىن اباي شىعارمالارى وسى كۋرستاردا دا وتكىزىلەتىن بولادى»، - دەيدى ول.
الىبەك اسقاروۆ مەملەكەت باسشىسى قاسىم-جومارت توقايەۆتىڭ «اباي جانە ХХІ عاسىرداعى قازاقستان» ماقالاسى - اباي قازاق حالقى ءۇشىن ۇرپاقتان ۇرپاققا جالعاساتىن ۇلتتىق بولمىسىمىزدىڭ ۇلگىسى بولىپ قالا بەرەتىن تۇلعا ەكەنىن ايعاقتايتىنىن جەتكىزدى.
ەسكە سالا كەتسەك، «Egemen Qazaqstan» گازەتىنىڭ بۇگىنگى سانىندا ق ر پرەزيدەنتى قاسىم-جومارت توقايەۆتىڭ «اباي جانە ХХІ عاسىرداعى قازاقستان» اتتى ماقالاسى جاريالانعان بولاتىن.
اۆتور: ايان بەكەن ۇلى