ازاماتتىڭ مەديتسينا سالاسىنا، قىزمەتتىڭ وسى تۇرىنە دەگەن قىزىعۋشىلىعى باسىنان وتكەن وقيعادان كەيىن ويانعان، دەپ جازادى Stan.kz اقپارات اگەنتتىگى.
ارمان قاسىموۆتىڭ نەگىزگى ماماندىعى - قارجىگەر. ول مۇناي سالاسىندا ۆاحتالىق ادىسپەن جۇمىس ىستەيدى: ءبىر اي قىزمەتتە بولسا، ءبىر اي دەمالىستا. ءبىراق، 2008 -جىلدان باستاپ قازاقستاندىق جىگىت دەمالىسقا ارنالعان ءاربىر ايىن جەدەل جاردەمدە جۇمىس ىستەۋگە ارنايدى. ارمان قاسىموۆ وسىدان 11 جىل بۇرىن ەرىكتىنىڭ قىزمەتىنە كىرىسكەندە بار بولعانى 18 جاستا ەدى.
«نەلىكتەن باسقا سالادا ەمەس، جەدەل جاردەمدە ەرىكتى بولىپ ىستەيسىز؟» - دەگەن سۇراققا ارمان قاسىموۆ بۇل ويدىڭ ءبىر وقيعادان تۋعانىن ايتىپ جاۋاپ بەردى.
«ەلىم ءۇشىن مەن نە ىستەدىم؟» - دەپ ءجۇز ويلانعان قاسىموۆ، قازاقستانعا ەڭبەگى سىڭگەن ازامات اتانۋدى كوزدەگەن ەكەن. الايدا، ۋاقىت وتە كەلە قازاقستاندىق جىگىت ويى مەن ماقساتىن ۇمىتىپ، كۇيبەڭ تىرشىلىكتىڭ سوڭىندا كەتەدى.
كۇندەردىڭ ءبىر كۇنىندە اپاسى اۋىرىپ قالعاندا ول ءبىر ەمەس، بىرنەشە ساعاتتان كەيىن كەلگەن دارىگەرلەرگە قاتتى تاڭعالادى. اق حالاتتىلار ونىڭ: «قايدا جۇرسىزدەر؟» - دەگەن سۇراعىنا جاتتاپ العاندارىن ايتىپ بەرگەن. ەرتەسى كۇنى ازامات جەدەل جاردەمنىڭ باس دارىگەرىمەن كەزدەسىپ، ارىپتەستەرىنىڭ نەلىكتەن باياۋ جۇمىس ىستەيتىنىن سۇرايدى. ءوز كەزەگىندە باس دارىگەر مۇنى مامانداردىڭ جەتىسپەيتىندىگىمەن تۇسىندەردى.
«مەن وعان جەدەل جاردەمشىلەر ىستەيتىن دۇنيەلەردى جاساي الاتىنىمدى ايتتىم. جۋىپ، تازالاپ، ءبىر نارسەنى جيناعاندا تۇرعان نە بار؟ ءبارىن بوس ۋاقىتىمدا ءوزىم جاسايمىن، دەپ ەدىم. باس دارىگەر جالاقىنىڭ بولمايتىنىن ايتتى. ال مەن وعان اقشانىڭ كەرەك ەمەستىگىن، ءوز جالاقىمنىڭ بار ەكەنىن، ءبىر اي جۇمىس ىستەپ، ءبىر اي دەمالاتىنىمدى ءتۇسىندىردىم. مەنىڭ ۇ ق ك وكىلى ەمەس ەكەنىمدى تۇسىنگەن دارىگەر، كەلىسىمىن بەردى»، - دەيدى ەرىكتى ب ا ق-قا بەرگەن سۇحباتتارىندا.
ون جىلدان استام ۋاقىت بويى يگى ىسپەن اينالىسىپ جۇرگەن ازامات دارىگەرلەر مەن ادامدارعا كومەگىن بۇلداماي ەڭبەكتەنىپ كەلەدى. تۋىسقاندارى مەن جاقىندارى ونىڭ بۇل باستاماسىن قولدامايدى.
قاسىموۆتىڭ ءوز ەركىمەن اتقاراتىن جۇمىسى توزىمدىلىكتى، سابىرلىقتى، جىلدامدىقتى تالاپ ەتەدى.
العاشقى كەزدە قاسىموۆتىڭ مىندەتتەرىنە: بريگاداعا شىقپاي تۇرىپ، ءتىزىم بويىنشا بارلىق قۇرال- سايمانداردىڭ بار- جوعىن مۇقيات تەكسەرۋ، ادامدى جاتقىزۋ ءۇشىن كولىكتەن زەمبەلدى الىپ كەلۋ، كولىكتى تازالاۋ كىرەتىن. قازىرگى ۋاقىتتا ارمان سانيتار جانە مەيىرگەر دارەجەسىن يەلەنگەن.
ارمان قاسىموۆ الەۋمەتتىك جەلىدە ءوز قىزمەتى تۋرالى جازبا قالدىرىپ، 300 ادامنىڭ جەدەل جاردەم قىزمەتىنىڭ ەرىكتىسى اتانۋىنا تۇرتكى بولدى.
ەرىكتى قاسىموۆ - جالپىۇلتتىق Birgemiz: Salyq جوباسىنىڭ امباسسادورى. ول جەتكەن جەتىستىگىمەن توقتالىپ قالۋدى كوزدەمەيدى. قاسىموۆ مەديتسينالىق ءبىلىم بەرۋ مەكەمەسىنە وقۋعا ءتۇسىپ، جاقىن ارادا دارىگەر اتانباق.