ءتارتىپ ساقشىلارىنىڭ ايتۋىنشا، 11 جاسار كيريلل كنيازيەۆتىڭ تۋىستارى پوليتسياعا دەر كەزىندە حابارلاسقانىنىڭ ارقاسىندا بالا امان قالعان. قازىرگى تاڭدا جاس ءوسپىرىم ءدىن امان، تۋعان تۋىستارىنىڭ جانىندا.
نان اكەلۋگە كەتكەن بالاسى ۇيگە ورالماعان سوڭ كيريللدىڭ اناسى ءبىرىنشى بولىپ ۋايىمداي باستاعان. تۋىستارى بالانىڭ زاتتارى مەن جاڭا ساتىپ العان ازىق-تۇلىكتى قاراتال وزەنىنىڭ ۇستىنەن وتەتىن كوپىردىڭ جانىنان تاۋىپ العان. وقيعا ورنىنا شاقىرتىلعان پوليتسەيلەر بىردەن ىزدەۋ شارالارىنا كىرىسكەن. بالا وزەننىڭ ورتاسىنان تابىلدى، كۇشتى اعىس ونى جاعادان الىسقا الىپ كەتكەن.
«ءبىزدىڭ پاترۋلدىك قىزمەتكەرلەرىمىز ايدار قارابالانوۆ، رۋسلان تەزەكبايەۆ پەن جەدەل ارەكەت ەتۋ ارنايى جاساعىنىڭ قىزمەتكەرى نۇربول مەعزام كۇشتى اعىسقا قاراماستان، ەكى شاقىرىم جەردەگى كەلەسى كوپىردىڭ ماڭىندا باتىپ بارا جاتقان بالانى سۋدان شىعارىپ الدى»، - دەپ حابارلادى الماتى وبلىسى پوليتسيا دەپارتامەنتىنىڭ باسپا ءسوز قىزمەتىنەن.
ءوز كەزەگىندە كيريللدىڭ تۋىستارى پوليتسيا قىزمەتكەرلەرىنە ريزاشىلىقتارىن ءبىلدىردى.
اۆتورى حاسان ەسپانوۆ