وتكەن جىلدىڭ جاۋاپسىز قالعان 11 ساۋالى - فوتو
الەمدىك ب ا ق 2015 -جىلدىڭ قورىتىندىلارىن ءالى تولىق شىعارىپ بىتكەن جوق.
وتكەن جىلعا قاتىستى دەرەكتەردىڭ ىشىندە جاۋاپسىز قالعان ءبىرقاتار سۇراقتار دا بار. mashable.com سونداي جاۋاپسىز ساۋالداردىڭ قاتارىنا قازاقستانعا قاتىستى ەكى ماسەلەنى قوسىپتى. 2014 -جىلى شەتەلدىك ساراپشىلار تەك كالاچي اۋىلىنداعى «ۇيقى دەرتىن» عانا قۇپياسى اشىلماعان جاعدايلاردىڭ قاتارىنا قوسقان ەدى.
سايت «2015 -جىلدىڭ سىرى اشىلماعان 11 قۇپياسى» دەپ اتالاتىن ماتەريال جاريالانعان. وندا وتكەن جىلى ءبىراز تالقىلانعان، ءبىراق ناقتى جاۋاپتارى تابىلماعان ساۋالدار جيناقتالىپتى. جاۋاپسىز قالعان ساۋالداردىڭ ىشىندە وتكەن جىلدىڭ كوكتەمىندە قازاق دالاسىندا قىرىلعان كيىكتەر مەن تورعايداعى گەوگليفتەر تۋرالى ايتىلىپتى.
دەگەنمەن، سايتتاعى «جاۋاپسىز ساۋالدارعا» كەڭىرەك توقتالار بولساق، ءبىرىنشى كەزەكتە اۆتورلار وتكەن جىلدىڭ قاڭتار ايىندا پاريجدە بولعان تەراكتلەرگە توقتالعان. سول كەزدە Charlie Hebdo جۋرنالىنىڭ رەداكسياسىنا جانە ەۆرەيلەر دۇكەنى مەن پوليتسيا قىزمەتكەرلەرىنە شابۋىل جاسالعان بولاتىن. وسى تەراكتلەر كەزىندە كۇدىكتىلەردىڭ ءبىرى رەتىندە قاراستىرىلعان حايات بۋمەدەن ءالى كۇنگە ۇستالعان جوق. قاڭتاردان بەرى ول ءىزىم- عايىم بولىپ كەتكەن. mashable.com اۆتورلارى ءبىر جىلدىڭ ىشىندە بۇل ادام تۋرالى بىردە-ءبىر اقپارات شىقپاعانىنا تاڭ قالعان.
سونىمەن قاتار، سايت مامىر ايىندا قازاقستاندا قىرىلعان كيىكتەرگە قاتىستى دا اقپارات بەرگەن. سول كەزدە جارتى ايدىڭ ىشىندە 120 مىڭعا جۋىق اقبوكەن قىرىلعان ەدى. ماماندار جانۋارلاردىڭ بۇلاي جاپپاي قىرىلۋىنىڭ سەبەبى رەتىندە ءبىرقاتار اۋرۋلار مەن باكتەريالاردى اتاسا دا، ناقتى سەبەپ تولىق انىقتالماعانىن العا تارتقان.
قۇپياسى كوپ وقيعالاردىڭ ءبىرى رەتىندە سايت مەكسيكاداعى تۇرمەدەن ەسىرتكى بارونىنىڭ قاشىپ كەتۋىن اتاعان. «ەل-چاپو» دەگەن لاقاپ اتى بار قىلمىسكەر حواكين گۋسمان شىلدە ايىندا مەكسيكاداعى قاتاڭ رەجيمدەگى تۇرمەدەن قاشىپ كەتكەن ەدى. تۇرمەنىڭ گۋسمان وتىرعان بولمەسىنىڭ استىنان 1,5 شاقىرىمدىق توننەل تابىلعان. ەسىرتكى باروننىڭ قازىر قايدا جۇرگەنىن ەشكىم بىلمەيدى. ارنايى قىزمەت وكىلدەرى دە ونى تابا الماي ءجۇر.
2015 -جىلدىڭ سوڭعى ءۇش ايىندا جاپونيا ارالدارىنىڭ ماڭىنان تابىلىپ جاتقان ەسكى كەمەلەردىڭ تاريحى دا جۇرتتى تاڭ قالدىرىپ كەلەدى. 2013 -جىلى جاپونيا جاعالاۋلارىنان 80، 2014 -جىلى 65، 2015 -جىلى 30 اعاشتان جاسالعان كەمە تابىلعان. بۇل كەمەلەردىڭ بارلىعىنان دەرلىك ادام قاڭقالارى تابىلدى. كەمەلەردىڭ سولتۇستىك كورەيادان كەلگەندىگى ايتىلىپ ءجۇر، ءبىراق ناقتى دالەل جوق.
ايتپاقشى، اتاقتى «تاقتار ويىنى» سەريالى كەيىپكەرلەرىنىڭ ءبىرى جون سنوۋدىڭ تاعدىرى 2015 -جىلى الەمدە كوپ تالقىلانعان ەكەن. mashable.com سايتى جون سنوۋدىڭ ءتىرى نەمەسە ءولى ەكەندىگىن سەريال كورەرمەندەرى بىلە الماي وتىرعانىن جازادى. ءتىپتى، جون سنوۋدىڭ ءرولىن ويناعان كيت حاررينگتوننىڭ «سەريالدىڭ كەلەسى ماۋسىمىنا قاتىسپايمىن. جون سنوۋدىڭ ولگەندىگى ايتىلدى. مەن ءولدىم. سىزدەرگە ايتارىم وسى»، - دەگەن مالىمدەمە جاساعانىنا قاراماستان كەيىپكەردى سەريالدىڭ كەلەسى ماۋسىمىندا كورگىسى كەلەتىندەر كوپ. جۇرت جون سنوۋعا قاتىستى ساۋالعا ناقتى جاۋاپ بەرىلمەگەندىگىنە سەنىپ ءجۇر. دەگەنمەن، بۇل ساۋالعا جاۋاپ ءساۋىر ايىندا تابىلارى انىق. ويتكەنى، سەريالدىڭ جاڭا ماۋسىمى سول كەزدە كورسەتىلەدى.
ال، پاريجدە 13 -قاراشا كۇنى بولعان تەراكتىنى ۇيىمداستىرۋشى رەتىندە اتالعان سالاح ابدەسلام ءالى كۇنگە ۇستالعان جوق. ول سەريال كەيىپكەرى ەمەس، ءبىراق، ونى ارنايى قىزمەت ماماندارى ۇستاماق تۇگىلى، قايدا جۇرگەنىنەن دە حابارسىز ەكەن. تەك ونىڭ سيرياعا قاشىپ كەتكەنى تۋرالى قاۋەسەت قانا بار.
2014 -جىلى اۋعانستانداعى تاليبتەردىڭ قولىندا 5 -جىل بويى تۇتقىندا بولعان بوۋي بەرگدالدى ا ق ش بيلىگى گۋانتاناموداعى 5 تۇتقىنعا ايىرباستاعان بولاتىن. بۇل امەريكالىقتاردىڭ اراسىندا قىزۋ پىكىرتالاس تۋدىرعان- دى. سارباز ەلىنە ورالعان سوڭ ول تۋرالى بىردە-ءبىر اقپارات شىقپاعان. الەۋمەتتىك جەلىلەردىڭ قولدانۋشىلارى ءقازىر ساربازدىڭ تاعدىرىنىڭ قالاي بولعاندىعىنا الاڭدايتىن كورىنەدى. ونىڭ ا ق ش تۇرمەلەرىنىڭ بىرىندە قاماۋدا جاتقانى تۋرالى عانا سىبىس بار.
وتكەن قازان ايىندا NASA- نىڭ Cassini عارىش اپپاراتى ساتۋرننىڭ سەرىگى ەنكەلادۋستا مۇحيت بار ەكەندىگى تۋرالى اقپارات جىبەرىپتى. ءقازىر بەتىن مۇز باسقان مۇحيتتا تىرشىلىك بار ما، جوق پا دەگەن تاقىرىپ 2015 -جىلى ناقتى جاۋاپ بەرىلمەگەن ساۋالداردىڭ قاتارىنا كىرگەن. عالىمدار ەنكەلادۋستا مۇحيتتىڭ بار ەكەندىگىنە كۇمانسىز سەنىپ وتىر. وعان دالەل جەتكىلىكتى كورىنەدى.
سايت 2015 -جىلى ناقتى جاۋابى تابىلماعان ساۋالداردىڭ قاتارىنا تورعاي گەوگليفتەرىنىڭ قانداي ماقساتپەن جاسالعاندىعىن ادامزاتتىڭ ءالى كۇنگە بىلە الماي وتىرعاندىعىن قوسىپتى. 700 شاقىرىم بيىكتىكتەن تۇسىرىلگەن گەوگليفتەردىڭ فوتولارى عالىمداردىڭ نازارىن اۋدارعان بولاتىن. العاش رەت 2007 -جىلى تابىلعان 300 گە جۋىق گەومەتريالىق فيگۋرالاردىڭ اراسىندا سۆاستيكا، ايشىق، شەڭبەر تۇرىندەگى كوپتەگەن بەينەلەر بار. ولار شامامەن 8 مىڭ جىل بۇرىن جاسالعان كورىنەدى. ءبىراق، گەوگليفتەردىڭ سىرى ءالى شەشىلگەن جوق.
2014 -جىلى جوعالىپ كەتكەن مالايزيانىڭ MH370 ۇشاعى تۋرالى دا دەرەك از قازىر. ۇشاقتىڭ ناقتى قاي وڭىرگە قۇلاعانى بەلگىسىز. تىنىق مۇحيتىنان تابىلعان كەيبىر بولشەكتەر MH370 ۇشاعىنا تيەسەلى دەلىنگەنىمەن، ناقتى ايعاق جوق. ادامداردىڭ دەنەسى دە تابىلمادى. دەمەك، بۇل ۇشاققا قاتىستى ساۋالدارعا دا ناقتى جاۋاپ تابىلمادى.
2015 -جىلى NASA ماماندارى ءۇندى مۇحيتىنا قۇلاعان WT1190F جەر سەرىگىنىڭ كورىنىستەرىن جاريالاعان. الايدا، الەۋمەتتىك جەلىلەردى پايدالانۋشىلار مۇحيتقا قۇلاعان زاتتىڭ جەر سەرىگىنەن الدەقايدا ۇلكەن ەكەندىگىن العا تارتتى. ويتكەنى، فوتولار مەن ۆيدەولاردا عارىشتىق قوقسىتىڭ كولەمى ۇلكەن ەكەندىگىن كورىنىپ تۇر. ءبىراق، NASA ماماندارى بلوگگەرلەردىڭ ساۋالدارىنا بىردە- ءبىر رەت جاۋاپ بەرمەدى. سوندىقتان، mashable.com سايتى ءۇندى مۇحيتىنا قۇلاعان زاتتىڭ سىرى اشىلماعانىن جازدى.
Kaznews.kaztrk.kz