قازاقستان وڭىرلەرىنەن تۇركياعا 115 توننا گۋمانيتارلىق كومەك، 35 ميلليون تەڭگە قاراجات جينالدى
اقپارات جانە قوعامدىق دامۋ مينيسترلىگىنىڭ مالىمەتىنشە، ەلىمىزدىڭ بارلىق وڭىرلەرىندە قاجەتتى زاتتاردى قابىلداۋ جانە سۇرىپتاۋ پۋنكتەرى ۇيىمداستىرىلعان. بەلسەندى ازاماتتار، ۆولونتەرلەر كومەك ەسەبىن جۇرگىزەدى، بارلىق جينالعان زاتتاردى سۇرىپتايدى، ورايدى.
جينالعان ماتەريالدار اۆتوكولىكپەن تۇركيا رەسپۋبليكاسىنىڭ ەلشىلىكتەرى مەن كونسۋلدىقتارىنا جەتكىزىلەدى.
«13- اقپانداعى جاعداي بويىنشا وڭىرلەردە 115 توننا گۋمانيتارلىق كومەك جينالدى (الماتى قالاسى - 4 توننا، الماتى وبلىسى - 68 توننا، تۇركىستان وبلىسى - 25 توننا، شىمكەنت - 50 توننا، اقمولا، باتىس قازاقستان، قاراعاندى، پاۆلودار، سولتۇستىك قازاقستان، شىعىس قازاقستان، ۇلىتاۋ وبلىستارى - 3 توننا)، ونىڭ 75 تونناسى (تۇركىستان وبلىسى جانە شىمكەنت قالاسى) تۇركياعا جىبەرىلدى، سونداي-اق 32 ميلليون تەڭگە جينالىپ، تىكەلەي Afad قورىنا اۋدارىلدى»، - دەپ جازدى مينيسترلىكتەن.
بۇعان قوسا، قازاقستاندىقتار 114 ۇلتتىق كيىز ءۇي جونەلتتى. جالپى، حالىق جۇمىلا كوتەرىلۋدە، بلوگەرلەر، كاسىپكەرلەر، ۆولونتەرلەر مەن قوعام قايراتكەرلەرى، جۋرناليستەر مەن جاي عانا بەلسەندى ازاماتتار ءوز ۇلەستەرىن قوسۋدا.
«ماسەلەن، جاس كاسىپكەر ءارى بلوگەر اسحات نۇرلىبايەۆ پەن ايدوس شايحيسلام Instagram پاراقشالارىندا كومەك ۇيىمداستىرۋ بويىنشا بەلسەندىلىك تانىتسا، جامبىل وبلىسىندا ۆولونتەرلەر 17 فۋرا كومەك جيناپ، الماتى كونسۋلدىعىنا جىبەرۋدى جوسپارلاۋدا.
ءوز كەزەگىدە ۇلتتىق ۆولونتەلەر جەلىسى مەن قازاقستانداعى قىزىل جارتى-اي قوعامى ايتارلىقتاي جۇمىستار ۇيىمداستىرۋدا. ۆولونتەرلەر كومەك كورسەتۋ بويىنشا جۇمىستىڭ ءبىرىنشى كەزەڭىن اياقتاپ قالدى»، - دەلىنگەن حابارلامادا.
بارلىق جۇمىستار قازاقستانداعى تۇرىك رەسپۋبليكاسىنىڭ ەلشىلىگىمەن بىرلەسىپ جۇرگىزىلۋدە.