قىتايلىق قانداسىمىز 114 كۇن بويى تاماق ىشپەي 5 مىڭ شاقىرىم جاياۋ ءجۇردى
ول وسى ارالىقتى تاماق ىشپەي، تەك سۋمەن عانا ءنار الىپ ءجۇرىپ ءوتتى، دەپ حابارلايدى قازاقپارات ءتىلشىسى.
8 -مامىر كۇنى جولعا شىققان سەرىك زەينەل ۇلى بۇل الىس ساپار بارىسىن اۋزىنا ءبىر ءتۇيىر دە نان سالماي، تەك سۋ ءىشىپ قانا ءجۇرىپ ءوتۋدى ماقسات ەتكەن. ايتا كەتەرلىگى، مارافونشىنىڭ تاماق ىشپەگەنىن دالەلدەۋ ءۇشىن بويىنا ارنايى اپپارات تاعىلىپ، كامەرا ورناتىلعان. دەنساۋلىعىن قاداعالاپ وتىرۋ ءۇشىن ءىنىسى ارنايى كوماندا جاساقتاعان.
ول العاشقى 29 كۇندە 1019 كيلومەتر جول باسىپ، الەمدىك رەكورد سەرتيفيكات اگەنتتىگىنىڭ (World Record Certification Agency) « تاماق ىشپەي ەڭ ۇزاق جاياۋ جۇرگەن سپورتشى» دەگەن سەرتيفيكاتىن ەنشىلەدى (Farthest distance walked while fasting).
مۇنىمەن توقتاماعان سەرىك زەينەل ۇلى تاماق ىشپەستەن تاعى 4 مىڭعا جۋىق شاقىرىمدى ارتقا تاستاپ، بۇگىن شاڭحاي قالاسىنا ات باسىن تىرەدى.
3 ايدان استام اسقازانىنا ءدام سالماعان قانداسىمىز بۇگىننەن باستاپ تاماقتانۋدى باستايدى دەپ وتىر. بۇل تۋرالى ول «Tiк-Tok» الەۋمەتتىك جەلىسىندە تىكەلەي ەفيردە ءمالىم ەتتى.
«مەنى قولداپ قۋاتتاعان بارلىقتارىڭىزعا كوپ راحمەت! قازىر مەنىڭ دەنساۋلىعىم ەرەكشە جاقسى. «باتالى قۇل ارىماس، باتاسىز قۇل جارىماس» دەيدى. مەن اتتانعاننان بەرى الەۋمەتتىك جەلىلەردە قانشاما اتا-اپالارىمىز، ءتىپتى كىشكەنتاي بالالار تىلەۋىمدى تىلەپ، باتاسىن بەرىپ جاتتى. العاش ساپارعا اتتاناردا جەرگىلىكتى مەملەكەتتىك ورگاندارعا جوسپارىمىزدى ايتتىق. الايدا ولار تاماق ىشپەي بۇلاي ۇزاق ءجۇرۋ ادام ومىرىنە ەرەكشە قاۋىپتى ەكەنىن ايتىپ، ءبىزدى قولداماعان ەدى. ايتسە دە، ءبىز ءوز كوماندامىزدى جاساقتاپ، جولعا اتتانىپ كەتتىك. باستى ماقساتىم - ادام بالاسىنىڭ ەرەكشە مۇمكىندىگىن دالەلدەۋ، قاتاڭ تالاپ قويىپ، ءوزىن جەڭە بىلگەن ادامنىڭ المايتىن بيىگى جوق ەكەنىن بۇكىل الەمگە پاش ەتۋ»، - دەيدى سپورتشى.
سەرىك زەينەل ۇلى 1980 -جىلى شىنجاڭنىڭ ىلە-قازاق اۆتونوميالى وبلىسىنىڭ تۋماسى. جاس كەزىندە سپورتپەن اينالىسقان. قازىر جەكە كاسىپكەر.
اۆتور: ريزابەك نۇسىپبەك ۇلى