1,1 ميلليون گەكتار اۋماق شەگىرتكە زيانكەستەرىنە قارسى وڭدەلدى
استانا. KAZINFORM - اۋىل شارۋاشىلىعى ءمينيسترى ايداربەك ساپاروۆ جۇمىس ساپارىمەن قوستاناي وبلىسىندا باردى.
13-ماۋسىمدا باسقارما باسشىسى اتالعان ايماقتاعى جاعدايمەن جەكە تانىسىپ، اۋماقتارداعى حيميالىق وڭدەۋ جۇمىستارىنىڭ بارىسى مەن ساپاسىن تەكسەرۋ ءۇشىن وڭىرلەردى ارالاپ ءجۇر.
ايتا كەتەيىك، قوستاناي وبلىسى اقتوبە جانە تۇركىستان وبلىستارىمەن بىرگە بيىل شەگىرتكەنىڭ ەڭ كوپ تارالۋى بولجاناتىن وڭىرلەردىڭ قاتارىنا ەنگەن. جالپى، مۇندا 775,6 مىڭ گەكتار اۋماقتا جۇمىس جۇرگىزۋ جوسپارلانىپ وتىر. بۇگىنگى تاڭدا 57 ارنايى تەحنيكانىڭ كومەگىمەن 120 مىڭ گەكتاردان استام القاپ وڭدەلدى. اۋا رايىنىڭ قولايسىزدىعىنا بايلانىستى ارقالىق قالاسىندا، امانگەلدى، جانگەلدى، قامىستى جانە ناۋىرزىم اۋداندارىندا كەشكى جانە تاڭعى ۋاقىتتا حيميالىق وڭدەۋ جۇمىستارى جۇرگىزىلىپ جاتىر. سونىمەن قاتار 500 گە جۋىق ادام، ونىڭ ىشىندە فيتوسانيتارلىق دياگنوستيكا ورتالىعىنىڭ 129 ساراپشىسى قامتىلعان مونيتورينگتىك ءىس-شارالار جالعاسۋدا. ماماندار 339 مىڭ گەكتار جەردى زەرتتەدى.
مينيستر امانگەلدى اۋدانى، ارقالىق قالاسىنداعى بىرنەشە شارۋا قوجالىقتارىن، ەگىس جۇمىستارى جالعاسىپ جاتقان القاپتاردى ارالاپ كوردى، شارۋا قوجالىقتارىنىڭ باسشىلارىمەن جانە مەردىگەرلەرمەن كەزدەستى.
«قازاقستان رەسپۋبليكاسى ۇكىمەتىنىڭ قولداۋىمەن شەگىرتكە زيانكەستەرىمەن كۇرەس بەلسەندى جالعاسىپ جاتىر. بۇل ماسەلە پرەمەر-ءمينيستردىڭ ەرەكشە باقىلاۋىندا. ءبىزدىڭ الدىمىزدا شەگىرتكە زيانكەستەرىمەن كۇرەستى ءتيىمدى ۇيىمداستىرۋ مىندەتى تۇر. قاجەتتى كولەمدە ءدارى- دارمەك ساتىپ الۋ جانە جۇمىستى باستاۋ بويىنشا دەر كەزىندە قابىلدانعان شارالاردىڭ ناتيجەسىندە جوسپارلانعان 2,5 ميلليون گەكتار زالالسىزداندىرۋ الاڭىنىڭ 1,1 ميلليون گەكتاردان استامى وڭدەلدى. تەحنيكا جەتكىلىكتى، وڭىرلەر ءدارى-دارمەكپەن قامتاماسىز ەتىلگەن. بارلىق وڭدەۋ جۇمىسى جوسپارعا ساي جۇرگىزىلۋدە»، - دەدى ايداربەك ساپاروۆ.
بۇعان دەيىن حابارلانعانىنداي، اقتوبەدە شەگىرتكەنىڭ جاپپاي كوبەيۋى تىركەلدى. ارىستى دا شەگىرتكە باسىپ جاتىر. بۇل جاندىك تۇركىستان وبلىسىنىڭ شارۋالارىن ابىگەرگە سالدى. سونداي- اق پرەمەر- ءمينيستردىڭ ورىنباسارى سەرىك جۇمانعارين ەلگە شەگىرتكە قاپتاتىپ العانىمىزدى جاسىرمايتىنىمىزدى ايتتى.
«رەسپۋبليكالىق فيتوسانيتاريالىق دياگنوستيكا جانە بولجامدار ادىستەمەلىك ورتالىعى» اقتوبە وبلىستىق فيليالىنىڭ باسشىسى گاريفۋللا جولايەۆتىڭ ايتۋىنشا، شەگىرتكەنىڭ شىعۋى 10-12 جىل سايىن قايتالانىپ تۇرادى. 2023 -جىلدان باستاپ كوتەرىلىپ، بيىل شارىقتاۋ شەگىنە كەلىپ جەتتى. ونىڭ الدىندا 2013-2014 -جىلدارى تىركەلگەن.
«يتاليالىق پرۋس جاندىگىنىڭ وتانى - ىرعىز، شالقار، ايتەكە بي اۋداندارىنداعى قۇماقتار. شالقاردىڭ ۇلى بورسىق قۇمى، كىشى بورسىق قۇمى، ىرعىزدىڭ ايىر قىزىل قۇمى، ايتەكە بي اۋدانىنىڭ مامىت قۇمىنان ۇشىپ شىعىپ، تارايدى. ال بىزدە قۇمعا كىرىپ، مونيتورينگ جاساۋدىڭ مۇمكىندىگى جوق. قۇم ىشىندە ءبىزدىڭ تەحنيكا جۇرمەيدى. ءارى قۇمدى اۋماقتىڭ اۋدانى ۇلكەن، بىرنەشە شاقىرىمعا سوزىلىپ جاتىر. وكىنىشكە قاراي قانشالىقتى ۇشىپ وتكەنىن، قانشالىقتى كوپ جۇمىرتقا سالعانىن بىلە المايمىز. جىلدا وسى ماسەلەنى، قۇمنىڭ ءىشىن باقىلاۋ جايىن كوتەرەمىز. قازىر درونمەن ۋلاۋعا دا مۇمكىندىك بار ەكەن. ەگەر سول ىسكە اسىپ، وڭ جولعا قويىلسا، وسىنى پايدالانۋعا بولادى. ازىرگە جوبا عانا. دروننىڭ ءوزى 8 شاقىرىمعا عانا ۇشا الادى، ال قۇمنىڭ اۋماعى بىرنەشە شاقىرىمعا سوزىلعان. ەگەر دەر كەزىندە شارا قولدانباساق، ۇشىپ شىعادى. قازىر بار مۇمكىندىكتى پايدالانىپ، ۋلاۋ جۇمىسىن جۇرگىزىپ جاتىر»، - دەيدى مامان.