بۇگىن ق ر پرەزيدەنتى جانىنداعى ستراتەگيالىق زەرتتەۋلەر ينستيتۋتى جۇرگىزگەن ساۋالنامانىڭ قورىتىندىسى جاريالاندى.
«ەلىمىزدە كىتاپتىڭ بارشاعا قولجەتىمدى بولۋى ءۇشىن بارلىق ءارتۇرلى مۇمكىندىكتەر ۇسىنىلعان. وكىنىشكە قاراي، ساۋالناماعا قاتىسقان ءاربىر ەكىنشى رەسپوندەنت كىتاپ وقىمايدى. قازاقستاننىڭ ءار جيىرماسىنشى ازاماتى عانا كۇن سايىن قاعاز كىتاپپەن ۋاقىت وتكىزەدى. ال ءار ونىنشى رەسپوندەنت اپتاسىنا بىرنەشە كىتاپ وقيدى»، - دەپ جازادى ينستيتۋت ماماندارى.
ساۋالناماعا قاتىسقانداردىڭ 5,3 پايىزى كۇن سايىن قاعاز كىتاپ وقيتىنىن ايتسا، 6,4 پايىزى ەلەكتروندى كىتاپ وقيتىنىن ايتىپ جاۋاپ بەرگەن. 11,1 پايىزى اپتاسىنا بىرنەشە رەت قاعاز كىتاپ وقىسا، 8,4 پايىزى ەلەكتروندى كىتاپقا جۇگىنەتىنىن كورسەتكەن. جاۋاپ بەرۋشىلەردىڭ 9,3 پايىزى اپتاسىنا ءبىر-اق رەت قاعاز كىتاپ وقيتىنىن ايتسا، 9,8 پايىزى ەلەكتروندى كىتاپقا سونشا ۋاقىت جۇمسايتىنىن ايتقان.
رەسپوندەنتتەردىڭ 21,7 پايىزى ايىنا ءبىر رەت قاعاز كىتاپقا باس قويسا، 10,2 پايىزى ەلەكتروندى كىتاپتى ايىن ءبىر رەت وقيتىنىن اتاپ كورسەتكەن. ەڭ وكىنىشتىسى، ساۋالناماعا قاتىسقانداردىڭ 52,6 پايىزى ەشقاشان قاعاز كىتاپ وقىماعانىن، 65,2 پايىزى ەلەكتروندى كىتاپ وقىپ كورمەگەنىن ايتقان.
1996-جىلدان بەرى 23- ءساۋىر - دۇنيەجۇزىلىك كىتاپ جانە اۆتورلىق قۇقىق كۇنى رەتىندە اتالىپ وتىلەدى. ق س ز ي جۇرگىزگەن ساۋالناما وسى ايتۋلى كۇنگە وراي جۇرگىزىلىپ وتىر.