الماتىداعى ەڭ قىمبات 10 مەكتەپ
1. الماتىداعى حالىقارالىق QSI مەكتەبى
قازاقستانداعى ەڭ قىمبات مەكتەپتەردىڭ بىرىندە ءبىلىم الۋ قۇنى - جىلىنا 11 ميلليون 570 مىڭ تەڭگە. ونىڭ ىشىنە تىركەلۋ جارناسى، ءبىلىم بەرۋ باعدارلاماسى مەن بالالارعا ارنالعان قوسىمشا ۇيىرمەلەر كىرەدى. جەڭىلدىك قاراستىرىلماعان.
دەگەنمەن قوسىمشا قىزمەتتەر بار. ماسەلەن، وقۋشىلاردىڭ تاماقتانۋى كۇنىنە 2400 تەڭگە، ال بالالاردى مەكتەپكە جەتكىزۋ جىلىنا ميلليون تەڭگە بولادى. بۇل مەكتەپتە ءبىرىڭعاي فورما كيۋ مىندەتتى ەمەس ەكەنىن ايتا كەتكەن ءجون. سول سەبەپتى وعان شىعىندالۋدىڭ قاجەتى بولمايدى.
2. Haileybury Almaty
بۇل مەكتەپ 1-2- سىنىپ وقۋشىلارىنا جىلىنا 9 ميلليون 140 مىڭ تەڭگەگە بريتان وقۋ باعدارلاماسىن ۇسىنادى.
وقۋ قۇنىنا 4 مەزگىل تاماقتانۋ، ۇيىرمەلەر مەن سەكسيالار، اكادەميالىق ءبىلىم الۋ مەن تاربيە جۇمىسى، كانتسەلياريا تاۋارلارى مەن داپتەرلەر، ارنايى اكادەميادا اعىلشىن ءتىلىن ۇيرەتۋ، كۇزەت پەن مەديتسينا پۋنكتىنىڭ قىزمەتى كىرەدى.
دەگەنمەن 45 مىڭ تەڭگە كولەمىندە تىركەلۋ جارناسى مەن 450 مىڭ تەڭگە كەپىل جارناسىن بولەك تولەۋ قاجەت.
3. قازاقستان حالىقارالىق مەكتەبى
بۇل مەكتەپكە ءبىرىنشى سىنىپ وقۋشىسىن بەرۋ جىلىنا 8 ميلليون 835 مىڭ تەڭگە تۇرادى. قور الىمى جىلدىق وقۋ اقىسىنىڭ 1/3 بولىگى بولادى. بۇل الىم بالانىڭ سىنىپتاعى ورنىنا كەپىلدىك بەرەدى.
بۇل مەكتەپتە ءبىلىم الۋ باعاسى دوللارمەن ەسەپتەلەتىنىن ايتا كەتكەن ءجون. قازاقستاندىق تەڭگە قۇنسىزداناتىن بولسا - وقۋ اقىسى كوتەرىلەدى.
اتا-انالار بالالاردىڭ تاماقتانۋىنا كۇنىنە قوسىمشا 2700 تەڭگە تولەيدى. وقۋ جىلىندا مەكتەپ اۆتوبۋسىن پايدالانۋ ەكى جاققا 600 مىڭ تەڭگە بولسا، تەك ءبىر باعىتقا - 450 مىڭ تەڭگە تۇرادى.
دەگەنمەن KIS- تە بىرنەشە بالاسىن وقىتاتىن اتا-انالارعا ەكىنشى بالاعا %5 جانە ودان كەيىنگى ءار بالاعا جەڭىلدىك قاراستىرىلعان. جەڭىلدىكتى جيناقتاۋعا بولمايدى.
4. High Tech Academy
بۇل مەكتەپ جىلىنا 5 ميلليون 875 مىڭ تەڭگەگە 1-5- سىنىپ وقۋشىلارىنا فين ءبىلىم بەرۋ ۇلگىسىن ۇسىنادى. بۇل باعاعا ءبىلىم بەرۋ باعدارلاماسى، ءۇش مەزگىل تاماقتانۋ مەن وقۋ ماتەريالدارى كىرەدى. وقۋ اقىسىن جىل باسىندا تولىق تولەۋگە نەمەسە اي سايىن ءبولىپ تولەپ تۇرۋعا بولادى.
ءبىر وتباسىدان ەكى نەمەسە ودان كوپ بالا وسى مەكتەپكە باراتىن بولسا، جەڭىلدىك جاسالاتىنىن ەرەكشە اتاپ ءوتۋ كەرەك.
وقۋعا قابىلدانار كەزدە 150 مىڭ تەڭگە كولەمىندە جارنا ەنگىزىپ، 30 مىڭ تەڭگە تۇراتىن سۇحباتتان ءوتۋ كەرەك. سۇحباتتان ءساتتى وتكەن بالا مەكتەپكە اۆتوماتتى تۇردە قابىلدانادى دەگەندى بىلدىرمەيدى.
5. حالىقارالىق ميراس مەكتەبى
بۇل مەكتەپتە بىرنەشە تىلدە، ياعني قازاق، ورىس جانە اعىلشىن تىلدەرىندە ءبىلىم الۋعا بولادى. وقۋ اقىسى تاڭداعان تىلگە بايلانىستى بولادى. ماسەلەن اعىلشىن تىلىندە ءبىلىم الۋ جىلىنا 5 ميلليون 123 مىڭ تەڭگە، ال قازاق نەمەسە ورىس تىلىندەگى ءبىلىم قۇنى - 4 ميلليون 329 مىڭ تەڭگە. سونداي-اق ورىس تىلىندە ماتەماتيكانى تەرەڭدەتىپ وقۋعا بولادى. باعاسى - 3 ميلليون 150 مىڭ تەڭگە.
وقۋعا ءتۇسۋ ءۇشىن 400 مىڭ تەڭگە جارنا تولەۋ مىندەتتى. وسى مەكتەپتە بىرنەشە بالاسى وقيتىن وتباسىلارعا ەكىنشى بالاعا %5 جانە ودان كەيىنگىلەرىنە جەڭىلدىك قاراستىرىلعان. مەكتەپتە ارنايى مەكتەپ فورماسى بار ەكەنىن ايتا كەتەيىك. ونى بولەك ساتىپ الۋ قاجەت.
6. Tamos Education
بۇل ۇيىمدا باستاۋىش سىنىپ وقۋشىلارى ءتۇرلى باعىت بويىنشا ءبىلىم الادى. ماسەلەن، «CAMBRIDGE» بولىمشەسى جىلىنا 4 ميلليون 356 مىڭ تۇراتىن تەك اعىلشىن تىلىندەگى وقۋ باعدارلاماسىن ۇسىنادى.
فيزيكا-ماتەماتيكا مەكتەبى 2 ميلليون 400 مىڭ تەڭگەگە ورىس ءتىلدى جانە 2 ميلليون 160 مىڭ تەڭگەگە قازاق ءتىلدى باعدارلامامەن وقىتادى.
بالالارعا اعىلشىن جانە قىتاي تىلدەرىن ۇيرەتەتىن لينگۆيستيكا مەكتەبى ورىس تىلىندە 2 ميلليون 500 مىڭ تەڭگەگە، قازاق تىلىندە 2 ميلليون 430 مىڭ تەڭگەگە ءبىلىم بەرەدى. جىلىنا 1 ميلليون 900 مىڭ تەڭگە تۇراتىن باستاۋىش ماتەماتيكا مەكتەبى بار.
قوسىمشا 500 مىڭ تەڭگەگە 3 مەزگىل تاماقتانۋ قىزمەتىن ساتىپ الۋعا بولادى. اي سايىن 38-42 مىڭ تەڭگەگە تاسىمالداۋ قىزمەتى دە بار، باعاسى مەكتەپ پەن ءۇي اراسىنداعى قاشىقتىققا بايلانىستى وزگەرىپ وتىرادى. تىركەلۋ جارناسى - 300 مىڭ تەڭگە.
سونداي-اق وقۋ ورنىندا ءبىر وتباسىنىڭ ەكى بالاسى وقىسا، بىرەۋىنە %5 جەڭىلدىك جاسالادى.
7. حالىقارالىق Galaxy مەكتەبى
كەمبريدج وقۋ باعدارلاماسىن ۇسىناتىن بۇل ۇيىمدا ءبىلىم الۋ باعاسى - جىلىنا 4 ميلليون 300 مىڭ تەڭگە.
بۇل باعاعا ءبىلىم بەرۋ باعدارلاماسى، وقۋ ماتەريالدارى مەن مەكتەپتەن تىس قوسىمشالار كىرەدى. وقۋ اقىسىن بىردەن تولەگەندەرگە %5 جەڭىلدىك جاسالادى. سونىمەن قاتار ءبىر وتباسىنىڭ ءار بالاسىنا %5 جەڭىلدىك قاراستىرىلعان.
وقۋعا تۇسەر كەزدە تاپسىراتىن ەمتيحاندى تولەۋ كەرەك، ونىڭ باعاسى - 10 مىڭ تەڭگە. سىنىپتاعى ورىندى برونداۋ ءۇشىن سالىناتىن العاشقى جارنا - 500 مىڭ تەڭگە. بۇل سوما وقۋ اقىسىنا قوسىلعان.
تاماق تانۋ مەن مەكتەپ فورماسى بولەك ساتىپ الىنادى.
8. شوقان ءۋاليحانوۆ اتىنداعى مەكتەپ
بۇل مەكتەپتە ءبىرىنشى سىنىپ وقۋشىسىنىڭ جىلدىق وقۋ اقىسى - 4 ميلليون 50 مىڭ تەڭگە. ءبىر رەتتىك العاشقى جارنا - 420 مىڭ تەڭگە.
وقۋ اقىسىنا مەملەكەتتىك جالپىعا مىندەتتى ءبىلىم بەرۋ ستاندارتى، رەسپۋبليكالىق، حالىقارالىق جانە باسقا دا زياتكەرلىك جارىستارعا دايىنداۋ، اپتاسىنا 4 ساعات كولەمىندە مەكتەپتەگى ۇيىرمە مەن سەكسيالارعا قاتىسۋ، باستاۋىش مەكتەپتە ۇزارتىلعان كۇن توبى، مەديتسينالىق جانە پسيحولوگيالىق كومەك، ءۇش مەزگىل تاماقتانۋ كىرەدى.
ءبىر وتباسىنىڭ ەكىنشى جانە ءۇشىنشى بالاسىنا جانە جىلدىق وقۋ اقىسىن بىردەن تولەسە %5 جەڭىلدىك بار.
9. NGS جاڭا ۇرپاق مەكتەبى
بۇل مەكتەپتىڭ 0-11- سىنىپ وقۋشىلارى جىلىنا 3 ميلليون 700 مىڭ تەڭگەگە وقيدى. ءبىلىم بەرۋ قىزمەتتەرى، مەديتسينالىق كومەك، ونىڭ ىشىندە لوگوپەد، پسيحولوگ، سونداي-اق قوسىمشا ءجۇزۋ، ريتميكا، شاحمات ساباقتارى، بەس مەزگىل تاماقتانۋ وسى باعاعا كىرەدى. دەگەنمەن 500 مىڭ تەڭگە كولەمىندە تىركەلۋ جارناسىن تولەۋ قاجەت.
مىندەتتى مەكتەپ فورماسى، بالالاردى تاسىمالداۋ، ەكسكۋرسيا، لاگەر سىندى ساباقتان تىس ۋاقىتتاعى قوسىمشا ساباقتار بولەك تولەنەدى.
مەكتەپتە ءبىر وتباسىنىڭ ەكى نە ودان دا كوپ بالاسى وقىعان جاعدايدا %5 جەڭىلدىك قاراستىرىلعان.
10. ءجانيا اۋباكىروۆانىڭ اۆتورلىق مەكتەبى
بۇل مەكتەپتە ءبىلىم الۋ سالىستىرمالى تۇردە ارزان - جىلىنا 3 ميلليون تەڭگە. بۇل سوماعا جالپى ءبىلىم بەرۋ باعدارلاماسى، مۋزىكالىق ءبىلىم بەرۋ، شاحماتتان باستاپ روبوتوتەحنيكاعا دەيىنگى دامىتۋ ۇيىرمەلەرى كىرەدى. سونداي-اق بالالار پسيحولوگى، بالالار دارىگەرى، لوگوپەدتىڭ كاسىبي قولداۋىن الىپ، ءتورت مەزگىل ۇيلەستىرىلگەن تاماق ىشەدى.
بازالىق نەمەسە ارنايى مۋزىكالىق كەزەڭدى تاڭداۋ بولەك تولەنەدى.
بازالىق مۋزىكالىق كەزەڭ - جىلىنا 200 مىڭ تەڭگە.
ارنايى مۋزىكالىق كەزەڭ - جىلىنا 400 مىڭ تەڭگە.
تاسىمالداۋ بولەك تولەنەدى. ايىنا 40 مىڭ تەڭگە شاماسىندا.
بۇعان دەيىن الماتىدا جاڭا وقۋ جىلىندا 31 مىڭ بالا ءبىرىنشى سىنىپقا بارعانى حابارلانعان بولاتىن. ءبىلىم كۇنى الماتىدا 323 مەكتەپ ەسىگىن ايقارا اشتى، ونىڭ 215 ءى مەملەكەتتىك بولسا، 108 ءى - جەكە مەكتەپ.