قىزىلوردا وبلىسىندا 10 جىل بۇرىن شەتىنەپ كەتكەن سابيگە لاگەرگە جولداما بەرىلگەن
قاتەلىككە جول بەرگەن ديرەكتور مەن ءتيىستى مامان قاتاڭ سوگىس الدى، دەپ حابارلايدى قازاقپارات ءتىلشىسى.
بۇل جونىندە الەۋمەتتىك جەلى بەتتەرىندە جاريالاندى.
وندا ارال قالاسىنداعى №220-مەكتەپتە ون جىل بۇرىن شەتىنەپ كەتكەن نارەستەگە مەكتەپ جانىنداعى لاگەرگە جولداما بەرگەنى ايتىلعان.
اتالعان جاعدايعا ارال اۋداندىق ءبىلىم ءبولىمى تومەندەگىشە تۇسىنىك بەردى.
وعان قاتىستى №220-ورتا مەكتەپتە زەردەلەۋ جۇمىستارى جۇرگىزىلىپ، ارنايى جيىن وتكىزىلگەن.
وعان جەرگىلىكتى ۇكىمەتتىك ەمەس ۇيىم وكىلدەرى، اۋداندىق ءماسليحات، اۋداندىق جۇمىسپەن قامتۋ جانە الەۋمەتتىك باعادارلامالار بولىمىنەن جانە مەكتەپ قىزمەتكەرلەرى، اۋداندىق ءبىلىم ءبولىمىنىڭ باسشىسى قاتىسقان.
«وقۋشىلاردىڭ جازعى دەمالىسىن ءتيىمدى وتكىزۋ ماقساتىندا جالپىعا مىندەتتى وقۋ قورىنان مەكتەپ جانىنداعى جازعى تىنىعۋ لاگەرىنە №220-ورتا مەكتەبىنەن 90 بالانىڭ ءتىزىمى جاساقتالعان. جولداما الۋ ءۇشىن E-gov پورتالىنا تىركەۋ بارىسىندا مەكتەپتىڭ الەۋمەتتىك پەداگوگى اقتوتى قۇلمىرزايەۆا جاۋاپتى اتا-انانىڭ وتىنىشىنە سايكەس ەلەكتروندى كىلتى ارقىلى جەكە كابينەتىنە كىرگەن. سودان كەيىن №220-ورتا مەكتەبىنىڭ 1 «ۆ» سىنىبىنىڭ وقۋشىسى زاڭعار داۋرەن ۇلىن تىركەۋ ءۇشىن ءوتىنىش جىبەرۋدىڭ ورنىنا، قاتەلەسىپ وتباسى تىزىمىندە تۇرعان 2013 -جىلى قايتىس بولعان باۋىرى بەيبارىس داۋرەن ۇلىنىڭ اتىنان قاتە سۇرانىس جۇرگىزگەن. نەگىزى E-gov پورتالىندا بالا دۇنيەدەن وتسە دە اتى-ءجونى جانۇيا قۇرامىنىڭ تىزىمىندە تۇرادى. دەگەنمەن، سول مەزەتتە قاتە جىبەرگەنىن كورىپ، تىنىعۋ لاگەرىنە بارۋعا ءتيىس زاڭعار داۋرەن ۇلىن قايتا تىركەيدى. قاجەتتى قۇجاتتاما دايىندالىپ، وقۋشى لاگەرگە جىبەرىلدى. الايدا، قايتىس بولعان بالانىڭ ءوتىنىشى كەيىن قايتارىلماي، پورتالدا قالىپ قويعان»، - دەپ ءمالىم ەتتى ارال اۋداندىق ءبىلىم بولىمىنەن.
زەردەلەۋ بارىسىندا بەيبارىس داۋرەن ۇلىنىڭ E-gov پورتالىنداعى ءوتىنىشى ماقۇلدانباعانى، دەمالۋشى بالالاردىڭ تىزىمىندە جوق ەكەنى انىقتالدى.
«وعان تىنىعۋ لاگەرىنە قاتىستى ەشقانداي قاراجات قارالماعانى انىقتالدى. قۇجاتتاردىڭ بارلىعى زاڭعا سايكەس راسىمدەلگەن. جيىن قورىتىندىسى بويىنشا تىركەۋ بارىسىندا جاۋاپتى ماماننىڭ بالانىڭ اتى- ءجونىن شاتاستىرىپ العانى راستالدى. ناتيجەسىندە №220 ورتا مەكتەبىنىڭ ديرەكتورى ءالىبي ابىلبايەۆ جانە الەۋمەتتىك پەداگوگ اقتوتى قۇلمىرزايەۆا، تاربيە ءىسى جونىندەگى ورىنباسارى ايىم سەيىلوۆاعا «قاتاڭ سوگىس» جاريالاندى» ، - دەپ تولىقتىردى ءبىلىم بولىمىنەن.