قىرعىزستاننىڭ ەكس- پرەزيدەنتى قۇرمانبەك باكيەۆ جەمقورلىق ارەكەتى ءۇشىن 10 جىلعا سوتتالدى
بىشكەك قالاسىنىڭ پەرۆوماي اۋداندىق سوتى قىرعىزستاننىڭ ەكس- پرەزيدەنتى قۇرمانبەك باكيەۆتى «كۋمتور» التىن كەن ورنىنا قاتىستى سىبايلاس جەمقورلىق تۋرالى ءىس بويىنشا 10 جىلعا باس بوستاندىعىنان ايىرۋ ۇكىمىن شىعاردى.
سوت ينستانتسياسىنىڭ باسپا ءسوز قىزمەتى حابارلاعانداي، ۇكىم 2023 -جىلدىڭ 1 -ناۋرىزدا شىقتى. وعان سايكەس قىرعىزستان رەسپۋبليكاسىنىڭ بۇرىنعى پرەزيدەنتىنىڭ جەكە مۇلكى تاركىلەنىپ، 3 جىل مەرزىمگە مەملەكەتتىك قىزمەت اتقارۋعا تىيىم سالىنىپ، 10 جىلعا سوتتالدى.
قىرعىزستان جوعارعى سوتىنىڭ 2016 -جىلعى 29 -شىلدەدەگى قاۋلىسىن ەسكەرە وتىرىپ، جازانى ءىشىنارا قوسۋ ارقىلى پەرۆوماي اۋداندىق سوتى قۇرمانبەك باكيەۆكە قاتاڭ رەجيمدەگى تۇزەۋ كولونياسىندا جازاسىن وتەي وتىرىپ، 30 جىل مەرزىمگە باس بوستاندىعىنان ايىرۋ جازاسىن تۇپكىلىكتى بەلگىلەدى.
ودان بولەك، قىرعىزستان رەسپۋبليكاسىنىڭ قىلمىستىق كودەكسىنىڭ 336-بابى 2-بولىگىنە سايكەس («سىبايلاس جەمقورلىق») ءىستىڭ باسقا دا قاتىسۋشىلارى جازاعا تارتىلدى.
- قىرعىزستان رەسپۋبليكاسى قارجى ءمينيسترىنىڭ بۇرىنعى ورىنباسارى ءامىرلان تورومىرزايەۆ جالپى رەجيمدەگى تۇزەۋ كولونياسىندا جازاسىن وتەپ، مۇلكى تاركىلەنىپ، 3 جىل مەرزىمگە مەملەكەتتىك لاۋازىمداردى اتقارۋعا تىيىم سالۋمەن 12 جىلعا سوتتالدى؛
- قىرعىزستاننىڭ بۇرىنعى سىرتقى ساۋدا جانە ونەركاسىپ ءمينيسترى سادريددين جيەنبەكوۆ مۇلكى تاركىلەنىپ، 3 جىل مەرزىمگە مەملەكەتتىك قىزمەت اتقارۋ قۇقىعىنان ايىرىلىپ، 10 جىلعا باس بوستاندىعىنان ايىرىلدى؛
- ق ر گەولوگيا جانە مينەرالدىق رەسۋرستار اگەنتتىگىنىڭ بۇرىنعى باسشىسى قاپار قۇرماناليەۆ قاتاڭ رەجيمدەگى تۇزەۋ كولونياسىندا جازاسىن وتەپ، مۇلكى تاركىلەنىپ، 3 جىل مەرزىمگە مەملەكەتتىك لاۋازىمداردى اتقارۋعا تىيىم سالۋمەن 13 جىلعا سوتتالدى؛
- ورتالىق دامۋ، ينۆەستيتسيالار جانە يننوۆاتسيالار اگەنتتىگى باسشىسىنىڭ بۇرىنعى ورىنباسارى الەكسەي ەليسەيەۆ قاتاڭ رەجيمدەگى تۇزەۋ كولونياسىندا جازاسىن وتەپ، مەملەكەت كىرىسىنە 15 مىڭ سوم ايىپپۇل سالىپ، مۇلكى تاركىلەنىپ، 30 جىلعا باس بوستاندىعىنان ايىرىلدى؛
- ۇكىمەت اپپاراتىنىڭ قۇقىقتىق ءبولىمىنىڭ بۇرىنعى باسشىسى ەلەنا بەلكوۆسكايا جالپى رەجيمدەگى تۇزەۋ كولونياسىندا جازاسىن وتەي وتىرىپ، مۇلكى تاركىلەنىپ، 3 جىل مەرزىمگە مەملەكەتتىك لاۋازىمداردى اتقارۋعا تىيىم سالا وتىرىپ، مۇلكى تاركىلەنىپ، 9 جىلعا باس بوستاندىعىنان ايىرىلدى؛
- ەكس- پرەزيدەنتتىڭ ۇلى ماكسيم باكيەۆ مۇلكى تاركىلەنىپ، 3 جىل مەرزىمگە مەملەكەتتىك قىزمەت اتقارۋ قۇقىعىنان ايىرا وتىرىپ، ايرىقشا رەجيمدەگى كولونيادا جازاسىن وتەي وتىرىپ، ءومىر بويىنا باس بوستاندىعىنان ايىرۋعا ۇكىم شىعاردى.