قالاداعى كوكتايعاقتىڭ كەسىرىنەن ءبىر كۇندە 10 جول اپاتى بولدى
اتىراۋدا كەشەدەن بەرى كوكتايعاق بايقالىپ وتىر.
وسىعان بايلانىستى «ارنايى اۆتوبازا» ج ش س-نىڭ باسشىسى الماس ىزتىلەۋوۆتىڭ ايتۋىنشا، كەشەدەن بەرى كولىك جول، كوپىرلەر مەن باسپالداقتار، مەكتەپتەر مەن جاياۋ جۇرگىنشىلەر جولاعىنا قۇم ارالاس تۇز سەبىلگەن.
بۇل جۇمىسقا 180 جۇمىسشى مەن 3 تەحنيكا جۇمىلدىرىلدى.
وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، كوكتايعاق كەسىرىنەن جول-كولىك وقيعاسى كوبەيگەن.
ماسەلەن، 20-جەلتوقساندا 10 جول-كولىك وقيعاسى تىركەلگەن.
«اتىراۋدا اۋا-رايى كۇرت وزگەردى. بۇل اتىراۋ قالاسىنىڭ اۋماعىنداعى جولدىڭ بارىندە كوكتايعاق بولۋىنا اسەر ەتتى. سول سەبەپتەن، قالا تۇرعىندارى مەن قوناقتارىنا، اسىرەسە جۇرگىزۋشىلەرگە قاۋىپسىز قوزعالىستى قامتاماسىز ەتۋ ءۇشىن نەگىزگى قاعيدالاردى ساقتاۋ كەرەكتىگىن ەسكەرتەمىز. كولىكتىڭ جىلدامدىق رەجيمىن ساقتاۋ، سونداي-اق، جولدا اراقاشىقتىقتى ساقتاعان ءجون. كولىكتى قىسقى دوڭگەلەكتەرمەن جابدىقتاۋ قاجەت. ويتكەنى، جازعى دوڭگەلەكپەن ءجۇرۋ جول-كولىك وقيعاسىنا سەبەپكەر بولۋى مۇمكىن. ەڭ ماڭىزدى ساقتىق شاراسى - جۇرگىزۋشى جولدى كەسىپ وتەتىن ادامدارعا وتكىزۋى ءتيىس. ال جاياۋ جۇرگىنشىلەر بۇل ءۇشىن ارنايى بەلگىلەنگەن جولاقتان بارىنشا ابايلاپ وتكەنى ءجون»، - دەپ حابارلادى دەپارتامەنتتىڭ باسپا ءسوز قىزمەتىنەن.
ەسكە سالا كەتەلىك، بۇعان دەيىن اتىراۋدا جاياۋ جۇرگىنشىنى مەرت قىلعان ماس جۇرگىزۋشى ۇستالعانىن جازعان بولاتىنبىز.
كەيىن جەڭىل كولىك قاققان جاياۋ جۇرگىنشى مەرت بولعانىن حابارلاعان ەدىك.