پارلامەنت ماجىلىسىندە «اسكەري پوليتسيا ورگاندارى تۋرالى» زاڭ جوباسى قارالىپ جاتىر.
زاڭ جوباسىن تالقىلاۋ بارىسىندا ماجىلىسمەن ەرلان سايروۆ ءتارتىپ ساقشىلارىنىڭ جاۋاپكەرشىلىگى تۋرالى سۇرادى.
«قايعىلى قاڭتار كەزىندە تالدىقورعان قالاسىندا، جامبىل جانە قىزىلوردا وبلىستارىندا كەيبىر قىزمەتكەرلەر جۇمىستارىن تاستاپ كەتىپ قالعان بولاتىن. پروكۋراتۋرا وكىلدەرىنە سۇراعىم بار، وسى ورگان باسشىلارىنا قانداي شارا قولدانىلدى؟»، - دەپ سۇرادى سايروۆ.
«قاڭتار وقيعاسىنا قاتىستى اي سايىن ءتيىستى اقپاراتتى بەرەمىز. قانشا قىلمىستىق ءىس قوزعالدى، قانشا ادام جاۋاپقا تارتىلعانىن حابارلايمىز. ءتيىستى اقپارات قاجەت بولسا، تاعى بەرە الامىن»، - دەدى باس پروكۋروردىڭ ورىنباسارى جاندوس ومىراليەۆ.
ول 2022 -جىلدىڭ جەلتوقسانىندا زاڭعا ءتيىستى وزگەرىستەر ەنگىزىلگەنىن ايتتى.
«قۇقىق قورعاۋ ورگاندارى قىزمەتكەرلەرىنىڭ توتەنشە جاعداي كەزىندە جۇمىس ورىندارىن تاستاپ كەتۋ، وكىلەتتىكتەرىن اسىرا پايدالانۋى بويىنشا قىلمىستىق كودەكسكە جاڭا باپ ەنگىزدىك. وندا 10 جىلعا دەيىن باس بوستاندىعىنان ايىرۋ جازاسى كورسەتىلگەن. جوعارىدا ايتقانىمداي، مەن تولىق اقپاراتتى بولەك بەرە الامىن»، - دەپ جاۋاپ بەردى باس پروكۋراتۋرا وكىلى.
Tengrinews.kz