قازمۇنايگازدىڭ قارىزى 10 ميلليارد ا ق ش دوللارىنا جۋىقتادى

استانا. قازاقپارات - «قازمۇنايگاز» كومپانياسى ءوزىنىڭ ينۆەستيتسيالىق تارتىمدىلىعىن كوتەرۋ جۇمىستارىن جۇرگىزدى.

بۇل تۋرالى اتالعان كومپانيانى IPO- عا شىعارۋعا ارنالعان جيىندا «سامۇرىق-قازىنا» ا ق اكتيۆتەرىن قايتا قۇرىلىمداۋ دەپارتامەنتىنىڭ ديرەكتورى داستان اديحودجايەۆ ايتتى، دەپ حابارلايدى قازاقپارات ءتىلشىسى.

«سوڭعى 8 جىلدا «قازمۇنايگازدىڭ» قارىزى ەكى ەسەگە جۋىق ازايدى. 2014-جىلى بۇل كورسەتكىش 19,2 ميلليارد ا ق ش دوللارى بولسا، قازىر شامامەن 10 ميلليارد دوللارعا دەيىن ازايىپ وتىر»، - دەدى د. اديحودجايەۆ.

ونىڭ ايتۋىنشا، قازىر «قازمۇنايگاز» ءوزىنىڭ قاراماعىنداعى قاجەتسىز قۇرىلىمداردى جويىپ، ەنشىلەس جانە تاۋەلدى كومپانيالاردى تىكەلەي باسقاراپ جاتىر.

«قازمۇنايگاز» IPO- سىنا قاتىسۋ ارقىلى ادامدار مۇناي ءوندىرۋ، تاسىمالداۋ، قايتا وڭدەۋ سياقتى قىزمەتتەر ۇسىناتىن ءىرى كومپانيانىڭ ۇلەسكەرىنە اينالا الادى. بولاشاق اكتسيونەرلەر كومپانيا تابىسىنان ديۆيدەند رەتىندە پايدا كورۋ قۇقىعىنا يە بولادى.

«قازمۇنايگاز» كومپانياسىنىڭ جالپى اكتيۆتەرى 32 ميلليارد دوللاردى قۇراپ وتىر. ديۆيدەندتەر تولەۋ مۇمكىندىگى مۇناي باعاسىنا بايلانىستى بولادى.

بۇدان بۇرىن حابارلانعانداي، 7- قاراشادا «سامۇرىق-قازىنا» قورى «قازمۇنايگاز» كومپانياسىنىڭ وزىنە تيەسىلى ۇلەسىنىڭ 5 پايىزىن IPO- عا شىعاراتىنىن رەسمي جاريالادى.

بۇل جولعى IPO اياسىندا «قازمۇنايگاز» كومپانياسىنىڭ «سامۇرىق-قازىناعا» تيەسىلى 30,5 ميلليون اكسياسى ساتىلادى.

ءبىر اكسيانىڭ قۇنى 8406 تەڭگە دەپ بەلگىلەنگەن. IPO كەلەسى ايعا دەيىن جوسپارلانعان. ناقتىراق ايتساق، ينستيتۋتسيونالدىق ينۆەستورلاردان (زاڭدى تۇلعالار) ءوتىنىم قابىلداۋ 9- قاراشادا باستالىپ، 30- قاراشادا اياقتالادى. ال بولشەك ينۆەستورلاردان (جەكە تۇلعالار) ءوتىنىم قابىلداۋ 9- قاراشادا باستالىپ، 2- جەلتوقساندا ساعات 15.00 دە اياقتالادى. «سامۇرىق-قازىنا» قورى بۇكىل وتىنىمدەردى جيناپ، ماقۇلداعاننان كەيىن ساتىلعان اكسيالار جەلتوقساننىڭ ءبىرىنشى ون كۇندىگىندە ينۆەستوردىڭ شوتىنا تۇسەدى.