بالاسىنىڭ بولاشاعىنىڭ جارقىن بولعانىن قالامايتىن اتا-انا جوق. سول سەبەپتى بۇل ماقالادا ايتىلاتىن مالىمەتتى بىلگەن ەشكىمگە ارتىق ەتپەيدى.
بالا ءۇشىن ۇيىندەگىلەردىڭ پىكىرى ۇزاق جىلدار بويى ماڭىزدى بوپ قالا بەرەدى. ولاردىڭ اۋزىنان شىققان سوزدەر جادىندا ساقتالادى. اسىرەسە، كوڭىلىنە تيگەن جامان سوزدەر.
1. «اكەسى سياقتى جالقاۋ» («شەشەسى سياقتى سالاق»)
بالانىڭ كەي قىلىقتارىن وتباسىنىڭ اسا بەدەلى جوق مۇشەسىمەن سالىستىرىپ، بەتىنە باسۋ دۇرىس ەمەس. ول ءومىر بويى ءوزىن سول كىسىگە تەڭەپ وسەدى. كەيىن دە قولىنان ءىس كەلەتىن بولسا دا، ەشقانداي جەتىستىككە جەتپەيدى. ءوزىن قور سانايدى.
2. «ال مەنىڭ دوسىمنىڭ سەندەي قىزى (ۇلى) ءوزىن جاقسى ۇستايدى...!»
بۇل ءسوز تىركەسى ارقىلى اتا-انا بالانىڭ سەنىمسىزدىگىن ارتتىرادى. مۇنداي سوزدەر ارقىلى ءسىز بالاڭىزدى جاقسارتپايسىز، كەرىسىنشە سىزگە ۇناماي قالۋ قورقىنىشىن، ماحابباتىڭىزدى جوعالتىپ الۋ قورقىنىشىن تۋدىراسىز.
3. «ول ءۇشىن جىلاۋ/اشۋلانۋ/ۋايىمداۋدى دوعار»
ادامعا بارلىق ەموتسيالار قاجەت. مۇنداي ءسوز تىركەسىن ايتۋ ارقىلى ءسىز بالانىڭ سەزىمىن سىرتقا شىعارۋعا جول بەرمەيسىز. ءوزىن تەجەۋگە ماجبۇرلەيسىز. ال كەلىپ تۇرعان سەزىمدى ىشتەن تىندىرۋ ءبارىبىر نەگاتيۆ اۋراسىن قالدىرادى. شىقپاعان سەزىم ەشقايدا كەتپەيدى، پسيحيكادا قالادى، ۋاقىتىلى ايتىلماعان سوزدەر دەپرەسسياعا تۇسىرەدى.
4. «سەنىڭ قولىڭنان كەلمەيدى»
بۇل ءسوز تىركەسى ارقىلى اتا-انا بالانىڭ وزىنە جانە بويىنداعى قابىلەتىنە دەگەن سەنىمىن تۇسىرەدى. بالا قولىنان كەلسە دە، كەلمەسە دە، ويلاعان دۇنيەسىنە تالپىنىپ كورۋى كەرەك. سول كەزدە عانا ونىڭ كوزى جەتەدى. كەلەسىدە شاما-شارقىنا قاراي ماقسات قويىپ، ءوز قابىلەتىن راتسيونال تۇردە باعدارلاي الادى.
5. «ساعان ەشتەڭەنى سەنىپ تاپسىرۋعا بولمايدى»
كوبىنەسە اتا-انا بالانىڭ بالا ەكەنىن ۇمىتىپ، ۇلكەن كىسىشە ۇرسادى. بالانىڭ ءسىز ۇزاق ۋاقىت بويى تاجىريبەدەن جيناپ، ءمىنسىز جاسايتىنداي يگەرگەن ءىسىڭىزدى بىردەن ويداعىداي ىستەي سالۋى قيىن. شىدامدى بولىڭىز جانە ونى بالاڭىزبەن بىرگە جاساڭىز. ودان كەرەمەت ناتيجە تالاپ ەتپەي، جاي عانا قاسىندا قاداعالاپ وتىرىپ ۇيرەتىڭىز.
6. «وسى سەن ادام بولمايسىڭ؟»
وسى سوزبەن ءسىز بالاعا ودان كوڭىلىڭىز قالعانىن بىلدىرەسىز. بالا ءوزىن تۇككە تۇرعىسىز جانە ەشكىم سۇيمەيتىندەي سەزىنەتىن بولادى. بالالار وزدەرىنە اتا-اناسىنىڭ كوزىمەن قارايتىندىقتان، ول ءوزىن قابىلداي الماي قالادى. تۇككە تۇرعىسىز سەزىنەدى.
7. «سەن ءۇشىن كوپ نارسە جاسادىق، ءبىراق سەن شۇكىر ەتپەيسىڭ»
اتا-انا بالاسىنا بار جيعان-تەرگەنىن ول سونى وتەسىن دەپ ەمەس، رياسىز ماحابباتتان شاشادى. ەگەر بالا ءۇشىن بىردەڭە جاساساڭىز، ول ءوز تاڭداۋىڭىز، ياعني ءوزىڭىز جاۋاپتىسىز. بۇل فرازا كانىلاۋعا كوبىرەك ۇقسايدى، ويتكەنى وسىنداي سوزدەر ارقىلى بالانى باسقارۋ وڭاي.
8. «سەن سياقتىلاردىڭ ميلليونى بار!»
بۇل ءسوز تىركەسى ارقىلى اتا-انا بالاسىنىڭ دارالىعىن مويىندامايتىنىن كورسەتەدى. بالانىڭ قابىلەتىنىڭ قۇلدىراۋىنا، دەپرەسسيالىق كوڭىل-كۇيگە تۇسۋىنە، بولاشاقتا بىردەڭە جاساۋعا قۇلشىنىسىنىڭ بولماۋىنا اكەلەدى.
9. «ۇيالساڭ ەتتى!»
بالانىڭ مىنەزىنە كوڭىلى تولمايتىن اتا-انا ويىن مۇنداي قاتتى سوزدەرمەن جەتكىزبەسە دە بولادى. بالالىق شاعىندا ءوزىن ءجيى ۇياتتى سەزىنگەن بالالار بولاشاقتا جەتىستىككە جەتپەيدى.
10. «ءدال ايتقانىمداي كەلدى. شەشەڭدى (اكەڭدى) تىڭدامادىڭ انە»
بۇل ءسوز تىركەسى ارقىلى اتا-انا ءوزىنىڭ بەدەلىن ارتتىرعىسى كەلگەنمەن، بالانىڭ ەركىندىگىن شەكتەيدى. بالاعا قاتەلەسۋگە قۇقىق بەرىڭىز. ول ءوزىن، ءوز تۇيسىگىن تىڭداپ ۇيرەنسىن.
massaget.kz