شاڭحاي ىنتىماقتاستىق ۇيىمىنا كىرۋگە 10 ەل ءوتىنىم بەردى
وزبەكستان سىرتقى ىستەر ءمينيسترىنىڭ مىندەتىن اتقارۋشى ۆلاديمير نوروۆتىڭ ايتۋىنشا، الداعى فورۋم بارىسىندا اراب مەملەكەتتەرى ليگاسى، يۋنەسكو، ب ۇ ۇ- نىڭ ازيا مەن تىنىق مۇحيتى ءۇشىن ەكونوميكالىق جانە الەۋمەتتىك كوميسسياسى (ەسكاتو) سىندى بىرنەشە حالىقارالىق جانە وڭىرلىك ۇيىمدارمەن اراداعى سەرىكتەستىك قارىم-قاتىناس ورناتۋ تۋرالى مەموراندۋمدارعا قول قويۋ كۇتىلەدى.
«جوعارى دەڭگەيدەگى كەزدەسۋدىڭ كۇنتارتىبىندەگى باستى سۇراقتاردىڭ ءبىرى – ش ى ۇ- نى ودان ارى كەڭەيتۋ. قازىردىڭ وزىندە ش ى ۇ- عا مۇشە مەملەكەت مارتەبەسىن الۋ ماقساتىندا يران يسلام رەسپۋبليكاسىنىڭ مىندەتتەمەلەرى تۋرالى مەموراندۋم قول قويۋعا دايىن تۇر. قۇجات ءىس جۇزىندە وسىناۋ تاياۋشىعىستىق ءىرى ەلدىڭ ءبىزدىڭ ۇيىمىمىزعا تولىققاندى مۇشە بولۋىنا جول اشادى. بۇعان قوسا، تولىققاندى مۇشە، بايقاۋشى جانە ديالوگ بويىنشا سەرىكتەس فورماتىندا شىۇ قىزمەتىنە قاتىسۋعا شامامەن تاعى 10 ەلدىڭ ءوتىنىمى قارالادى»، - دەپ اتاپ وتەدى ۆەدومستۆو باسشىسى مىندەتىن اتقارۋشى.
بۇگىن شاڭحاي ىنتىماقتاستىق ۇيىمىنىڭ قۇرىلعانىنا 21 جىل تولدى. قازىرگى ۋاقىتتا ونىڭ قۇرامىندا قازاقستان، ءۇندىستان، قىتاي، قىرعىزستان، رەسەي، تاجىكستان، پاكىستان جانە وزبەكستان بار. سونىمەن قاتار اۋعانستان، بەلارۋس، يران جانە موڭعوليانىڭ بايقاۋشى ەل، ال ازەربايجان، ارمەنيا، كامبودجا، نەپال، تۇركيا جانە شري-لانكانىڭ سەرىكتەس ەل مارتەبەسى بار.
اۆتور: مارلان جيەمباي