جاقىندا وزبەكستان پرەزيدەنتى شاۆكات ميرزيەيەۆ جاياۋ جۇرەتىندەرگە ايىنا 100 دوللارعا دەيىن تولەماقى بەرۋ جايلى جارلىق شىعاردى. كورشى ەلدەگى 18 جاسقا تولعان ءاربىر ازامات كۇنىنە 10 مىڭنان كوپ قادام جۇرسە، 3 مىڭ سۋم ($0,3) تولەنەدى ەكەن. كورسەتكىشتى تىركەيتىن ارنايى سايت جاسالادى. ال قانشا قادام جاساعانىن ەسەپتەۋ ءۇشىن ارنايى قۇرىلعى جاسالادى.
ءبىراق نەگە 10 مىڭ قادام؟
بۇل مەجە ⅩⅩعاسىردا پايدا بولعان ەكەن. وتكەن عاسىردا قادام ولشەيتىن قۇرىلعىنى جاساۋشىلار 10 مىڭ قادامدى نورما ەتىپ بەكىتكەن. سودان بەرى بۇل كورسەتكىش وزگەرمەدى.
جۇرەگى اۋىراتىن ناۋقاستارعا دارىگەرلەر تازا اۋادا كوپ جۇرۋگە كەڭەس بەرەدى. ويتكەنى جاياۋ ءجۇرۋ دەنەنى شىمىر ەتىپ، تازا اۋا وكپەگە جاقسى اسەر ەتەدى.
دەنساۋلىقتى مىعىم ۇستاۋدىڭ ەڭ وڭاي جولى - كوبىرەك جاياۋ ءجۇرۋ. ادامنىڭ ءار قادامىن سانايتىن فيتنەس- بىلەزىك تاۋلىگىنە 10 مىڭ قادام جاساۋعا كەڭەس بەرەدى. ونىڭ ىشىندە دۇكەنگە بارۋ، باسپالداقپەن كوتەرىلۋ، جاياۋ سەرۋەندەۋ سەكىلدى قاراپايىم نارسەلەر كىرەدى. بۇل جەردە ەڭ ماڭىزدىسى - ادامنىڭ كوبىرەك قيمىلداۋى. ادام نەعۇرلىم كوبىرەك قيمىلداسا، دەنساۋلىققا سوعۇرلىم جاقسى اسەرىن تيگىزەدى.
JAMA Internal Medicine عىلىمي جۋرنالىندا ادامنىڭ كۇندەلىكتى جاساعان قادامى مەن ءومىر جاسىنىڭ قىسقارۋى اراسىنداعى بايلانىس تۋرالى زەرتتەۋ جۇمىسى جاريالانعان. زەرتتەۋگە 72 جاستاعى 16 مىڭ ايەل قاتىسقان. ولار 4 جىل بويى فيتنەس- ترەكەردى تاعىپ جۇرگەن. ناتيجەسىندە كۇنىنە 7500 قادامنان كوپ جۇرگەندەر از قيمىلداعاندارعا قاراعاندا ۇزاق ءومىر سۇرگەن.
عالىمدار كۇنىنە كەمىندە 30 مينۋت نەمەسە 10 مىڭ قادام ءجۇرۋ ەڭ وڭتايلى شەشىم دەيدى. ءبىراق بۇل بارلىق ادامعا شاققانداعى ەڭ تومەنگى كورسەتكىش ەكەنىن ەسكەرگەن ءجون. سول ءۇشىن تەك جاياۋ ءجۇرىپ قانا قويماي، دەنە شىنىقتىرۋمەن شۇعىلدانىپ، كوبىرەك قيمىلداعان دۇرىس.
ماماندار كۇنىنە كەم دەگەندە 30 مينۋت جاياۋ ءجۇرۋدىڭ پايداسىن بىلايشا تىزبەكتەيدى:
- رۋحاني سەرگەكتىك بەرەدى. مەزگىل وزگەرىستەرىندە اسىرەسە كۇز ايلارىندا دەپرەسسياعا بەيىمدىلىك بايقالادى. ال جاياۋ ءجۇرۋ شوكولادتان دا كوپ باقىت گورمونىنىڭ ءتۇزىلۋىن قامتاماسىز ەتەدى.
- مي جاقسى جۇمىس ىستەيدى. ميعا قاتىستى زەرتتەۋلەر قوزعالىستاعى ادامنىڭ ميى وتىرىپ جۇمىس ىستەيتىن ادامعا قاراعاندا جىلدام ويلاناتىنى جانە جاڭا پىكىرلەر قالىپتاستىرا الاتىنى انىقتالعان.
- ارىقتاۋعا كومەكتەسەدى. ۇيدەن جۇمىسقا، جۇمىستان ۇيگە كەم دەگەندە 30 مينۋد جاياۋ جۇرەتىن بولساڭىز، مايدىڭ ەرۋىنە 2 پايىز ىقپال ەتەسىز.
- سونداي- اق زەرتتەۋلەر اسىقپاي، باياۋ جۇرۋگە قاراعاندا ءبىر قالىپتى جىلدام تەمپتى ءجۇرۋدىڭ پايداسى كوبىرەك ەكەنىن كورسەتكەن.
- سوزىلمالى اۋرۋلاردان قورعاناسىز. جاياۋ ءجۇرۋ قان قىسىمىن 11 بالعا ازايتادى جانە سال اۋرۋىنا شالدىعۋ قاۋىپىن 20-30 پايىزعا ازايتادى. اپتادا 5 كۇن 30 مينۋت جاياۋ ءجۇرۋ ارقىلى جۇرەك اۋرۋ قاۋپىن 30 پايىزعا ازايتا الاسىز.
- جۇيەلى تۇردە جاياۋ ءجۇرۋ ۆاريكوز قاۋپىن ازايتادى. قان اينالىمىن رەتكە كەلتىرەدى.
- جاياۋ ءجۇرۋ ارتىق سالماقتان ارىلىپ، بۋىندارعا تۇسەتىن جۇكتى ازايتۋمەن قاتار وتتەگىنىڭ بۋىندارعا جاقسى تاراۋىن قامتاماسىز ەتەدى.
- وزىڭىزگە ۋاقىت بولە الماي جۇرگەن بولساڭىز جاياۋ ءجۇرىڭىز. ادام كوبىنەسە جۇرگەن كەزدە جەكە قالادى جانە ويلانادى. تۇرمىس- تىرشىلىگىڭىزدى تالداۋ، كەلەڭسىزدىكتەرگە شەشىم ىزدەۋ، كوپشىلىكتەن جىراق شىعىپ ىشكى سەزىمدەردى تىڭداۋ ءۇشىن جاياۋ ءجۇرۋدى بايقاپ كورىڭىز.
massaget.kz