قىستى كۇنى تۇماۋ ىندەتكە اينالىپ، بىرەۋىمىز سىرقاتتانساق، ءۇي ءىشىنىڭ ءبارى جابىلا اۋىراتىنى دا بار. تۇماۋدىڭ الدىن الۋعا جاردەمدەسەتىن مىناداي امالداردى ۇسىنامىز.
قولىڭىزدى ءجيى جۋىڭىز. بالا كۇننەن- اق قۇلاققا قۇيىلاتىن بۇل اقىلدىڭ پايداسى مول. تۇماۋمەن اۋىراتىن ادام تۇشكىرگەندە، جوتەلگەندە اۋزىن قولىمەن جابادى. سوسىن سول قولىمەن تەلەفون تۇتقاسىن، ىدىس- اياقتى، كومپيۋتەر تەتىكتەرىن، اۆتوبۋس تۇتقالارىن، تاعى باسقا نارسەلەردى ۇستايدى. سول جەرلەردە اۋرۋ قوزدىرعىشتارى بىرنەشە اپتا بويى تىرشىلىك ەتەدى. ەگەر جاقىن ماڭدا قول جۋاتىن جەر بولماسا، وزىڭىزبەن بىرگە ىلعال سالفەتكالار الىپ ءجۇرىڭىز. ول دا بولماسا، قولدى جۋعان سەكىلدى ىسقىلاپ قويۋعا بولادى. قولدى وسىلاي قۇرعاقتاي جۋۋ كەيبىر باكتەريالاردى جويادى.
بەتىڭىزگە قول تيگىزبەڭىز. ۆيرۋستار تانگە كوز، اۋىز، مۇرىن ارقىلى ەنەدى. بالالار كوبىنە اۋرۋدى وسىلايشا جۇقتىرادى.
سۇيىقتىقتى مول ءىشىڭىز - كۇنىنە 2 ليترگە جۋىق. سۋ تاننەن زياندى زاتتاردى شىعارادى ءارى ىلعالداندىرادى.
مونشاعا ءجيى بارۋعا تىرىسىڭىز. بۋدىڭ ەمدىك اسەرىنىڭ قۇپياسىن زەرتتەۋشىلەر ازىرگە اشقان جوق. الايدا 1989 -جىلى نەمىس مەديكتەرى بۇلاۋ مەن سەبىلدەن گورى مونشانى ۇناتاتىن ادامداردىڭ ەكى ەسە سيرەك اۋىراتىنىن انىقتاعان. تەوريالاردىڭ ءبىرى بويىنشا، 80 گرادۋسقا دەيىن قىزدىرىلعان سۋمەن تىنىس الا وتىرىپ، ءبىز ىشتەگى ۆيرۋستاردى ولتىرەمىز.
تازا اۋادا ءجيى سەرۋەندەڭىز، بولمەنى جەلدەتىڭىز. قىستى كۇنى ۇيدەگى جىلۋ كوزدىڭ، اۋىز بەن مۇرىننىڭ شىرىشتى قاباتىن كەپتىرىپ تاستايدى، سودان كەلە بۇل مۇشەلەر ۆيرۋستارعا دارمەنسىز بولىپ قالادى.
دەنە شىنىقتىرۋمەن اينالىسىڭىز. اسىرەسە اەروبيكا پايدالى. جاتتىعۋلار جۇرەكتى، وكپەلەردى، تەر بەزدەرىن بەلسەندى جۇمىس جاساۋعا يتەرمەلەيدى. وسىنىڭ ناتيجەسىندە ۆيرۋستاردى ولتىرەتىن جاسۋشالار بەلسەندى تۇردە تۇزىلە باستايدى.
وسىمدىك ونىمدەرىن قويۋ جاسىل، قىزىل، سارى ءتۇستى جەمىستەر مەن كوكونىستەر، مايى از يوگۋرتتاردى از جەڭىز. بۇلار يممۋنيتەتتى ىنتالاندىرادى.
تەمەكىدەن باس تارتىڭىز. ءتىپتى تەمەكى تۇتىنىمەن تىنىس الۋدىڭ ءوزى مۇرىن مەن وكپەنىڭ شىرىشتى قاباتىن كەپتىرەدى، سونىڭ سالدارىنان يممۋنيتەت زارداپ شەگەدى.
الكوگولدەن اۋلاق بولىڭىز. ىشىمدىك ءتاندى سۋسىزداندىرادى جانە ماڭىزدى تازارتقىش جۇيە - باۋىرعا زياندى.
دەنەڭىزدى بوساڭسىتىڭىز. ەگەر جانىڭىز جاي تاباتىن بەينەلەردى ەلەستەتسەڭىز، يممۋندىق جۇيە ىسكە قوسىلادى. ادام بوساڭسىعان كەزدە قاندا ۆيرۋسقا قارسى اسەر ەتەتىن ينتەرلەيكيندەر كوبەيەدى. بۇنى ارنايى زەرتتەۋلەر دالەلدەگەن. ارينە، دەنەنى سانالى تۇردە بوساڭسىتۋ ۋاقىتتى قاجەت ەتەدى - وعان بىرنەشە اي بويى كۇنىنە جارتى ساعاتتان ءبولۋ كەرەك.