بۇل تۋرالى ۇكىمەتتىڭ باسپا ءسوز ورتالىعىندا وتكەن بريفينگ بارىسىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى مالىمدەدى، دەپ حابارلايدى قازاقپارات ءتىلشىسى.
«ازىرەت سۇلتان جوباسى شەتەلدىك قوناقتار مەن قازاقستاندىقتار ءۇشىن زيارات ەتەتىن ورىنعا اينالادى. قازىرگى تاڭدا تۇركىستانعا جىلىنا 1,5 ميلليون ادام كەلەدى. ال 2025 -جىلعا قاراي ءبىز تۋريستەردىڭ سانىن 10 ميلليون ادامعا دەيىن كوبەيتەمىز» ، - دەپ مالىمدەدى مينيستر.
ارىستانبەك مۇحامەدي ۇلى وسى جىلدىڭ 29 - قىركۇيەگىندە مەملەكەت باسشىسىنىڭ تۇركىستان وڭىرىنە ساپارى بارىسىندا مينيسترلىك ەلىمىزدىڭ ەجەلگى نىساندارىنىڭ ءبىرى - تۇركى الەمىنىڭ رۋحاني ورتالىعى «ازىرەت سۇلتان» مۇراجاي- قورىعىنىڭ تارتىمدىلىعىن دامىتۋدىڭ ۇزاق مەرزىمدى جوسپارىن ۇسىنعانىن ەسكە سالدى. وعان سايكەس، تۇركىستان قالاسىنىڭ ورتا عاسىرداعى قالپىن 88 گەكتار اۋماقتا قالپىنا كەلتىرۋ كوزدەلۋدە. ول - يۋنەسكو- نىڭ ەڭ ءىرى الەمدىك مۇرالارىنىڭ ءبىرى بولماق.
«بۇل جوبا ەجەلگى پومپەي قالاسىنداعى اشىق اسپان استىنداعى مۇراجايدىڭ، يەرۋساليم، وسمان يمپەرياسىنىڭ توپكاپى سارايىن قالپىنا كەلتىرۋدىڭ تاجىريبەسىن ەسەپكە الا وتىرىپ جاسالدى. حالىقارالىق ستاندارتتارعا ساي بولۋ ءۇشىن جوبانى دامىتۋعا جەتەكشى حالىقارالىق عالىمدار مەن ساراپشىلار تارتىلدى، ءتۇپنۇسقا كوزدەر زەرتتەلىپ، عىلىمي مۇراعاتتىق دەرەكتەر جانە ارحەولوگيالىق جۇمىستار يۋنەسكو وكىلدەرىمەن كەلىسىلدى» ، - دەدى ارىستانبەك مۇحامەدي ۇلى.
ەسكە سالا كەتسەك، 19 - ماۋسىمدا مەملەكەت باسشىسى نۇرسۇلتان نازاربايەۆ تۇركىستان وبلىسىن قۇرۋ تۋرالى جارلىققا قول قويعان بولاتىن.
«بۇگىن «قازاقستان رەسپۋبليكاسىنىڭ اكىمشىلىك- اۋماقتىق قۇرىلىسى تۋرالى» زاڭىنىڭ توعىزىنشى بابىنا سايكەس، شىمكەنت قالاسىنا رەسپۋبليكالىق ماڭىزى بار قالا مارتەبەسىن بەرۋ جانە وبلىس ورتالىعىن تۇركىستان قالاسىنا كوشىرۋ تۋرالى جارلىققا قول قويعالى وتىرمىن. بۇدان بىلاي بۇل ءوڭىر تۇركىستان وبلىسى دەپ اتالاتىن بولادى. وسى اكىمشىلىك اۋماقتىڭ قۇرىلىمىنا وزگەرىس ەنگىزۋ ارقىلى بۇل ءوڭىردىڭ وركەندەۋىنە تىڭ سەرپىن بەرۋدى كوزدەگەن تاريحي قۇجات بولىپ سانالادى» ، - دەگەن ەدى مەملەكەت باسشىسى.