شاڭحايدا قازاقستاننىڭ 10 فيلمى كورسەتىلەدى

استانا. قازاقپارات - «ءبىر بەلدەۋ، ءبىر جول» باعدارلاماسى اياسىندا حالىقارالىق «The Most Credible Award 2018»  فەستيۆالىندە قازاقستاننىڭ كينوتۋىندىلارى كورسەتىلمەك، دەپ حابارلايدى قازاقپارات ءتىلشىسى.

فەستيۆال شاڭحايدا 19-20 -قازان كۇندەرى وتەدى، وعان جىبەك جولىنىڭ بويىندا ورنالاسقان ەلدەردىڭ بارلىعى قاتىسادى. فەستيۆالگە يپ مان رەتىندە تانىلعان اكتەر Donnie Yan، اكتەر Sammo Hung، رەجيسسەر Zhang Jizhong سەكىلدى تانىمال تۇلعالار قاتىسادى.

«قوناقتار قاتارىندا بەلگىلى ءانشى ديماش قۇدايبەرگەن دە بار. سونداي-اق، وزگە دە قازاقستاندىق جۇلدىزدار قاتىسادى»، - دەپ مالىمدەدى «KOZ Production» باس ديرەكتورى، اكتەر مۇحاممەد-راسۇل كوزدىباي.

ونىڭ سوزىنە قاراعاندا، فەستيۆالگە ۇسىنىلعان 20 فيلمنىڭ التاۋى قىتاي كينوپروكاتىنا ىرىكتەپ الىنادى. بۇعان قازاقستاندىق كينولاردىڭ ايتارلىقتاي مۇمكىندىگى بار.

فەستيۆال 124 ەلگە ترانسلياتسيا جاسالادى. شارا قاتىسۋشىلارى 9 ەلدىڭ تانىمال مەديا وكىلدەرىمەن تانىسۋ مۇمكىندىگىنە يە بولادى.

مۇحاممەد- راسۇل كوزدىبايدىڭ ايتۋىنشا، ونىڭ كومپانياسى قازاقستاننىڭ «ۇلى جول» فيلمىنە قاتىسۋ بويىنشا Donnie Yan مەن دجەكي چاننىڭ جاۋابىن كۇتىپ وتىر.