استانا پيراميداسى تۋرالى 10 دەرەك

استانا. قازاقپارات - ەل ىشىندە پيراميدا اتالىپ كەتكەن بەيبىتشىلىك جانە كەلىسىم سارايى استانانىڭ نازار اۋدارارلىق ورىندارىنىڭ بىرىنە اينالدى.

كوپتەگەن شەتەلدىك جانە وتاندىق تۋريستەر وعان بارۋعا كەڭەس بەرەدى. قازاقپارات ەرەكشە عيمارات تۋرالى 10 دەرەكتى ۇسىنادى.

№1 دەرەك: بەيبىتشىلىك جانە كەلىسىم سارايىن سالۋعا ەكى مىڭعا جۋىق ءتۇرلى ۇلت وكىلدەرى اتسالىسقان. ونىڭ ىشىندە بريتاندىق ساۋلەتشى نورمان فوستەر مەن ونىڭ 100 ادامنان قۇرالعان كومانداسى بار. ساراي قۇرىلىسى 13-ايعا سوزىلعان. عيماراتتىڭ تومەنگى قاباتىنان حالىقارالىق كونكۋرستىڭ جەڭىمپازى اتانعان نورمان فوستەردىڭ اۆتورلىق ەسكيزدەرىن جانە قۇرىلىس سۋرەتتەرىن كورۋگە بولادى.

 

№2 دەرەك: عيماراتتىڭ نولدەن سەگىزىنشى قاباتقا دەيىنگى بيىكتىگى - 75 مەتر. ال جالپى اۋماعى - 28 مىڭ شارشى مەتر.

 

№3 دەرەك: 60 گرادۋس بۇرىشتا قيعاش قوزعالاتىن ليفتتەر دە سارايدىڭ بىرەگەيلىگى بولىپ سانالادى. مۇنداي ءليفتتى پاريجدەگى ەيفەل مۇناراسىنان جانە لاس- ۆەگاستاعى «لۋكسور» قوناق ۇيىنەن كەزىكتىرە الاسىز. عيماراتتا تىكە كوتەرىلەتىن جالعىز ليفت بار، ول سەگىزىنشى قاباتتا ورنالاسقان شاعىن ءماجىلىس زالىنا الىپ كەلەدى، زال تەرەزەسىنەن استانانىڭ پانورامالىق كورىنىسىن تاماشالاۋعا بولادى. ليفت قازاقستان رەسپۋبليكاسىنىڭ پرەزيدەنتىنە، ونىڭ قوناقتارىنا جانە مۇمكىندىگى شەكتەۋلى جاندارعا ارنالعان.

 

№4 دەرەك: 62x62 مەتر بولاتىن پيراميدانىڭ نەگىزى قۇرىشتان جاسالعان. مەتالل كونسترۋكتسيالارىنىڭ جالپى سالماعى 5 مىڭ 100 توننانى قۇرايدى. نورمان فوستەر قالانىڭ كۇرت كونتينەنتالدى كليمات جاعدايىن ەسكەرىپ، پيراميدا نەگىزىن وزگەرمەلى تىرەكتەردەن قۇراستىرعان. سوندىقتان دا، استانانىڭ اۋا تەمپەراتۋراسى -40 گرادۋسقا جەتكەندە، كونسترۋكتسيا 6 سانتيمەترگە قىسىلىپ، عيمارات ءپىشىنىنىڭ بۇزىلۋىنا جول بەرمەيدى.

№5 دەرەك: سەگىزىنشى قاباتتاعى شاعىن ءماجىلىس زالى «بەسىك» دەپ اتالادى. سەبەبى، دوڭگەلەك زالدى تىرەپ تۇرعان كولوننالار بەسىكتى ۇستاپ تۇرعان قولدى بەينەلەيدى. مۇندا ءتۇرلى ساياسي شارالار، كونگرەسستەر مەن سەزدەر ۇيىمداستىرىلادى. زالدا 100 ادامعا ورىن ازىرلەنگەن، ونىڭ ىشىندە 40 ورىن - شەڭبەر اينالاسىندا.

 

№6 دەرەك: ءۇشىنشى قاباتتان سەگىزىنشى قاباتقا دەيىنگى اينەكتە كوگەرشىندەر بەينەلەنگەن. ولاردى تانىمال ۆيتراجدى اينەك ديزاينەرى برايان كلارك سالعان. كوگەرشىندەردىڭ جالپى سانى - 130، بۇل قازاقستاندا بەيبىتشىلىك پەن كەلىسىمدە تۇرىپ جاتقان 130 ۇلتتى بىلدىرەدى.

 

№7 دەرەك: اتريۋم دەپ اتالاتىن ەڭ ۇلكەن ءماجىلىس زالىندا تىلەگەن تىلەك ورىندالادى دەگەن نانىم بار. ونىڭ ورتالىق بولىگى تۇتاس پيراميدانىڭ ورتاسى بولىپ سانالعاندىقتان، بارلىق وڭ ەنەرگيا وسىندا جينالادى. اتريۋمنىڭ جالپى اۋماعى - 2 مىڭ 185 شارشى مەتر. ءار ءۇش جىل سايىن مۇندا الەمدىك جانە ءداستۇرلى دىندەر كوشباسشىلارىنىڭ سەزى وتەدى. سونداي-اق، زال ءتۇرلى شارالارعا، نەكە قيۋ راسىمىنە دە پايدالانىلادى.

 

№8 دەرەك: پيراميدانىڭ ۇشار باسىنا اپاراتىن باسپالداقتار ءبىر بىرىمەن قيىلىسپايدى. ولار شىنايى جانە جاساندى وسىمدىكتەرمەن كومكەرىلگەن. دالىرەك ايتقاندا، وسىمدىكتەردىڭ p - گوللانديادان جەتكىزىلگەن ءتىرى وسىمدىكتەر بولسا، 0 - جاساندى.

 

№9 دەرەك: تۇتاس پيراميدا قاراڭعى جانە جارىق بولىكتەرگە بولىنگەن. ونىڭ ءۇشىنشى قاباتتان تومەن بولىگى جەراستى الەمىن بەينەلەيدى، سوندىقتان بارلىعى كۇڭگىرت رەڭكتە جوبالانعان. ءۇشىنشى قاباتتان باستاپ، جەر دەڭگەيى باستالادى جانە سايكەسىنشە مۇندا جارىق كوپ.

 

№10 دەرەك: ەڭ استىڭعى قاباتتا 21 ۇلتتىق كوستيۋم قويىلعان: قىرعىز، قازاق، قاراقالپاق، وزبەك، گرۋزين، ازەربايجان، ارميان، دۇڭگەن، بالقار، نەمىس، تاتار، بولگار، تۇرىك، رۋمىن، يوردان، ورىس، يۆريت، ۆايناح، ۋكراين، پولياك جانە كورەي كوستيۋمدەرى. مۇنىڭ بارلىعىن ەتنومادەني ورتالىقتار مەن ەلشىلىكتەر سىيلاعان. كورمە قازاقستان حالقى اسسامبلەياسى سەسسياسىنىڭ 15 جىلدىعىنا وراي اشىلعان جانە ۇنەمى تولىقتىرىلىپ وتىرادى.