قىتاي كونسۋلدىعى الماتىداعى اكۋشەرلىك عىلىمي ورتالىققا 10 كومپيۋتەر تارتۋ ەتتى
اتالعان مەكەمە ديرەكتورى دينارا مىرزاحمەتوۆانىڭ ايتۋىنشا، قىتاي كونسۋلدىعى قۇنى 2 ميلليون تەڭگە بولاتىن 10 كومپيۋتەردى عىلىمي ورتالىققا تارتۋ ەتكەن.
ق ح ر كونسۋلدىعى الماتىداعى اكۋشەرلىك عىلىمي ورتالىققا 10 كومپيۋتەر تارتۋ ەتتى«شىلدە ايىنان باستاپ قاعازباستىلىقتان قۇتىلىپ، ءبىرىڭعاي سيفرلاندىرۋ جۇيەسىنە كوشەمىز. وسى رەتتە بۇل قىتايدىڭ باس كونسۋلى اتىنان ءبىزدىڭ ورتالىققا كورسەتىلگەن ۇلكەن قايىرىمدىلىق بولىپ وتىر»، - دەدى دوڭگەلەك ۇستەل باسىندا ءسوز العان دينارا مىرزاحمەتوۆا.
ورتالىق باسشىسى بولاشاقتا ارىپتەستىك بايلانىستى ودان ءارى نىعايتا ءتۇسۋ جوسپاردا بارىن ايتا كەتتى.
«الداعى ۋاقىتتا ءبىلىم، عىلىم سالاسىندا قىتاي كونسۋلدىعىمەن كەلىسىمگە كەلىپ، ەكى جاق ماماندارىن الماستىرۋ شارالارىن ويلاستىرماقپىز. ءبىزدىڭ قىزمەتكەرلەر قىتايعا بارىپ، ولار جاقتىڭ ماماندارى بىزگە كەلىپ تاجىريبە الماسىپ جاتساق، جاقسى بولار ەدى. ءبىر-بىرىمىزدەن ۇيرەنەرىمىز كوپ دەپ ويلايمىن»، - دەدى ق ر د س م اكۋشەرلىك، گينەكولوگيا جانە پەريناتولوگيا عىلىمي ورتالىعى ديرەكتورى دينارا مىرزاحمەتوۆا.