ماڭعىستاۋداعى امال مەرەكەسىنە 10 مىڭعا جۋىق ادام كەلدى - فوتو، كەسكىن
الا تاڭمەن جاسى كىشىلەر وتپاندا تىگىلگەن كيىز ۇيلەردى ارالاپ، اقساقالدار مەن اقجاۋلىقتى اجەلەرگە بارىپ، اماندىق-ساۋلىق سۇراپ، كورىسۋدى باستادى. ۇلكەندەر كىشىلەرگە: «ءبىر جاسىڭمەن! ءومىر جاسىڭ ۇزاق بولسىن!» دەپ ەرەكشە مەيىرىممەن باتاسىن بەردى. ءدال وسى كۇنى ماڭعىستاۋدىڭ ءار ۇيىندە داستارحان جايىلىپ، ۇلتتىق تاعامدار قويىلادى. تۇرعىندار ءبىر- بىرىمەن قۇشاق جايا امانداسىپ، وكپە-رەنىشتەرىن كەشىرىستى.
شاراعا ارنايى كەلگەن وبلىس اكىمى ەرالى توعجانوۆ مەرەكەگە جينالعانداردى قۇتتىقتادى.
«قازاقستاننىڭ ەشبىر وڭىرىندە تويلانبايتىن بىرلىكتىڭ بەلگىسىنە، تاتۋلىقتىڭ تاڭباسىنا اينالعان قاستەرلى مەرەكەدە كەڭ قۇشاقتار ايقارا اشىلىپ، ءتوس توعىستىرىپ، الىس-جاقىن كورىسىپ، بار وكپە-ناز كەشىرىلەدى. تەگىن ۇمىتپاۋ تەكتىلىكتىڭ بەلگىسى»، - دەدى اكىم.
وسى جىلى امال مەرەكەسى رەسپۋبليكالىق دەڭگەيدە اتالىپ ءوتتى. ۇيىمداستىرۋشىلاردىڭ ايتۋىنشا، رۋحاني شارادا قازاق دالاسىنىڭ ونەرى، سالت-ءداستۇرى، ۇلتتىق بولمىستى بەينەلەيتىن قويىلىمدار قويىلىپ، ءان مەن جىر-تەرمەدەن شاشۋ شاشىلىپ، ۇلتتىق ونەردىڭ تيەگى اعىتىلدى.
تىڭداۋشىنىڭ قۇلاق قۇرىشىن قاندىرىپ، حالىقتىڭ رۋحاني ۇيىتقىسى بولعان كەشتى بۇگىن ايگۇل قوسانوۆا جۇرگىزدى. جىر كەشىنە استانادان كەلگەن كۇمىس كومەي، ءدۇلدىل جىرشى، كۇيشىلەر قاتىستى.
سونىمەن قاتار، مادەني شارادان بولەك، بۇگىن سپورتتىق ويىننىڭ دا جالاۋى جەلبىرەدى. رەسپۋبليكانىڭ ءار تۇكپىرىنەن كەلگەن بالۋاندار بوز كىلەمدە كۇشتەرىن سىنادى. 80 ك گ- عا دەيىن جانە ودان جوعارى تۇيە بالۋاندار بەلدەسۋىنە جاسى 18 دەن اسقان 40 سپورتشىلار قاتىستى. جەڭىستى اقتاۋلىق، اتىراۋلىق جانە ورالدىق سپورتشىلار قانجىعاسىنا بايلادى. ۇزدىك ۇشتىككە اقشالاي سىيلىقتار تابىستالدى. بۇدان بولەك گير كوتەرۋ مەن قوي كوتەرۋدەن دە جارىس ءوتتى.
سونداي-اق، ءار ايماقتان كەلگەن قوناقتار شەبەرلەردىڭ كوز مايىن تاۋىسىپ جاساعان جۇزدەن استام بۇيىمىن تاماشالاپ، كەرەكتىسىن كادە-سىيعا الدى. ون ساۋساعىنان ونەر تامعان ۇستا، زەرگەر، تىگىنشى، توقىماشىلاردىڭ ەڭبەگى كوزدىڭ جاۋىن الادى.
ايتا كەتەيىك، وتپان تاۋ - بىرلىك پەن بەرەكەنىڭ سيمۆولىنا اينالىپ كەلەدى. جىل سايىن وتەتىن ءداستۇر كەلەسى جىلى دا جالعاسىن تابادى.