اقتوبەنىڭ ءار اۋدانى جاز بويى مادەني، سپورتتىق شارالار ۇيىمداستىرىپ، قايىرىمدىلىق اكسياسىن وتكىزدى. اقتوبە قالاسىندا كوشە كۇندەرى وتكىزىلىپ، تۇڭعىش پرەزيدەنت اتىنداعى ورتالىق ساياباقتا مادەني شارالار ۇيىمداستىرىلدى. قالا تۇرعىندارى مەن قوناقتارىن ءان مەن بيگە بولەگەن اۋدان حالقى كيىز ءۇي تىگىپ، تاريحي جادىگەرلەر كورمەسىن جاسادى. ءبىر-بىرىمەن جارىسقا تۇسكەن اۋداندار بۇگىن ۇزدىكتەرىن انىقتادى.
«ءبىزدىڭ مىندەتىمىز - ۇلتىمىزدىڭ ونەرىن، سالتىن، ادەبيەتىن، ءداستۇرىن كەلەسى ۇرپاققا جەتكىزۋ. مەملەكەت باسشىسى نۇرسۇلتان نازاربايەۆتىڭ تاپسىرماسىنا سايكەس «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى نەگىزگى مىندەتتەردىڭ ءبىرى ونەر، مادەنيەت، ادەبيەتىمىزگە زامان تالابىنا ساي جاڭالىقتى ەنگىزۋ قاجەت. «تۋعان جەرىم - نۇرلى ەلىم» اكسياسىن وتكىزگەندە دە وسى ماقساتتى كوزدەدىك. اقتوبەدە تۇرىپ جاتقان ازاماتتارعا، اقتوبەدە تۋىپ، باسقا جەردە ءومىر ءسۇرىپ جاتقان جەرلەستەرىمىزگە تۋعان ەلىنە، قازاقستانعا، وتانىنا دەگەن سۇيىسپەنشىلىگىن ارتتىرۋ ماقسات بولدى. جاز بويى ءار اۋدان، اقتوبە قالاسى، اۋىلدىق وكرۋگتەر كۇندەرىن وتكىزدى. اۋداننىڭ مۇمكىندىكتەرىن، جەتىستىكتەرىن كورسەتۋدى كوزدەپ، كومەككە مۇقتاج ادامدارعا كومەكتەسۋ ويعا الىندى. ءالى دە بولسا كەمشىلىكتەر بار. ءار نارسە باسشىعا بايلانىستى. اكىمى مىقتى بولسا، شارا جاقسى وتەدى. تالانتتار بار، ولاردى ىزدەپ، تانىتىپ، قولداۋ كەرەك. ولار اقتوبەدە عانا ەمەس، قازاقستاندا، شەتەلدە ءوز اتىن تانىتادى»، - دەدى اقتوبە وبلىسىنىڭ اكىمى بەردىبەك ساپاربايەۆ. ءوڭىر باسشىسى ءوز سوزىندە اعايىندى جۇبانوۆتار وتباسىنىڭ ونەرى ەلگە، الەمگە تانىلعانىن مىسالعا كەلتىردى.
ايتا كەتەيىك، «تۋعان جەرىم - نۇرلى ەلىم» شاراسى كەزىندە حرومتاۋ اۋدانىنىڭ «زامانداستار» حالىقتىق اجەلەر حورى «ماۋسىمجان»، بايعانين اۋدانىنان كەلگەن «اقنيەت» وتباسىلىق ءانسامبلى «گۇلدەر-ايىم» ءانىن ورىندادى. قارعالى اۋدانىنىڭ فولكلورلىق ءانسامبلى «لوجكاري» اتتى كومپوزيتسياسىن، شالقار اۋدانى تەاترلاندىرىلعان ادەبي-مۋزىكالىق قويىلىمىن ۇسىندى. مەرەكەلىك كەش سوڭىندا جەڭىمپازدار ماراپاتتالدى. العىس حات جانە 1 ميلليون تەڭگە سىياقى سپورتتىق شارالاردى ۇزدىك ۇيىمداستىرعان شالقار اۋدانى، ۇزدىك كورمە ۇسىنعان بايعانين اۋدانىنا بەرىلدى.
ۇزدىك كوشە مەرەكەسىن ۇيىمداستىرعانى ءۇشىن «تاريحي ەسىم - ۇرپاققا ۇلاعات» نوميناتسياسى بويىنشا ويىل اۋدانىنا 1,5 ميلليون تەڭگە تاپسىرىلدى.
مارتوك اۋدانى دا 1,5 ميلليون تەڭگە الدى. ال اۋىل شارۋاشىلىعى جارمەڭكەسىن ۇزدىك ۇيىمداستىرعان تەمىر اۋدانى بولدى. بۇل اۋدانعا 2 ميلليون تەڭگە بۇيىردى. «ونەرىمەن ءورىستى» نوميناتسياسىن مۇعالجار اۋدانى يەلەندى. ال باس جۇلدەنى قوبدا اۋدانى الدى. اۋدانعا 10 ميلليون تەڭگەنىڭ سەرتيفيكاتى بەرىلدى.