ا ق ش اسكەرى اۋعانستاندا ءالى كەم دەگەندە 10 جىل بولادى
بۇل تۋرالى ا ق ش كونگرەسى سەناتىنىڭ سىرتقى ىستەر جونىندەگى كوميتەتىنىڭ ءتوراعاسى بوب كوركەر ءمالىم ەتتى، دەپ حابارلايدى تاسس اگەنتتىگى.
بۇل رەتتە، ول ا ق ش اسكەرى ميسسياسىنىڭ اۋعانستاندا بولۋىنىڭ ماقساتى مەن مىندەتى ۇلكەن ماڭىزعا يە ەكەندىگىن اتاپ ءوتتى. «ءبىز كەلەسى قادامىمىزدا ساق بولۋىمىز قاجەت»، - دەپ ەسكەرتتى سەناتور. ونىڭ پايىمىنشا، كابۋلداعى بيلىكتى كۇشەيتۋدىڭ جانە اۋعانستان تاعدىرى ءۇشىن جاۋاپكەرشىلىكتى وزدەرىنە تاپسىرۋدىڭ جولدارىن ىزدەستىرۋ كەرەك.
ا ق ش قىركۇيەك ايىندا اۋعانستانعا قوسىمشا 3 مىڭنان استام اسكەري قىزمەتشىنى اتتاندىرۋ شەشىمىن قابىلدادى. وسىلايشا، جۋىق ارادا امەريكانىڭ اۋعان ەلىندەگى اسكەري كونتينگەنتىنىڭ سانى 14 مىڭ ادامعا جۋىقتاماق.
ا ق ش اۋعانستانداعى اتالمىش اسكەري وپەراتسيانى 2001 -جىلدىڭ كۇزىندە باستاعان بولاتىن. 2011 -جىلى اۋعانستانداعى امەريكالىق اسكەريلەردىڭ سانى 101 مىڭ ادامدى قۇرادى. وسى ۋاقىتقا دەيىن ا ق ش- تىڭ 2 مىڭنان استام اسكەري قىزمەتشىسى قازا بولىپ، 17 مىڭى جارالاندى.