ايەلدەر ومىراۋىن مەزگىلدىك تەكسەرتۋ ءۇشىن ماممولوگقا بارۋدىڭ 10 سەبەبى
ىسىك اۋرۋلارىنىڭ ىشىندەگى ەڭ ءبىرىنشى ورىندا ومىراۋ قاتەرلى ىسىگى تۇرعانىن جاقسى بىلەسىزدەر. سوندىقتان جىل سايىن ماممولوگقا كورىنىپ وتىرساڭىز، اۋرۋدىڭ الدىن الاسىز.
ومىراۋدى مەديتسينالىق تەكسەرىستەن وتكىزۋگە ايتارلىقتاي سەبەپ بولماسا دا، تەكسەرتۋ كەرەك. اۋرۋ ءبىر جەرىڭىزدى مازالامايىنشا وتىرا بەرۋگە بولمايدى، الدىن الۋ كەرەك. جىلىنا ءبىر رەت ماممولوگتىڭ قابىلداۋىندا بولۋدى ادەتكە اينالدىرىڭىز. ارنايى مامانعا قارالۋدى قاجەت ەتەتىن توتەنشە سەبەپتەردى ەسەپكە الماڭىز.
ەتەككىر كەلەر الدىندا ومىراۋدىڭ قاتقىلدانىپ، ءسۇت بەزىنىڭ اۋىرسىنۋى باستالىپ كەلە جاتقان ماستوپاتيانىڭ بەلگىسى بولۋى مۇمكىن.
ومىراۋىڭىزدى بايقاۋسىزدا سوعىپ الىپ، وعان اسا نازار اۋدارماي جۇرە بەرۋىڭىز مۇمكىن. ومىراۋدىڭ جەڭىل بولسىن، اۋىر بولسىن، كەز كەلگەن جاراقاتى اۋرۋلار تۋعىزادى.
ويدا جوقتا بولعان تۇسىكتەر مەن جاساندى تۇسىكتەر (ابورت) تا ءسۇت بەزىنىڭ قابىنۋىنا الىپ كەلەدى. جاسىڭىزدان وتىزدان اسسا دا، ءالى بالا تۋماعان بولساڭىز، ومىراۋىڭىزدى تەز ارادا تەكسەرتىڭىز. بولاشاق اناعا مىندەتتى تۇردە ماممولوگقا كورىنۋى كەرەك. ويتكەنى، ەكىقابات كەزدە اعزاسى كۇردەلى وزگەرىسكە ۇشىرايدى.
ەگەر ءسۇت بەزىنە وزگەرتۋ ەنگىزۋ ءۇشىن وتا جاساتپاق بولساڭىز دا، ماممولوگقا كورىنىڭىز. گورمونالدى ءدارى- دارمەك قابىلداۋ دا مامانعا كورىنۋدى قاجەت ەتەدى.
بالا ەمىزۋ كەزىندە ءسۇتتىڭ تۇسىنە مۇقيات نازار اۋدارىڭىز. ءتوسىڭىز اۋىرىپ، ءسۇتتىڭ ءتۇسى مەن قويۋلىعى وزگەرىپ، دەنە قىزۋى كوتەرىلسە، دارىگەرگە جۇگىرگەنىڭىز ءجون.
ءسۇت بەزىنىڭ ءتۇرلى اۋرۋلارعا ۇشىراۋىنا قان قۇرامىنداعى ەستروگەننىڭ كوتەرىلىپ كەتۋى اسەر ەتەدى.
ومىراۋ ۇرپەگىنە (ەمشەكتىڭ ۇشى) مۇقيات قاراڭىز. اۋىرۋ، ءتۇسىنىڭ، فورماسىنىڭ، ۇرپەك جيەگىنىڭ وزگەرۋى، ۇشىنان سۇيىقتىقتىڭ ءبولىنۋى - بۇلاردىڭ ءبارى ءسىزدى ويلاندىرۋى كەرەك. دارىگەرگە بارىڭىز.
اناڭىز جاقتان تۋىستارىڭىزدىڭ ءسۇت بەزى اۋرۋلارى بار ما، جوق پا، سۇراستىرىڭىز. ەگەر قاتەرلى ىسىكپەن اۋىرعان ادام بولسا، ءسىز قاۋىپتى ايماقتاسىز. بۇل اۋرۋ تۇقىم قۋالاۋى دا مۇمكىن.
جاقىندا عانا قىرىققا تولعان مەرەيتويىڭىزدى تويلادىڭىز با؟ ەندەشە ماممولوگ دوسىڭىزعا اينالۋى ءتيىس.