قازاقستاندىق جاس بوكسشىلار سەربيادان 10 التىن اكەلدى - فوتو
10 مەملەكەتتىڭ سپورتشىلارى قاتىسقان سايىستا قازاقستاندىق بوكسشىلار ءبىرىنشى ورىنعا يە بولدى.
قازاقستاننىڭ بوكس فەدەراتسياسى حابارلاعانداي، قازاقستاندىق ەۆگەني پاۆلوۆ (49 كەلى) ، ورازبەك اسىلقۇلوۆ (52 كەلى)، ءال- مۇحامەد ماحمۇت (56 كەلى)، سانات-ءالى تولتايەۆ (60 كەلى)، سادريددين احمەدوۆ (69 كەلى)، نۇرلان سابىروۆ (81 كەلى) جانە مۇحامەدجان تايباعار (91 كەلى) التىن مەدالدى جەڭىپ العان. قىزدار اراسىندا اقنيەت ءابدىعوجا (54 كەلى)، ۆلاديسلاۆ كۋحتا (60 كەلى) جانە ناديرا ماراتوۆا (+81 كەلى) سەربيا تورىندە كوك بايراعىمىزدى جەلبىرەتتى.
- كوماندامىزدىڭ كورسەتكەن ويىنىنا كوڭىلىمىز تولادى، - دەدى بوكس بويىنشا ق ر جاستار قۇراماسىنىڭ باس باپكەرى عالىمبەك كەنجەبايەۆ. - بۇل تۋرنير - قاراشا ايىندا سانكت-پەتەربۋرگتە وتەتىن الەم چەمپيوناتىنا دايىندىقتىڭ ءبىر كەزەڭى. ول بىزگە قالاي جۇمىس ىستەۋ كەرەكتىگىن كورسەتتى. تامىز ايىندا گەرمانيادا وتەتىن تاعى ءبىر حالىقارالىق تۋرنير بار، وعان باسقا قۇراممەن بارامىز.
ءبىزدىڭ كوماندادا باسەكەلەستىك وتە جوعارى. كىم جاقسى دايىندالىپ، ءوزىن كورسەتە بىلسە، الەم چەمپيوناتىنا سول بارادى. الەم بويىنشا بوكس سپورتى دامىپ كەلەدى. ادەتتەگىدەي رەسەي مەن كۋبا ۇزدىك ناتيجەلەر كورسەتۋدە. بۇل سالادا بۇرىن اتى شىقپاعان مەملەكەتتەر دە جەتىستىككە قول جەتكىزۋدە، ماسەلەن ماروككو. وسىنداي مىقتى قارسىلاستارمەن شايقاسىپ، ازىرگە جامان ناتيجە كورسەتكەنىمىز جوق.