ەلوردادا «اسپاننىڭ ماڭگىلىك نازارىندا» اتتى 10 سەريالى عىلىمي-تانىمدىق دەرەكتى فيلمىنىڭ تۇساۋكەسەرى وتەدى
فيلمدى قازاقستان رەسپۋبليكاسى مادەنيەت جانە سپورت مينيسترلىگى مەن قازاق عىلىمي-زەرتتەۋ مادەنيەت ينستيتۋتىنىڭ تاپسىرىسى بويىنشا «مەرگەن» ستۋدياسى تۇسىرگەن. بۇل بىرەگەي جوبا نۇرسۇلتان نازاربايەۆتىڭ «عاسىرلار توعىسىندا» كىتابى نەگىزىندە قازاق حاندىعىنىڭ 550 جىلدىق مەرەيتويىنا ارنايى دايارلاندى.
فيلمدە «اسپاننىڭ ماڭگىلىك نازارىندا» ەلدىڭ باستى تاريحي وقيعالارى - ۇلى جىبەك جولى، كەرەي مەن جانىبەك حانداردىڭ 1465-جىلدان باستاپ بيلىك قۇرعان، ياعني قازاق حاندىعىنىڭ نەگىزى قالانعان كەزەڭ، موڭعول شاپقىنشىلىعى مەن الەمدىك گەوساياسي تۇرعىداعى قايتا ءبولىسۋ، تاۋەلسىز قازاقستاننىڭ قۇرىلۋى، ۇلتتىق بىرلىكتىڭ جاڭا سيمۆولىنا اينالعان - ەلوردا استانا جانە زاماناۋي مەملەكەتتىڭ نەگىزىن قالاۋعا باعا جەتپەس ۇلەس قوسقان - ۇلت كوشباسشىسى ن. ءا. نازاربايەۆتىڭ تاريحي تۇلعاسى ايقىندالعان.
فيلمنىڭ ءار سەريالى ءوز الدىنا تۋىندى بولىپ تابىلادى، وندا كوشپەلى حالىقتاردىڭ ەجەلگى زاماننان بەرگى دۇنيەتانىمى جايلى، الەمدىك وركەنيەت پەن «مادەنيەتتەر بايلانىسى» جەتىستىكتەر مەن جاڭالىقتار، جابايى جىلقىنى قولعا ۇيرەتۋ مەن العاشقى مەتاللۋرگيالىق پەشتەردىڭ پايدا بولۋى، ۇزەڭگى مەن وتتىڭ جانە وزگە دە الەمدىك وركەنيەتتىڭ قۇندىلىعى بولىپ تابىلاتىن نوۋ-حاۋلاردى اشا تۇسەدى.
سەريال تەك تاريحي ەمەس، سونىمەن بىرگە قازاق حالقىنىڭ ۇلى مۇراسى سانالاتىن ميفولوگياعا، فولكلور مەن ەتنوگرافياعا نەگىزدەلگەن فيلوسوفيالىق، دۇنيەتانىمدىق بولىپ ەسەپتەلەدى.
ەسكە سالا كەتەيىك، 2015-جىلى ۆاشينگتون قالاسىنداعى دجوردج ۆاشينگتون ۋنيۆەرسيتەتىندە جانە نيۋ-يورك قالاسىنداعى روبەرت دە نيرونىڭ Tribeca كينوستۋدياسىندا ەكى سەريانىڭ اعىلشىن تىلىندە تۇساۋكەسەرى وتكەن بولاتىن. فيلم امەريكالىق اۋديتوريا اراسىندا ۇلكەن قىزىعۋشىلىققا يە بولىپ، قازاقستاننىڭ شەتەلدەگى مادەني بەينەسىن نىعايتقانى ءسوزسىز.
اۆتور: مارلان جيەمباي