الامان بايگە «التىن تۇلپار»: 10 جاسار اقجول مىنگەن سايگۇلىك وزا شاۋىپ، باس جۇلدەنى ولجالادى - فوتو

استانا. قازاقپارات - اقمولا وبلىسىنا قاراستى قابانباي باتىر اۋىلىندا، قاراكەرەي قابانباي باتىردىڭ كەسەنەسى ماڭىندا وتكەن «التىن تۇلپار» الامان بايگەسى 100 دەن استام جۇيرىكتىڭ ىشىنەن ناعىز تۇلپاردى انىقتادى.

51 شاقىرىمدى قۇرايتىن 4-اينالىمدا استىنداعى تۇلپارىنىڭ كۇشىن ساقتاپ، بايگەنىڭ 3-اينالىمى بويى «ادەيى» كوزگە تۇسپەي، سوڭعى مينۋتتاردا جۇيرىگى «شاماندى» قامشىلاپ، جەلدەي جۇيتكىگەن اقجول جۇماتاي بايگەنىڭ باس جۇلدەسىن جەڭىپ الدى.

«جاسىم وندا. بايگەدە قاتتى قورىققان جوقپىن. بۇل اتتى بۇرىننان بىلەمىن، ءوزىمنىڭ دوسىمداي»، - دەيدى شاباندوز اقجول.

ءبىر ايتا كەتەرلىگى, بايگەنى كورۋگە جينالعان حالىق سانىندا ەسەپ بولمادى. قازاق حاندىعىنىڭ 550 جىلدىعىنا وراي ۇيىمداستىرىلعان بايگە راسىمەن قازاقتىڭ ات شاپتىرىپ، اس بەرىپ، دالادا دۋمانداتاتىن بايىرعى سالتىن كوزگە ەلەستەتتى. ال، وزىق تەحنولوگيالاردى ورايىمەن پايدالانعان ۇيىمداستىرۋشىلار بايگە وتكەن جەرگە ەكى ۇلكەن ەكران ورناتىپ، جارىس جولىندا ءار ەكى شاقىرىم سايىن كامەرا قويعان. سونىڭ ارقاسىندا، 12,5 شاقىرىم بولاتىن ءار اينالىمدا ات سۇيەر قاۋىم قاي تۇلپاردىڭ وزا شاۋىپ كەلە جاتقانىن انىق كورىپ وتىردى. ونىڭ ۇستىنە، بايگە بارىسىن باستان- اياق ەكى تىكۇشاق توبەدەن بەينەكامەراعا ءتۇسىرىپ ءجۇردى.

ال، الامان بايگەگە كىم اتىن قوستى دەگەنگە كەلسەك، جارىس ەرەجەسىنە ساي 14 وبلىس پەن الماتى جانە استانا قالالارى الامانعا ءارقايسىسى ون تۇلپار قوسا الاتىن بولدى. ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان اتاپ وتكەندەي، «التىن تۇلپار» الامان بايگەسىنىڭ بيىلعى جۇلدە قورى 23 ميلليون تەڭگەنى قۇرايدى، سونىڭ ىشىندە، باس جۇلدە يەسىنە 10 ميلليون تەڭگە بەرىلەدى. بارلىعى، مارەگە العاش جەتكەن 9 تۇلپار ديپلوم مەن اقشالاي جۇلدەگە يە بولدى.

«حالقىمىزدىڭ سان عاسىرلىق ۇلتتىق سپورتىن جاڭعىرتقان «التىن تۇلپار» رەسپۋبليكالىق ءتۋرنيرى وتكەن جىلى «نۇر وتان» پارتياسىنىڭ قولداۋىمەن بىرىنشى رەت ۇيىمداستىرىلعان ەدى. سول ءداستۇر ەلىمىزدىڭ ايتۋلى مەرەكەسى - قازاق حاندىعىنىڭ 550 جىلدىعى اياسىندا جالعاسىن تاۋىپ وتىر. ەلباسى 2050 ستراتەگياسىندا ۇلتتىق مادەنيەتىمىز بەن ءداستۇرىمىزدى ۇلىلىعىمەن قوسىپ قورعاۋىمىز كەرەك دەپ اتاپ وتكەن بولاتىن. ساياسي دوكتريناسىندا ءداستۇردى دامىتۋدى باسىم باعىت ەتكەن «نۇر وتان» پارتياسى ۇلتتىق ونەر مەن سپورتتى تۇراقتى قولداپ كەلەدى.

جاقىندا عانا، پارتيانىڭ دەمەۋىمەن ەلوردا ىرگەسىندە «تەڭگە ىلۋ» مەن «اساۋ ۇيرەتۋدەن» ازيا چەمپيوناتى ءوتتى. ال، الامان جارىستىڭ باتىر بابامىز - قابانباي باتىر كەسەنەسىنىڭ جانىندا ءوتۋى دە ۇلكەن مانگە يە. حالقىمىزدىڭ بىرىگۋى مەن ىرگەلى ەل بولۋىنا قابانباي باتىردىڭ قوسقان ۇلەسى زور. بۇگىن ءوتىپ جاتقان بايگەنىڭ دە باستى ماقساتى - حالقىمىزدىڭ رۋحىن كوتەرۋ، بىرلىگىن نىعايتۋ. سونىمەن قاتار، وسى سپورت ءتۇرىن ۇلتتىق برەندكە اينالدىرۋ. سول ارقىلى جاس ۇرپاقتىڭ بويىنا ۇلتتىق قۇندىلىقتارعا دەگەن قۇرمەتتى وياتۋ»، - دەدى جاس جۇيرىكتەردى قارسى الا وتىرىپ، «نۇر وتان» پارتياسىنىڭ حاتشىسى فارحات قۋانعانوۆ.

ءبىرىنشى ورىن العان «شامان» اتتى تۇلپاردىڭ يەسى بولسا بۇگىن بالانىڭ دا باعى جانعان، جۇيرىكتىڭ دە بابى كەلىسكەن كۇن بولدى دەيدى قۋانىشىمەن بولىسە وتىرىپ.

«بايگە بويى تۇلپارىم مەن اقجول كوزگە كورىنگەن جوق، وزا شاپقان جوق. ەكەۋى دە سالماقتىلىق تانىتتى. جالپى، الامان بايگە اتتى دا، ادامدى دا سابىرلىققا ۇيرەتەتىن بايگە. بۇگىن اتتىڭ دا، بالانىڭ دا باعى جاندى. جىلقى مىقتى بولۋ كەرەك، ءبىراق، ۇستىندەگى شاباندوزى ودان دا مىقتى بولۋ كەرەك. كۇرەڭ توبەل ات پەن اقجول بۇرىننان ءبىرىنىڭ سىرىن ءبىرى بىلەدى. اقجول بۇل جىلقىنى ءوزى سۋارىپ، ءوزى جەمدەپ، ونىڭ دوسىنا اينالعان دەسەم بولادى. «شاماننىڭ» ۇلكەن جارىستاردا وزۋى - العاش رەت»، - دەيدى «شاماندى» باپتاپ اكەلگەن ەسبولات شىڭتاسيەۆ.

«ات سۇيەر قاۋىم. ءوزىنىڭ ۇلتتىق ءداستۇرىن اسپەتتەگەن اعايىن! ات دەگەندە ارقاسى قوزعان اعايىن، مىنا اق كوڭىلدەرىڭىزگە راحمەت! ءبىر اپتادا ءۇش رەت بايگە العان اتاقتى وكسىكبايدىڭ «قوزىكۇرەڭ» دەيتىن اتى بولعان، سول «قوزىكۇرەڭنىڭ» بەل بالاسىنداي بۇگىن قورداي وڭىرىنەن كەلىپ، مەرەكەمىزدىڭ ءارىن كىرگىزگەن تۇلپار مەن شاباندوز بالاعا راحمەت. ەلدەگى تىنىشتىقتىڭ، بەيبىت كۇننىڭ ارقاسىندا شاپقان اتىمىز بايگەدەن كەلىپ جاتىر. بۇگىن ۇلتتىق ءداستۇرىمىز سالتانات قۇرعان كۇن. كەشەگى قوزىباسىدا تۋ تىككەن كەرەي مەن جانىبەكتىڭ تۋىنداي بايراعىمىز استانادا جەلبىرەپ، ارقامىزدى قوزدىرىپ جاتىر. 550 جىل ەمەس، 5 مىڭ عاسىر تاريحى بولاتىن ماڭگىلىك ەلگە اينالايىق»، - دەدى بايگە يەسىنە 10 ميلليون تەڭگە، تۇلپارىنا التى جابۋ جاپقان ب. تىلەۋحان.

سونىمەن، «التىن تۇلپار» الامان بايگەسىنىڭ توعىز جۇلدەلى ورنىن العان شاباندوزدار مەن جۇيرىكتەر مىنالار:

9-ورىن - اسىلحان بەكىشيەۆ، اتى «قاسقالداق»، الماتى وبلىسى، 400 مىڭ تەڭگە؛

8-ورىن - دياس تۇرعانوۆ، اتى «نايزاعاي»، الماتى وبلىسى، 500 مىڭ تەڭگە؛

7-ورىن - نۇربولات ايدارلى، اتى «بويتۇمار»، جامبىل وبلىسى، 700 مىڭ تەڭگە؛

6-ورىن - دۋمان جانشا، اتى «اققاعاز»، قاراعاندى وبلىسى، 800 مىڭ تەڭگە؛

5-ورىن - قۋاتبەك ەدىل، اتى «تراكتور»، جامبىل وبلىسى، 900 مىڭ تەڭگە؛

4-ورىن - ەركەبۇلان ەرماعامبەتوۆ، اتى «بەكتورى»، قاراعاندى وبلىسى، 1 ميلليون تەڭگە؛

3-ورىن - ولجاس قويشىبەك، اتى «جاننۇر»، الماتى وبلىسى، 3 ميلليون تەڭگە؛

2-ورىن - مەيىرحان دالەلوۆ، اتى «بەيبارىس»، پاۆلودار وبلىسى، 5 ميلليون تەڭگە؛

1-ورىن - اقجول جۇماتاي، اتى «شامان»، جامبىل وبلىسى، 10 ميلليون تەڭگە.

اۆتور: كەنجەكەي توقتامۇرات قىزى