كورشىسى 10 جىل بويى جالاڭاش كولبەڭدەپ كەلەدى
ا ق ش-تىڭ سولتۇستىك كارولينا شتاتىنا قاراستى شارلوتت قالاسىنىڭ قوس تۇرعىنى 10 جىلدان بەرى ورتاق ءتىل تابىسا الماي كەلەدى. كورشىلەردىڭ بىرەۋى اپتاسىنا بىرنەشە رەت ءۇيىنىڭ كىرەبەرىسىندە تىرداي شەشىنىپ ءجۇرۋدى ادەتكە اينالدىرىپتى.
شاعىمدانۋشى تاراپتىڭ ايتۋىنشا، ۇستىندە ءىلىپ الار كيىمى جوق ەر ادام تابالدىرىقتا ارلى-بەرى ويقاستاپ، ءتىپتى ۇزاق ۋاقىت تەلەفون تۇتقاسىنا جابىسىپ ءجۇرۋدى ۇيرەنشىكتى داعدى قىلىپ العان. كوزگە وتتاي باسىلاتىن كورشىنىڭ مۇنداي ەرسى قىلىعىنان سەسكەنگەن اتا-انالار ول جوق كەزدە عانا قىزدارىن ۇيدەن شىعارۋعا كوشكەن.
ال جەرگىلىكتى پوليتسيا ءتىپتى بۇل مەكەنجايدى جاتقا بىلەتىن كورىنەدى. سەبەبى ءتارتىپ ساقشىلارىنا قانشا رەت ارىز تۇسكەنىمەن، وقيعا ورنىنا جەتكەن پوليتسيا ەسىك الدىنان كەرى قايتۋعا ءماجبۇر. شتات زاڭىنا سايكەس، ءوز اۋلاسىندا جالاڭاش جۇرگەن ادامنىڭ ارەكەتى ەشقانداي ءتارتىپ بۇزۋشىلىققا جاتپايدى.
ەگەر ءدال وسى جاعداي قوعامدىق ورىنداردا قايتالانسا، وندا ايىپ باسقاشا. ال اشىنعان كورشىلەر بولسا قايتكەن كۇندە دە زاڭدى وزگەرتپەيىنشە، العان بەتتەرىنەن قايتپايتىنىن ايتىپ وتىر. اۆتورى: جىگەر سارسەن
www.24.kz