قازاقستان حالقىنىڭ ونەرىنە قاتىستى 10 كىتاپ جارىققا شىقتى
«قازاقستان حالقى ادەبيەتى جانە ۇلتتىق سايكەستىك» اتتى كونفەرەنسيادا تانىستىرىلعان كىتاپتاردى عالىم، جازۋشى ءۋاليحان قاليجانوۆ باسشىلىعىمەن م. اۋەزوۆ اتىنداعى ادەبيەت جانە مادەنيەت ينستيتۋتى قۇراستىرىپ شىعاردى.
ولاردىڭ قاتارىندا «قازىرگى ادەبيەتتەگى جالپى ادامي قۇندىلىقتار»، «قازاقستانداعى قازىرگى زامان فولكلورى»، «زاماناۋي كەزەڭدەگى قازاقستان حالقى ادەبيەتى»، «قازاقستان حالقىنىڭ مۋزىكالىق ونەرى»، «قازاقستان حالقى ادەبيەتى»، «قازاقستان حالقىنىڭ ساحنا ونەرى»، «مادەني پوليلوگ: قازاقستان حالقىنىڭ بەينەلەۋ ونەرى» سىندى ءبىرىنشى ۇجىمدىق مونوگرافيالار قاتىسۋشىلار نازارىنا ۇسىنىلدى.
راسىمدە ءسوز العان ق ر پرەمەر- ءمينيسترىنىڭ ورىنباسارى بەردىبەك ساپاربايەۆ اتالمىش شارا قازاقستان حالقى اسسامبلەياسىنىڭ جىلى اياسىندا وتكىزىلىپ جاتقانىن ەرەكشە اتاپ ءوتتى.
«وزدەرىڭىز بىلەسىزدەر، وسىدان 20 جىل بۇرىن، مەملەكەت باسشىسى نۇرسۇلتان نازاربايەۆتىڭ باستاماسىمەن قۇرىلعان قازاقستان حالقى اسسامبلەياسىنىڭ قازىرگى تاڭدا ءبىزدىڭ ۇلت، ءبىزدىڭ ەلدىڭ ىشىندە عانا ەمەس، بۇكىل دۇنيەجۇزى ءۇشىن ۇلكەن ورنى بار. ءاربىر حالىقتىڭ تۇرمىسى، حال- احۋالى، ونىڭ ەكونوميكاسىنا بايلانىستى بولادى. ال ەكونوميكانىڭ دامۋى ءۇشىن سول مەملەكەتتە تۇراقتىلىق، كەلىسىم، تاتۋ- ءتاتتى ءومىر قالىپتاسقان بولۋى كەرەك. ەلباسى نۇرسۇلتان نازاربايەۆ وتكىزىپ وتىرعان ساياساتىنىڭ ارقاسىندا وسى 20 جىلدان بەرى كوپۇلتتى قازاقستاندا ەشقانداي قانتوگىس، سوعىس بولعان جوق»، - دەيدى ۆيتسە- پرەمەر.
ونىڭ پىكىرىنشە، قازاقستاندا تۇرىپ جاتقان بارلىق حالىقتاردىڭ وكىلدەرى وزدەرىنىڭ تاريحتارىن، داستۇرلەرىن، ادەبيەتتەرىن، مادەنيەتتەرىن ۇمىتپاۋ ءۇشىن جاعداي جاسالىنۋى كەرەك.
«ادەبيەت تەك قانا ءبىر ۇلتتىڭ ادەبيەتى بولىپ قالماۋى كەرەك، سول مەملەكەتتە تۇرىپ جاتقان بارلىق حالىقتاردىڭ ادەبيەتى بولۋى كەرەك. وزدەرىڭىز جاقسى بىلەسىزدەر، مەملەكەت باسشىسى ءبىزدىڭ مەملەكەتىمىزدە تۇرىپ جاتقان ۇلتتاردىڭ ادەبيەتىنىڭ، مادەنيەتىنىڭ، ونەرىنىڭ، بىلىمدەرىنىڭ دامۋىنا ۇلكەن جاعدايلار جاساۋدا. ءاربىر وبلىستاردا ۇلتتىق مادەني ورتالىقتاردىڭ، دوستىق ۇيلەرىنىڭ بار ەكەندىگىن بىلەسىزدەر. الەمدە قازاقستان سياقتى 5 تىلدە ونەر كورسەتەتىن تەاترلارى، 15 تىلدە شىعاتىن گازەتتەرى بار ەلدەر كوپ ەمەس شىعار»، - دەپ تۇيىندەدى ءسوزىن ب. ساپاربايەۆ.
اۆتور: جاسۇلان جولدىبايەۆ