ەستەرىڭىزگە سالا كەتەيىك، بەلگىلى جازۋشى، اۋدارماشى، ادەبيەتتانۋشى گەرولد بەلگەر 81 جاسىنا قاراعان شاعىندا كەشە كۇندىزگى ساعات 13:00 شاماسىندا ورتالىق كلينيكالىق اۋرۋحانادا قايتىس بولدى.
جازۋشى رەسەيدىڭ ساراتوۆ وبلىسىندا 1934-جىلى 28- قازاندا دۇنيەگە كەلگەن.
1941-جىلى ءستاليننىڭ جارلىعىمەن ك س س ر- داعى بارلىق نەمىستەرمەن بىرگە قازاقستانعا، قازاق اۋىلىنا (س ق و- داعى ىسقاق ىبىرايەۆ اۋىلى) جەر اۋدارىلدى. بۇل جەردە جاس گەرولد قازاق ءتىلىن ۇيرەنەدى.
قازىرگى سولتۇستىك قازاقستان وبلىسى شالاقىن اۋىلىندا قازاق ورتا مەكتەبىندە وقىدى. مەكتەپتى التىن مەدالمەن بىتىرگەن.
اباي اتىنداعى قازاق پەداگوگيكا ينستيتۋتىن جانە اسپيرانتۋراسىن ءتامامدادى. شىعارمالارىن نەمىس، ورىس، قازاق تىلدەرىندە جازعان.
1958-1960-جىلدارى - جامبىل وبلىسى بايقادام كەڭشارىنىڭ ورتا مەكتەپ مۇعالىمى. 1963-1964 -جىلدارى - «جۇلدىز» جۋرنالىنىڭ ادەبي قىزمەتكەرى. 1964-جىلدان شىعارماشىلىق جۇمىستا بولعان. 1992-جىلدارى نەمىس تىلىندە شىعاتىن «فەنيكس» الماناحى باس رەداكتورىنىڭ ورىنباسارى قىزمەتتەرىن اتقارعان.
«اۋىل شەتىندەگى ءۇي»، «دالاداعى شاعالالار»، «التى اسۋ»، «تاس وتكەل»، «باۋىرلاستىقتىڭ جاندى بەينەسى»، «سوزۆۋچيە»، «ۋاقىتپەن بەتپە-بەت»، «موتيۆى ترەح سترۋن»، «گەتە جانە اباي»، «رودستۆو»، «زەمنىە يزبراننيكي» زەرتتەۋ ەڭبەكتەرىنىڭ، جەكەلەگەن اڭگىمە، ماقالالارى ەنگەن 25 كە جۋىق جيناقتاردىڭ اۆتورى. ب. مايلين، ح. ەسەنجانوۆ، ءا. نۇرپەيىسوۆ، ءا. كەكىلبايەۆ، د. دوسجانوۆ، تاعى باسقا قازاق جازۋشىلارىنىڭ ءبىرقاتار شىعارمالارىن قازاقشادان ورىس تىلىنە، ا. رايمگەن، ە. كونچاك، ن. ۆاككەر، تاعى باسقا نەمىس اقىن، جازۋشىلارىنىڭ جەكەلەگەن تۋىندىلارىن نەمىس تىلىنەن ورىسشاعا اۋداردى.
قازاقستان جازۋشىلار وداعىنىڭ ب. مايلين اتىنداعى سىيلىقتىڭ، پرەزيدەنتتىڭ بەيبىتشىلىك پەن رۋحاني تاتۋلىق سىيلىعىنىڭ، سونداي-اق قازاقستان پ ە ن- كلۋب سىيلىعىنىڭ يەگەرى. «پاراسات» وردەنىمەن ماراپاتتالعان.
اۆتور: گۇلميرا عوسمانالي