ەڭ كوپ پايدا تاپقان قازاقستاندىق 10 فيلم
رەجيسسەرلەر مەن پروديۋسەرلەر كارتيناعا جۇمسالعان شىعىننىڭ ەگەر فيلم شەت ەلدەرگە شىقپاسا قايتارىلمايتىنىن نەمەسە ءتىپتى مۇمكىن ەمەستىگىن ايتادى.
بۇل ماسەلەنى كينەماتوگرافيستەردىڭ جىل سايىن ءوتىپ تۇراتىن جيىنىندا كوتەرىپ، ۇكىمەتكە ۇسىنىستار ايتسا دا ازىرشە كينو ارقىلى اقشا تابۋ - قيىننىڭ قيىنى.
ءوزىن-ءوزى اقتاپ قانا قويماي، ونىڭ ۇستىنە مول تابىس تا تاپقان وتاندىق 10 فيلمنىڭ توپتاماسى نازارلارىڭىزعا ۇسىنىلادى.
ايتا كەتەيىك، تاياۋدا عانا فيلمدەرى ەڭ كوپ كورەرمەن جينايتىن قازاقستاندىق 10 رەجيسسەردىڭ ءتىزىمى جاريالانعان ەدى. سوندا بۇل ءتىزىمدى اقان ساتايەۆ باستاپ تۇرعان. ال ەندى ەڭ كوپ پايدا تاپقان 10 فيلم تىزىمىنە ونىڭ ءۇش بىردەي كارتيناسى كىردى - «جاۋجۇرەك مىڭ بالا»، «ليكۆيداتور» جانە «رەكەتير». «جاۋجۇرەك مىڭ بالا» تاريحي كارتيناسى بۇگىنگە دەيىن ەلدە ەڭ كوپ تابىس تاپقان فيلم رەتىندە رەكوردشى بولىپ وتىر. فيلم كينوتەاترلاردان كورسەتىلە باستاعان ءبىرىنشى اپتاسىندا-اق ميلليون دوللار تابىس تاپتى. مۇنىمەن بىرگە، «جاۋجۇرەك مىڭ بالا» 2012 - جىلى DVD نۇسقاسىندا ساتىلعان فيلمدەردىڭ اراسىندا كوش باستادى، ال «ليكۆيداتور» - 2011 - جىلى ءبىرىنشى ورىننان كورىندى. ەرمەك تۇرسىنوۆتىڭ «شال» لەنتاسى دا جاقسى پايدا تاپتى.
ول 2013 - جىلى «وسكار» سىيلىعىنا ۇسىنىلعان ەدى. كينو پرەمەراسىنان ءبىر اي وتكەندە 53,5 ميلليون تەڭگە قارجى جينادى. ەڭ كوپ پايدا تاپقان فيلمدەر تىزىمىنە بايان ەسەنتايەۆانىڭ پروديۋسەرلىك ورتالىعىن دا باتىل تۇردە قوسا بەرۋگە بولادى - «عاشىق جۇرەك» جانە «ابايلاڭىز، سيىر!». ولار شىعىنىن اقتاپ قانا قويماي، كومپانياعا تابىس تا اكەلدى. فارحات ءشارىپوۆتىڭ «قىزعىلت قويان تۋرالى ەرتەگى» فيلمى شىققان كەزدە ونىڭ كوپ تابىس تاباتىنىنا سەنىم بولماعان ەدى. ءبىراق پروكاتقا شىققان ءبىرىنشى اپتانىڭ وزىندە قازاقستاندىق كينەماتوگرافيانىڭ ەڭ ءبىر تابىستى فيلمدەرى قاتارىنا كىردى.
«قىزعىلت قويان تۋرالى ەرتەگى» ينتەرنەتتە دە كوپ كورىلەدى. قازاقستاندىق بەلگىلى ءانشى قايرات نۇرتاستىڭ ءومىرى جايلى فيلمنىڭ ءساتتى بولاتىنىنا ەشكىمنىڭ دە كۇمانى جوق بولاتىن. ءانشىنىڭ مىڭداعان تىڭدارمانىنىڭ ارقاسىندا «وكىنىش» كارتيناسى ءبىر اپتانىڭ ىشىندە 34 ميلليون تەڭگە تابىس اكەلدى.
لەنتانىڭ 46 كوشىرمەسى شىقتى، بۇل كورسەتكىش قازاقستاندىق كارتينالاردىڭ ىشىندە رەكورد سانالادى. 2013 - جىلى ءساتتى بولعان فيلمدەردىڭ ءبىرى 27 جاستاعى رەجيسسەر ساكەن جولداسوۆتىڭ «قىز بەن جىگىت» فيلمى بولدى. ءبىرىنشى ۋيكەندتە 40 ميلليون (220 مىڭ دوللاردان استام) تەڭگە تابىس تاپتى. ال كارتينانىڭ بيۋدجەتى 300 مىڭ دوللار عانا. قازاقستاندىق پروكاتتا D3 فورماتپەن شىققان ءبىرىنشى فيلم - «ا- عا ورالۋ». ەگور كونچالوۆسكييدىڭ فيلمى پروكاتقا شىققان سوڭ ءبىر اپتادا 60 ميلليون تەڭگە جيناپ الدى (406 مىڭ دوللار).
kaz.tengrinews.kz