قاعبانى ءبىر ۋاقىتتا 107000 ادام اينالا الاتىن بولدى
12:48, 08 - ماۋسىم 2015
استانا. قازاقپارات - قاسيەتتى مەككە شاھارىنداعى ءال-حارام مەشىتىنە قايتا جوندەۋ جۇمىستارىنان سوڭ 1,85 ميلليون ادام سيادى. بۇل جونىندە ەل كورولى سالماننىڭ مەشىتكە كەلگەن ساتىندە جاۋاپتى قىزمەتكەرلەرى ءمالىم ەتتى.
مادەنيەت جانە اقپارات ءمينيسترى ادەل ات-تۋفايفيدىڭ ايتۋىنشا، مەشىت پەن ونىڭ اۋلاسىن، ماتاف (قاعبانى اينالىپ، تاۋاپ جاساۋ) ايماعىن كەڭەيتۋ جۇمىستارى ناتيجەسىندە قۇلشىلىق ورداسىنىڭ جالپى اۋماعى 1,47 ميلليون شارشى مەترگە جەتكەن. قۇرىلىس جۇمىستارىنىڭ سوڭعى، ياعني ءۇشىنشى كەزەڭى اياقتالعان سوڭ قاسيەتتى قاعبانى ءبىر مەزگىلدە 107000 ادام اينالا الادى.
بۇل قۇرىلىس جۇمىستارى قاعبا تاريحىنداعى ەڭ اۋقىمدى جوبا بولماق. قۇرىلىس بارىسىندا سەرۆيستىك ستانتسيا مەن ەكولوگيالىق تۇرعىدان تازا سانالاتىن اۋا جەلدەتكىشتەرى، سۋ جۇيەلەرى، 12500 دارەتحانا مەن قوقىس وڭدەۋ قىزمەتتەرى دە قوسا جوندەۋدەن وتكىزىلەدى.
Islam.kz