سوعىس ارداگەرى ايسارا بايمۇراتوۆا 103 جاسقا تولدى

تۇركىستان. قازاقپارات - تۇركىستان وبلىسى جەتىساي اۋدانى جاڭا اۋىل اۋىلدىق وكرۋگىنىڭ تۇرعىنى ايسارا بايمۇراتوۆا ەكىنشى دۇنيەجۇزىلىك سوعىس پەن جاپون سوعىسىنا كۋاگەر بولعان، تىلدا ءجۇرىپ ەڭبەك ەتكەن، دەپ حابارلايدى قازاقپارات ءتىلشىسى.

1919-جىلى دۇنيە ەسىگىن اشقان ايسارا بايمۇراتوۆا بالالار ۇيىندە تاربيەلەنگەن. ەكىنشى دۇنيەجۇزى جانە جاپون سوعىستارىنا قاتىسقان. جىلقىمەن ءجۇرىپ سولداتتارعا سۋ مەن تاماق تاسىعان. بوس ۋاقىتىندا تىگىن تىككەن.

ال سوعىستان كەيىنگى جىلدارى تىڭ يگەرۋگە بەلسەنە اتسالىسىپ، كانال قازۋ جۇمىستارىنا قاتىسقان. وتباسىن قۇرىپ، 3 قىز، 2 ۇل تاربيەلەپ ءوسىردى، 40 تان استام نەمەرە جانە 70 كە جۋىق شوبەرە ءسۇيىپ وتىر. سونداي-اق 4 شوپشەگىنىڭ قولىنان ماي جالاۋدا.

«اتامىز جۇبايىن قاتتى قىزعانعان ەكەن. ءسويتىپ وردەن-مەدالدارىن ورتەپ جىبەرگەن. سودان ەشقانداي ماراپاتتارى قالماعان. مەن 1983-جىلى وسى وتباسىعا كەلىن بولىپ ءتۇستىم. اپامىزدان ۇيرەنگەنىم كوپ. ءتالىم-تاربيەسىن الىپ، وسيەتىن تىڭداپ وستىك. قازىر ءوسىپ- ونگەن ۇلكەن اۋلەتكە اينالىپ وتىرمىز»، - دەيدى كەلىنى ماريام.

اقجاۋلىقتى اجەيدىڭ 2 قىزى جانە 2 كەلىنى «باتىر انا» اتاعىن العان.